‏ 2 Chronicles 30

Эзекияның Хосталыышкын байырлалын демдеглээни

1Эзекия бүгү Израильдиң болгаш Иудеяның чонунче шапкынчылар чоруткан, а Эфрем биле Манассияның чонунга база чагаалар бижип, Израильдиң Бурганы Дээрги-Чаяакчыга тураскааткан Хосталыышкын байырлалын демдеглээри-биле Иерусалимде Ооң өргээзинге чыглып кээрин чалаан. 2Хаан, ооң нояннары болгаш Иерусалимде бүгү ниитилел чөвүлешкеш, Хосталыышкын байырлалын ийи айда эрттирер деп шиитпирлээн ^a. 3Олар ону бир айда эрттирип шыдавайн барган, чүге дээрге ыдыктанып ап четтигипкен Бурганның бараалгакчылары чедишпейн турган ^b, чон база Иерусалимге чыглып келбээн болган. 4Ол шиитпир хаанга-даа, бүгү ниитилелге-даа таарышкан. 5Ынчаарга олар бүгү израильчилерге, соңгу чүкте Дандан эгелээш, мурнуу чүкте Беэр-Шевага чедир ^c, Израильдиң Бурганы Дээрги-Чаяакчыга тураскааткан Хосталыышкын байырлалын демдеглээри-биле Иерусалимге келир кылдыр чарлаарын шиитпирлээн. Чүге дээрге ол байырлалды, ыдыктыг хоойлуда айытканы дег кылдыр, хөй санныг чон шагдан бээр демдеглеп көрбээн болган.

6Хаанның, ооң нояннарының чагааларын тарадып чедирген шапкынчылар бүгү Израиль биле Иудеяны эргип кезип, хаанның дужаалын ёзугаар медеглеп чораан:

«Израиль чон! Авраамның, Исаактың болгаш Израильдиң Бурганы Дээрги-Чаяакчыже эглип келиңер ^d, ынчан Ол база силерниң чонуңарның Ассирияның хааннарының холундан уштунуп дескен артынчызынче эглип келир. 7Боттарының ада-өгбезиниң Бурганы Дээрги-Чаяакчыга шынчы чоруун үрээн адаларыңар болгаш ха-дуңмаңар дег болбаңар ^e: Ол оларны хоозураашкынга таварыштырган дээрзин ам бодуңар көрүп тур силер. 8Силер ам ада-өгбеңер дег чөрүү болбаңар ^f, Дээрги-Чаяакчыже холуңар сунуңар. Ооң кезээ мөңгеде ыдыктап каан өргээзинче чедип келиңер. Силерниң Бурганыңар Дээрги-Чаяакчыга бараан болуңар, Ол ынчан кыптыккан килеңин силерден чайладыр. 9Дээрги-Чаяакчыже эглип кээр бооруңарга, силерниң ха-дуңмаңарны, ажы-төлүңерни тудуп алган ассирийлер оларны кээргей бээр, олар ынчан бо чуртче чанып кээр, чүге дээрге бистиң Бурганывыс Дээрги-Чаяакчы ачылыг болгаш кээргээчел ^g. Силер Олче эглип кээр болзуңарза, Ол силерден хая көрүнмес».

10Шапкынчылар Эфремниң, Манассияның аймактарының черинге, мырыңай Завулоннуң аймааның черинге чедир хоорайлар кезип чоруп турган, а улус-чон оларны кыжырып, дорамчылап кочулаар болган. 11Ындыг-даа болза, Асир, Манассия болгаш Завулоннуң аймактарындан чамдык улус томаарый берип, Иерусалимге чедип келген. 12А Иудеяга Бурганның холу чонга дузалап, хаанның база нояннарның Дээрги-Чаяакчының сөзүн ёзугаар дужааган чүвезин күүседир эп-сеткилди аңаа хайырлаан.

13Иерусалимге ийи айда эңдерик хөй чон Хаарган далганнар байырлалын демдеглээр дээш чыглып келген. 14Ол улус хөделип эгелээш, Иерусалимниң кудумчуларынга турган өргүл салыр бедигээштерни ^h, айдызаашкын кылыр бедигээштерни ап каапкаш, оларны Кедрон шынаазынче октапкан. 15Ийи айның он дөртте олар Хосталыышкын байырлалының анай-хураганнарын дөгерген. Бурганның бараалгакчылары биле левиттер, ыяды бергеш, ыдыктанып ап, Дээрги-Чаяакчының өргээзинге бүрүн өрттедир өргүлдерни эккеп салган. 16Олар Бурганның кижизи Моисейниң ⁱ хоойлузунда айтып каанын ёзугаар боттарының турар ужурлуг черлерин ээлепкен. Бурганның бараалгакчылары левиттерден өргүл малының ханын алгаш, өргүл бедигээжинче төп турган. 17Чыылган чон аразында ыдыктанып-арыгланыр ёзулал эртпээн улус хөй болганындан, Дээрги-Чаяакчыга бараалгадыр Хосталыышкын байырлалының анай-хураганнарын бүгү арыг эвес улустуң адындан левиттер дөгерип, ол өргүлдерниң Дээрги-Чаяакчының мурнунга ыдыктыын хевээр арттырган.

18Чоннуң хөй кезии, колдуунда-ла Эфрем, Манассия, Иссахар болгаш Завулоннуң аймактарындан үнген улус, ыдыктанып-арыгланып албаан болган, ынчалза-даа олар ыдыктыг хоойлунуң айтыышкынын үреп, өргүл эъдин чип турган ^j. 19А Эзекия олар дээш мөргүп: «Ыдыктыг арыгланыышкын ёзулалын эртпээн-даа болза, ада-өгбезиниң Бурганынче сеткил-чүрээнден чүткүп турар бүгү улусту ачы-буянныг Дээрги-Чаяакчы өршээзин!» – дээн. 20Дээрги-Чаяакчы Эзекияны дыңнап кааш, чонну өршээген ▼

▼ Азы: «Экиртип каан».

.

21Иерусалимге турган израильчилер Хаарган далганнар байырлалын ^l чеди хүн дургузунда аажок өөрүп-хөглеп байырлап келген. Левиттер биле Бурганның бараалгакчылары хөгжүм херекселдеринге үдедип, Дээрги-Чаяакчыны хүннүң-не ыыткыр алдаржыдып ырлап турган. 22Эзекия Дээрги-Чаяакчыга бараан болуушкунну мергежилдиг кылып билир бүгү левиттерниң сеткилин өөртүп, чугаалашкан. Чеди хүн дургузунда улус байырлалдың аъш-чемин чип, эп-найырал өргүлдерин салып, ада-өгбезиниң Бурганы Дээрги-Чаяакчыны алдаржыдып турганнар.

23Бүгү чыылган чон ам-даа чеди хүн байырлаар деп сүмележип шиитпирлээш, ол чеди хүнде база байырлалды демдеглеп, хөглеп эрттиргеннер. 24Иудеяның хааны Эзекия чыылган чонга 1000 бугажык, 7000 шээр мал берген, а нояннар чыылганнарга 1000 бугажык, 10 000 шээр мал берген. Хөй санныг Бурганның бараалгакчылары ам ыдыктанып алган турган. 25Иудеядан чыглып келген бүгү улус, Бурганның бараалгакчылары биле левиттер, Израильден чыглып келген бүгү улус база ооң мурнунда Израильден көжүп келгеш, Иудеяга чурттай берген кижилер – олар шупту өөрүп-хөглеп турган. 26Иерусалимге аажок улуг хөглээшкин болган, чүге дээрге Давидтиң оглу, Израильдиң хааны Соломоннуң үезинден бээр ^m Иерусалимге ол ышкаш байырлал болуп көрбээн чүве-дир. 27Бурганның бараалгакчылары биле левиттер туруп келгеш, чонну алгап-йөрээрге ⁿ, Бурган оларны дыңнап каан, оларның мөргүлү Ооң дээрде ыдыктыг оран-савазынга чеде берген болган ^o.