1Ti 3 | TyvTUV | STEP | Шынныг сөстер бо-дур : кандыг-бир кижи христиан ниитилелдиң удуртукчузу боор дээш чүткүүр болза, ол эки ажыл-херек кылыксаан-дыр.

‏ 1 Timothy 3

Христиан ниитилелдиң удуртукчулары

1 Шынныг сөстер бо-дур ^a: кандыг-бир кижи христиан ниитилелдиң удуртукчузу боор дээш чүткүүр болза, ол эки ажыл-херек кылыксаан-дыр. 2 Ынчаарга удуртукчу кижи ону буруудаткы дег чүве чок, кадайынга өскерилбес ^{▼▼ Азы: «Чүгле чаңгыс катап кадай алган».}, бодун туттунуп билир, бодамчалыг, төлептиг алдынып чоруур, хүндүлээчел ээ, улусту өөредип шыдаар кижи боор ужурлуг ^c. 3 Ол арагаже сундукпас, содаачы эвес, оожум-топтуг, эп-найыралдыг ^d, акша-мөңгүнге чазыйлавас ^e; 4 бодунуң өг-бүлезин эки башкарып шыдаар, дыңнангыр база ону бүгү талазы-биле хүндүлээр ажы-төлдүг кижи боор ужурлуг. 5 (Бодунуң өг-бүлезин башкарып шыдавас кижи Бурганга бүзүрээннер ниитилели дээш канчап сагыш човаарыл?) 6 Ол кижи Христоска чоокта чаа бүзүрээн улус санынче кирбес ужурлуг, оон башка бодун өрү көрдүне бээр база эрликке дөмейлештир шииттирип аар ^{▼▼ Азы: «Эрликке буруудаттырар».}. 7 Христиан ниитилелден дашкаар ооң ат-сураа база чүгле эки боор ужурлуг, оон башка ол бак атка кирип, эрликтиң дузаанга туттуруп аар ^g.

Христиан ниитилелде дузалакчылар

8 Дузалакчылар база хүндүткелге төлептиг, ак сеткилдиг, арагага сунду чок, алыксак-чиксек эвес улус боор ужурлуг ^h. 9 Олар арыг арын-нүүр-биле бүзүрелдиң ханы алыс шынын эдерер ужурлуг. 10 Дузалакчыны база баштай шенээр херек. Оларга удур кандыг-даа буруудадыышкын тывылбаза, дузалакчылар бооп бараан болгайлар аан.

11 Оларның кадайлары база хүндүткелге төлептиг, хоп-чип дажывас, бодун туттунуп билир, бүгү тала-биле бүзүреп боор улус болзун ⁱ. 12 Дузалакчылар кадайларынга өскерилбес*, ажы-төлүн база өг-бүлезин эки башкарып шыдаар улус боор ужурлуг. 13 Эки бараан бооп келген улус хүндүткелдиг байдалды чедип алыр база Христос Иисуска бүзүрелди коргуш чок суртаалдаар боор.

Өндүр улуг чажыт

14 Бо бүгүнү сеңээ бижидим, ооң кадында удавас сеңээ чеде бээримге идегеп олур мен. 15 Саадай берзимзе, дириг Бурганга бүзүрээннер ниитилелинге – алыс шынның чөленгиижи болгаш үндезининге, Бурганның өг-бүлезинге бодуңну канчаар алыр ужурлууңну билип алзын дээш, бижээним ол.

16 Ийет, маргыш чок, чүдүлгевистиң чажыды өндүр улуг:

Христос кижи мага-боттуг бооп чедип келген ^j,
Ооң чөптүг-шынныын Сүлде көргүскен,
Ону дээрниң төлээлери көрген,
Ооң дугайында Буянныг Медээни элчиннер аймак-чоннарга суртаалдаан,
бо делегейниң улузу Аңаа бүзүрей берген база
Ол Бодунуң өндүр бедиин көргүзүп, дээрже көдүрлүп үне берген ^k.