1Th 4 | TyvTUV | STEP | Түңнелинде, ха-дуңма, Дээрги Иисустуң ады-биле силерден ээрежип база кыйгырып тур бис: Бурганга таарымчалыг кылдыр канчаар амыдыраар ужурлуун силерге өөредип каанывыс дег, улаштыр ынчалдыр амыдыраңар . Ам безин ынчалдыр амыдырап турар силер , ындыг-даа болза, ынчаар амыдыраарын оон-даа чүткүлдүг уламчылаңар.

‏ 1 Thessalonians 4

Бурганга таарымчалыг амыдырал

1 Түңнелинде, ха-дуңма, Дээрги Иисустуң ады-биле силерден ээрежип база кыйгырып тур бис: Бурганга таарымчалыг кылдыр канчаар амыдыраар ужурлуун силерге өөредип каанывыс дег, улаштыр ынчалдыр амыдыраңар ^a. Ам безин ынчалдыр амыдырап турар силер ^{▼▼ Өске бурунгу сөзүглелдерде «Ам безин ынчалдыр амыдырап турар силер» деп сөстер таварышпайн турар.}, ындыг-даа болза, ынчаар амыдыраарын оон-даа чүткүлдүг уламчылаңар. 2 Дээрги Иисустуң эрге-чагыргазы-биле силерге кандыг чагыглар бергенивисти билир силер. 3 Бурган ыдыктыы-биле амыдыраарыңарны болгаш кандыг-даа самыыраар чоруктан ойталаарыңарны күзеп турар ^c. 4 Эр кижи бүрүзү бодунуң мага-бодунуң күзээшкиннерин тудуп ^{▼▼ Азы: «Эр кижи бүрүзү бодунуң кадайы-биле кады чурттазын».}, ыдыктыг, мактал-хүндүге төлептиг амыдыразын. 5 Бурганны билбес улус дег, туралаан хандыкшылының аайынга кирбезин ^e. 6 Ындыг таварылгада эр кижи бүзүрээн эжин карак ажыттап, ооң бүзүрелин ажыглай бербезин халак. Чүге дээрге мооң мурнунда-ла силерге чугаалап база кичээндирип турганывыс дег, шак ындыг бачыттар дээш, Бурган кеземче онаар. 7 Ол бисти чүдек-бужар боорунче эвес, а ыдыктыг амыдыралче кыйгырган болгай ^f. 8 Ындыг болганда, кым ол чагыгларны хүлээп албааныл, оозу-биле кижини эвес, а силерге Бодунуң Ыдыктыг Сүлдезин берип турар Бурганны хүлээп албаан-дыр.

9 Бүзүрээн ха-дуңмавыска ынакшыл дугайында ^g силерге оон ыңай бижээн херээвис чок боор, чүге дээрге Бурган силерни бот-бодуңарга ынак боорунга өөредип каан болгай ^h. 10 Бүгү Македонияда чурттаан ха-дуңмаңарга чогум-на ынчалдыр ынак силер. Ындыг-даа болза, ха-дуңма, бот-бодуңарга оон-даа күштүг ынак бооруңарны дилеп тур бис. 11 Тайбың-шөлээн амыдыралче чүткүңер ⁱ, ооң мурнунда силерге чагып турганывыс дег, кижи бүрүзү бодунуң ажыл-херээн чогудуп, амыдыраар кошкулун бодунуң холу-биле ажылдап аар ужурлуг ^j. 12 Ынчалдыр кылыр болзуңарза, өске улус силерниң канчаар амыдырап чорууруңарны хүндүлээр ^k база хереглелдериңерге кымдан-даа хамаарылга чок боор силер.

Дээрги-Чаяакчының ээп кээри

13 Ха-дуңма, өлген улус-биле чүү боорун билип аарыңарны күзеп тур бис. Силер, идегээр чүвези чок өске улус дег ^l, өлгеннер дээш муңгараваңар. 14 Бир-тээ, Иисус өлгеш, оон катап дирилген деп бүзүрээр болганывыста ^m, Иисуска бүзүревишаан өлген улусту Бурган Ооң-биле кады дедир эккээр деп база бүзүрээр бис ⁿ. 15 Дээрги-Чаяакчының чугаалаан сөстерин барымдаалап, силерге чугаалап тур бис: Ооң чедип кээринге чедир бистиң аравыстан дириг артар улус мөчээннер мурнунче кирбес бис ^o. 16 Улус дээрниң кол төлээзиниң үнүн ^p болгаш Бурганның трубазының эткенин дыңнап каар ^q. Дээрги-Чаяакчы Боду дээрден дүжүп келгеш ^r, дужаалын медеглептер. Христоска бүзүревишаан өлгеннер ынчан кымны-даа мурнай катап дирлип кээр ^s. 17 А ооң соонда бис, дириг улус, Дээрги-Чаяакчыны агаарга уткуур дээш, олар-биле кады булуттар кырынче көдүртүп үндүртү бээр ^t база оон соңгаар кезээ мөңгеде Дээрги-Чаяакчы-биле кады артар бис ^u. 18 Ынчангаш ол сөстер-биле бот-бодуңарны аргалап чоруңар.