2Cor 12 | TyvTUV | STEP | Ооң меңээ ажык-дузазы чок-даа болза, мактанырын уламчылаар болган-дыр мен . Дээрги-Чаяакчының меңээ берген көрүүшкүннеринче база ажыдыышкыннарынче шилчип көрейн .

‏ 2 Corinthians 12

Павелдиң өрү көдүрткени болгаш куду бадыртканы

1 Ооң меңээ ажык-дузазы чок-даа болза, мактанырын уламчылаар болган-дыр мен ^a. Дээрги-Чаяакчының меңээ берген көрүүшкүннеринче база ажыдыышкыннарынче шилчип көрейн ^b. 2 Бир христиан кижи барын билир мен: ол он дөрт чыл бурунгаар үшкү дээрже ^{▼▼ Үшкү дээр – Павел мында бодунга хамаарылгалыг кылдыр, эң бедик дээрге – Бурганның дүжүлгезиниң турар черинге четкеш келгенин чугаалааны чадавас.} өрү көдүртүре берген (мага-боду-биле катай бе азы чүгле сүлдези-биле бе, ону мен эвес, Бурган-на билир). 3 Ийе, ындыг кижини билир мен. Мага-боду-биле катай бе азы чүгле сүлдези-биле бе (ону мен эвес, Бурган-на билир), 4 ол дываажаңче ^{▼▼ Дываажаң – Бурганга шынчы улустуң өлүм соонда турар чыргалдыг оранын ынча дээн (Лк. 23:43; Ажыд. 2:7 көр).} көдүртүре бергеш, адаары хоруглуг, кижи дамчыдып шыдавас сөстерни аңаа дыңнаан. 5 Шак ындыг кижи дээш, чоргаараар мен, а бодум дээш, чүгле кошкак талаларым-биле дээрден башка, чоргааравас мен. 6 Чоргаараарын-даа күзээр болзумза, мелегей кижи дег болбас мен, чүге дээрге мээң чугаалаар чүвем шынныг-дыр. Ынчалза-даа бодумну туттунуп алыр мен, оон башка кандыг-бир кижи мээң дугайымда, ооң мени хайгаарап көргенинден азы ажыл-херектерим дугайында дыңнаарга, сагындырып кээримден, эки кылдыр бодай бээр.

7 Ол ышкаш кайгамчык онза ажыдыышкыннар алган мен! Ынчангаш Бурган мээң мага-бодумче, өрү көрдүнмезин бо дээш, тен кадаан ^{▼▼ Мага-ботта тен – Павел элчинни хилинчектээн хоочураан аарыгны ынчаар ойзу адаан болгу дег.} – эрликтиң төлээзин мени эттеп-согары-биле чорудупкан ^f. Катап база чугаалап тур мен: өрү көрдүнмезин бо дээш чорудупкан. 8 Ол тенни ап каапсын дээш, Дээрги-Чаяакчыга үш катап чаннып тейлээн мен. 9 А Ол меңээ мынча деп харыылаан: «Сеңээ Мээң авыралым-на четчир. Сээң кошкааң дамчыштыр Мээң күжүм илерээр» ^g. Христостуң күжү менде бар болзун дээш, бодумнуң кошкаамга чоргаараары – меңээ эң өөрүнчүг-дүр! 10 А Христос дээш кошкак болганымга, дорамчылатканымга, түрегдээнимге, истедип-сүрдүргенимге ^h, аар-бергелерге таварышканымга сеткилим ханар ⁱ. Чүгле кошкак тургаш, ылап-ла күштүг мен!

Коринфиде христиан ниитилел дээш, Павелдиң сагыш човаашкыны

11 Шуут-ла угааным чана берген-дир! Мени силер ындыг байдалга чедиргениңер ол-дур. Силер харын мени мактаар ужурлуг силер. Чөгенчиг бараскан-даа болзумза ^j, эң тергиин элчиннерден ^{▼▼ Эң тергиин элчиннер – 11:5 шүлүкке немелде тайылбырны көр.} чүм-биле-даа дорайтаваан мен! ^l 12 Ылап-ла элчин боорумнуң бадыткал демдектерин силерге шыдамыккай көргүзүп келген мен. Кайгамчык чүүлдерни, бадыткал демдектерин, күчүлүг ажыл-херекти көрген силер ^m. 13 Ындыг болганда, силерниинден аңгы христиан ниитилелдерге көөрде, чедир албаан чүңер барыл? Чүгле силерни шүүдетпээним ылгалдыг болган бе? ⁿ Ол буруум дээш, мени өршээңер!

14 Мен ам силерге үшкү удаа чеде бээринге белеткенип тур мен ^o. Силерге аартык болбас мен. Эт-хөреңгиңер эвес, а боттарыңар меңээ херек силер! ^p Ажы-төл ада-иезиниң хереглелин хандырбас, а ада-ие ажы-төлүнүң хереглелин хандырар болгай. 15 А мээң таламдан силер дээш бүгү чүүлдү чарыгдаары, бодумну безин бүрүнү-биле бериптери өөрүнчүг-дүр! ^q Силерге ынаам ол хире күштүг турда, меңээ ынааңар чүге ындыг кошкагыл?

16 Силерни шүүдетпээн-даа болгай-ла мен ^r. Чамдык улустуң буруудадып турары дег, авыяастап тургаш, силерни кажар арга-биле холга киирип алган мен бе? 17 Силерже чорудуп турган улузумнуң кайы-бирээзин дамчыштыр акшаңар олчалап алган мен бе? 18 Мен силерже чоруур кылдыр Титти дилеп алгаш, ооң-биле кады база бир бүзүрээн дуңмамны чоруткан мен ^s. Тит силерниң бир чүвеңер олчалап алган бе? Ынчаарга бис шупту чаңгыс-ла ол Сүлдеге башкарткаш, ажыл-херээвис кылып турбаан бис бе, чаңгыс-ла ол оруктар изеп чорбаан бис бе?!

19 Силер ам бисти үргүлчү-ле силерниң мурнуңарга агартынып турар улус-тур деп бодаан боор силер. Ындыг эвес! Херек кырында Христос-биле сырый харылзаалыг апаргаш, Бурганның мурнунга чугаалап тур бис ^t: ханы ынак эш-өөрүм, бо бүгү силерни быжыктырып турар! ^u 20 Менде мындыг сезик бар: силерге чеде бээримге, силер-даа, мен-даа, бот-боттарывысты ындыг улус кылдыр көрүксээнивистен көңгүс аңгы-дыр бис деп, удур-дедир эскерип кагзывысса, канчаарыл? Араңарда алгыш-кырыш, адааргал, килең, аңгылажыр чорук, хоп-нүгүл, бодун өрү көрдүнери болгаш корум-чурум чок чорук бар боор ирги бе дээш, сестир-дир мен. 21 Силерге база катап чеде бээримге, Бурганым мени силерниң хайыңарда куду бадырыптарындан сестир-дир мен. Ынчан силерниң араңарда хөй-ле улустуң ажыын ажып, ыглаар апаар мен, чүге дээрге олар ооң мурнунда үүлгедип чораан бачыттарын: чүдек-бужар самыыраар чоруун болгаш туттунмас туралаашкынын ^v олчаан билинмээннер-дир.