2Cor 4 | TyvTUV | STEP | Ынчангаш бис – Бурганның шак ындыг бараан болуушкунну Бодунуң өршээлдии-биле хүлээндирип каан улузу, сорук-күжүвүс кошкаш дивес бис.

‏ 2 Corinthians 4

Дой саваларда эртине-байлак

1 Ынчангаш бис – Бурганның шак ындыг бараан болуушкунну ^a Бодунуң өршээлдии-биле хүлээндирип каан улузу, сорук-күжүвүс кошкаш дивес бис. 2 Ынчанмайн канчаар, ыянчыг боорга, чажырар ажыл-херектен ойталаан болгай бис; кажарлавайн база Бурганның Медээзин хажытпайн турар болгай бис ^b. Харын алыс шынны ажыы-биле медеглеп, Бурганның мурнунга боттарывысты бүгү улустуң арын-нүүрүнге хүлээдип турар бис. 3 Бистиң медеглеп турарывыс Буянныг Медээ кандыг-бир кижиге дуглалдыр шыптына берген-даа болза ^c, ол чүгле өлүм-чидимниң оруу-биле чоруп орар улуска ^d дуглаглыг боор. 4 Амгы бо делегейниң «бурганы» – эрлик ^e шак ол бүзүревээн улустуң угаан-бодалын чүве эскербес кылып каарга, олар Христостуң Буянныг Медээзиниң чайынналчак чырыын көрбес-тирлер, а Христос – Бурганның ^{▼▼ Өске бурунгу сөзүглелдерде «Бурганның» деп сөске «көзүлбес» деп сөстү немээн.} овур-хевири болгай ^g. 5 Боттарывысты алдаржыдар дээш суртаалдавайн турар болгай бис, харын Иисус Христос – Дээргивис дээрзин, а бис – Иисус дээш, силерниң чалчаларыңар бис дээрзин ^h суртаалдап турар болгай бис. 6 «Дүмбейден чырык чырып келзин» ⁱ – деп чугаалаан Бурган чүректеривиске чайынналдыр чырый бергеш, алдарлыг Бодунуң дугайында билигни биске Иисус Христостуң арнындан көргүскен.

7 А ол билигниң эртине-байлаа бисте – бөдүүн дой савалар дег улуста шыгжаттынган-дыр ^j. Ындыг болганывыста, шак ол дээди күштүң бистен эвес, а Бургандан кээп турары илдең-дир ^k. 8 Бисти чүк бүрүзүнден аар-бергелер кызагдап турар ^l, ынчалза-даа бастыртып албаан бис. Аай-бажын тыппастай бээр бис, ынчалза-даа идегеливис ышкындырбаан. 9 Бисти истеп-сүрүп турар, ынчалза-даа Бурган бисти кагбаан ^m. Доңгайтыр шаптырып аар бис, ынчалза-даа узуткаттырбаан бис. 10 Иисустуң амыдыралы бистиң мага-бодувуска илереп келзин дээш, Ооң өлүмүн мага-боттарывыска үргүлчү ап чоруур бис ⁿ. 11 Иисустуң амыдыралы база өлүмнүг мага-бодувуска бодун илеретсин дээш, бисти – дириг улусту Иисус дээш үргүлчү өлүмге онаап турар ^o. 12 Ындыг болганда, өлүм бодунуң салдарын биске көргүзерге, мөңге амыдырал бодунуң салдарын силерге көргүзүп турар-дыр.

13 «Мен бүзүрей берген мен, ынчангаш чугаалап турдум» ^p деп, Бижилгеде бижээн. Ындыг бүзүрелди берип турар Сүлде бисте бар болганда, бис база бүзүрей бергеш, чугаалап турарывыс бо. 14 Билир бис: Дээрги Иисусту катап диргискен Бурган бисти база Ооң-биле катай катап диргискеш ^q, силер-биле кады Бодунуң мурнунга тургузуптар. 15 Бистиң ол бүгү хилинчек көргенивис силерге ачылыг салдар көргүзер болгай. Ооң түңнелинде Бурганның авыралы улам-на хөй улусту бүргей ап турар; а оларның өөрүп четтириишкини улам-на хөй куттулуп, Бурганны алдаржыдып турар.

16 Ынчангаш сорук-күжүвүс кошкаш дивес. Харын бистиң мага-бодувус элеп, харыксыраза-даа, сагыш-сеткиливис хүн бүрүзүнде чаартынып орар ^r. 17 Түр када көөр, ажып эртери белен хилинчээвис ^s биске эгээртинмес улуг мөңге алдар эккээр, ол алдар хилинчээвисти хөй катап чая базар. 18 Көрүжүвүс көстүр чүүлче эвес, а көзүлбес чүүлче угланган. Чүге дээрге көстүр чүүл – түр када, а көзүлбес чүүл – мөңге ^t.