2Ch 8 | TyvTUV | STEP | Соломон Дээрги-Чаяакчының өргээзи биле хаанның ордузун чээрби чыл иштинде тудуп дооскан соонда ,

‏ 2 Chronicles 8

Соломоннуң өске ажыл-херектери

(3 Хаан. 9:10-28)

1 Соломон Дээрги-Чаяакчының өргээзи биле хаанның ордузун чээрби чыл иштинде тудуп дооскан соонда ^a, 2 Хирам хаанның аңаа берген хоорайларын база катап туткаш, ол хоорайларга израильчилерни чурттадып каан. 3 Ооң соонда Соломон Хамат-Цоваже чорупкаш, ону эжелеп алган. 4 Ол ээн кургаг ховуга Тадмор хоорайны база Хаматка таваан салганы аъш-чем курлавыры шыгжаар хоорайларның шуптузун тудуп каан. 5 Соломон Үстүү Бет-Орон болгаш Алдыы Бет-Орон деп хоорайларны ^b быжыглай тудуп, оларны ханаларлыг, дээктерлиг хаалгаларлыг шивээ-хоорайлар кылып каан ^c. 6 Ол Ваалат хоорайны, аъш-чем курлавыры шыгжаар бүгү хоорайларны база бодунуң дайынчы тергелерин болгаш аъттарын тургузар хоорайларны катап тудуп каан. Соломон Иерусалимге, Ливанга болгаш чагырып турганы бүгү черлерге тудар дээн бүгү чүвезин тудуп каан.

7 Соломон хет, амор, ферез, хиввей болгаш иевус чоннарның (олар шупту израильчилер эвес турган) артынчызын – 8 оларның чуртка артып калган, израильчилерниң узуткавааны үре-салгалын – кулдар ышкаш ажылдадып ажыглап турган, амдыгаа чедир ындыг бооп арткан. 9 А израильчилерни Соломон бодунуң ажылын кылыр кулдар кылдыр ажыглаваан ^d. Олар ооң шериглери, нояннары, шериг баштыңнары, ооң дайынчы тергелериниң башкарыкчылары, аъттыг шериг удуртукчулары бооп турган. 10 Соломон хаанның ажылчын күжүн хайгаараар 260 кол башкарыкчы кижи база турган чүве-дир.

11 А фараоннуң уруун Соломон Давидтиң Хоорайындан аңаа тудуп бергени ордуже көжүрүпкен ^e. Чүге дээрге ол: «Мээң кадайым Израильдиң хааны Давидтиң ордузунга чурттавас ужурлуг – Дээрги-Чаяакчының аптаразын киирип турган черлер ыдыктыг болур болгай» – деп чугаалаан чүве-дир.

12 Ол үеде өргээниң серилиг чериниң дужунга тудуп кааны Дээрги-Чаяакчының өргүл бедигээжинге ^f Соломон Аңаа бүрүн өрттедир өргүлдер кылып эгелээн. 13 Хаан Моисейниң айтыышкынын ёзугаар хүннүң-не доктааттынган өргүлдерни амыр-дыш хүннеринде, Ай чаазының байырлалдарында болгаш чылдың үш кол байырлалы: Хаарган далганнар, Чеди неделя, Чадырлар байырлалдарында кылып турган ^g. 14 Бодунуң ачазы Давидтиң дүрүмүнде доктаатканын ёзугаар ^h, Соломон албан-хүлээлге кылыры-биле Бурганның бараалгакчыларының салбырларын томуйлап каан. Левиттерниң салбырларын база, олар Бурганны алгап-мактазын дээш, өргээге хүннүң-не кылыр ажылдар кылырынга Бурганның бараалгакчыларынга дузалашсын дээш, томуйлап каан. Оон ыңай ол хаалгачыларны бөлүктер аайы-биле хаалга бүрүзүнге тургузуп каан, чүге дээрге Бурганның кижизи Давид ынчаар айтып чагаан турган ⁱ. 15 Хаанның бараалгакчылар биле левиттерге хамаарышкан айтыышкыннарын, ооң иштинде эртине-байлак шыгжамырларының дугайында айтыышкынын, израильчилер черле үреп көрбээн.

16 Соломоннуң бүгү ажыл-херээ Дээрги-Чаяакчының өргээзиниң таваан салган хүнден эгелээш, ону тудуп дооскан хүнге чедир күүсеттинген. Дээрги-Чаяакчының өргээзин бүрүнү-биле тудуп каан.

17 Ынчан Соломон Кызыл далайның эриинде, эдом черде турар Эцион-Гавер болгаш Эйлатче чорупкан ^j. 18 Хирам хаан аңаа бодунуң эжиндирип билир далайжылары башкарган корабльдарын бодунуң дүжүметтериниң дузазы-биле чорудуп берген. Ол далайжылар Соломоннуң улузу-биле кады Офирже эжиндирип чорупкаш ^k, оортан 450 талант алдын эккелгеш ^{▼▼ 450 талант – он үш ажыг тонна.}, Соломон хаанга чедире бергеннер.