1Th 5 | TyvTUV | STEP | Ха-дуңма, силерге үелер болгаш хуусаалар дугайында бижээн херээ чок боор .

‏ 1 Thessalonians 5

Дээрги-Чаяакчының ээп кээринге белен болуңар

1 Ха-дуңма, силерге үелер болгаш хуусаалар дугайында бижээн херээ чок боор ^a. 2 Дүне када оор дег, Дээрги-Чаяакчының шииткел хүнү хенертен чедип кээрин боттарыңар кончуг эки билир силер ^b. 3 Улус: «Кайда-даа амыр-тайбың-дыр, айыыл чок-тур» – деп чугаалажы бээрге, ынчан хенертен, сааттыг херээженниң эъди аарый бээри дег ^c, оларны өлүм-чидим хөме таварыыр ^d база кым-даа оон дезип шыдавас!

4 Ха-дуңма, ынчалза-даа силер дүмбей караңгыда эвес силер ^e, ол хүн, оор дег, силерниң кырыңарга хеп-хенертен келбес. 5 Чүге дээрге силер – чырыктың болгаш хүннүң ажы-төлү силер ^f. Бис дүнге база дүмбей караңгыга хамаарышпас бис. 6 Ындыг болганда, өске улус ышкаш, уйгуга бастырбаалы. Серемчилелдиг болгаш хынамчалыг болуңар ^g. 7 Уйгужу улус дүне удуур, арагачылар база дүне эзиртир ижер болгай. 8 А бис, хүнге хамааржыр болганывыста, хынамчалыг болуулу, бүзүрел болгаш ынакшылды – куяк хеп дег, а камгалалга идегелди – куяк бөрт дег кедип аалы ^h. 9 Чүге дээрге Бурган бисти, Ооң килеңиниң хүнүнде шиидер дээш эвес, а Дээргивис Иисус Христосту дамчыштыр камгалаар дээш шилип алган ⁱ. 10 Христос бис дээш, Ооң ээп кээр хүнүнде дириг-даа, өлүг-даа турар болзувусса ^j, Ооң-биле тудуш апарып, амыдыраарывыс дээш өлген. 11 Ынчангаш ам ынчалдыр кылып турарыңар дег, бот-боттарыңарны моон-даа соңгаар аргалаңар база быжыглаңар.

Түңнел чагыг-сүмелер болгаш байыр чедириишкиннери

12 Ха-дуңма, улуу-биле дилеп тур бис: араңарда кызымак ажылдап турар, Дээрги-Чаяакчы-биле харылзаалыг амыдыралга силерни углап-баштап, чагып-сургап турар удуртукчуларны хүндүлеп көрүңер ^k. 13 Кылып турар ажыл-херээ дээш, оларны ханы хүндүлеңер, оларга ынак болуңар. Араңарда эп-найыралдыг амыдыраңар ^l. 14 Ха-дуңма, күштүү-биле дилеп тур бис: ажыл кылбас чалгааларны билиндириңер ^m, кортуктарны сорук киириңер ⁿ, кошкактарга чөленгииш болуңар, хамык улус-биле чымчак, чазык болуңар ^o. 15 Кайыңар-даа силерге чедирген хора дээш хора-биле харыылай бербезин халак ^p, харын бот-боттарыңарга база өске бүгү улуска буяндан үргүлчү кылып чоруңар.

16 Үргүлчү өөрүп чоруңар! ^q 17 Соксаал чок мөргүлдеңер ^r. 18 Кандыг-даа байдалга тургаш, Бурганга өөрүп четтирип чоруңар – Христос Иисус-биле харылзаа тургускан силерниң ынчалдыр чурттаарыңарны Бурган күзеп турар ^s.

19 Ыдыктыг Сүлдениң одун өжүрбеңер ^t: 20 өттүр билген медеглелдерни куду көрбеңер, 21 ынчалза-даа шуптузун хынап чаңчыгыңар ^u; буяндан туттунуңар, 22 кандыг-даа бузуттан чайлап чоруңар.

23 Амыр-тайбыңның үнер дөзү боор Бурган Боду ^v силерни бүгү тала-биле ыдыктыг кылып кагзын. Дээргивис Иисус Христостуң ээп кээр хүнүнге чедир силерниң сүлдеңер, сагыш-сеткилиңер база мага-бодуңар кем чок арыг кадагалаттынып артсын. 24 Силерни кыйгырган Бурган Бодунуң сөзүнге шынчы, Ол аазаашкынын күүседир! ^w

25 Ха-дуңма, бис дээш база мөргүлдеп көрүңер ^x. 26 Бурганның бүгү улузун ыдыктыг ошкаашкын-биле мендилеңер ^y. 27 Дээрги-Чаяакчының эрге-чагыргазы-биле силерге дужаап тур мен: бо чагааны бүгү бүзүрээн ха-дуңмага номчуп бериңер ^z. 28 Дээрги-Чаяакчывыс Иисус Христостуң авыралы силерге доктаазын! ^{▼▼ Өске бурунгу сөзүглелдерде бо шүлүк «аминь» деп сөс-биле төнген.}