‏

Бо чагааны «Бурганның шилип алганы агайга база ооң ажы-төлүнге» (бир христиан ниитилелди база ооң кежигүннерин ойзу адааны ол) чоруткан. Автор, Иоанн элчин, бодун «эң улууңар» деп адап турар, а ол болза ооң эрге-күштүүн, чагаа бижээни христианнары дээш харыысалга чүктеп турарын көргүскен.

Бирги чагаазында дег, Иоанн номчукчуларны алыс шын болгаш ынакшыл ёзугаар амыдыраар кылдыр сургап турар. Ол оон ыңай Иисус Христос чер кырынче ёзулуг кижи мага-боттуг чедип келген деп хүлээвес меге өөредигден кичээнирин дилеп турар.

‏ 2 John

Байыр чедириишкини

1Бурганның шилип алганы агайга база ооң ажы-төлүнге эң улууңардан байыр: шуптуңарга шынап-ла ынакшыдым ^a. Чүгле мен эвес, а алыс шынны билип алган бүгү улус ^b база силерге ынакшыды. 2Ийе, бисти бүргеп турар шынның ачызында силерге ынак-тыр бис. Ол шын бистиң-биле кезээ мөңгеде тудуш харылзаалыг. 3Алыс шын болгаш ынакшылдың аайы-биле Бурган Ададан, Ооң Оглу Иисус Христостан келген авырал, өршээл болгаш амыр-тайбың ^c биске доктаар! ▼

▼ Өске бурунгу сөзүглелдерде «Ооң Оглу Дээрги Иисус Христостан келген авырал, өршээл болгаш амыр-тайбың силерге доктаазын!» деп бижээн.

Ынакшылче база алыс шын өөредигже чүткүңер

4Адавыстың биске чагааны дег, алыс шынның изин истээн чамдык ажы-төлүң дугайында дыңнап кааш, мен аажок өөрүдүм ^e. 5Ынчангаш мен ам дилеп тур мен, хүндүлүг агай: бот-боттарывыска ынак болуулуңар! (Ол чагыг чаа эвес, а биске эң эгезинде-ле берип каан чагыг хевээр боор) ^f. 6А ол ынакшыл дээрге-ле Адавыстың чагыгларын ёзугаар амыдыраар ужурлувуус деп билзе чогуур ^g. Эң эгезинде-ле дыңнааныңар дег, ол чагыгның утказы мындыг: араңарда ынакшылдыг амыдыраар ужурлуг силер.

7Иисус Христос чер кырынче кижи мага-боттуг чедип келген дээрзин ^h хүлээп көрбес хөй санныг мегечилер бо делегейде чоруп турар. Олар дег кижи бүрүзү мегечи-дир база Христостуң удурланыкчызы-дыр ⁱ. 8Ынчаарга кызып ажылдап келгенивис чүүлдү чидирбейн, харын бүрүн шаңналды алырыңар дээш ^j кичээнип көрүңер. 9Христостуң дугайында алыс шын өөредигден тайзы базып, өскээр барган кижиниң Бурган-биле харылзаазы чок. А ол өөредигге шынчы болуп арткан кижиде Ада-биле-даа, Оглу-биле-даа сырый харылзаа бар ^k. 10Силерге чедип келген кандыг-бир кижи ол өөредигни суртаалдаары-биле ап чорбас болза, силер ону бажыңыңарга хүлээп албаңар база амыр-мендизин айтырбаңар ^l. 11Чүге дээрге ындыг кижиниң амыр-мендизин айтырар болзуңарза, ооң бузуттуг үүлгедиглериниң киржикчизи апаар силер.

Түңнел байыр чедириишкини

12Силерге бижип, чугаалаар бодаан чүвем оон-даа хөй, ынчалза-даа ону демир-үжүк-биле саазынга бижиир хөңнүм чок болду. Ооң орнунга, бистиң өөрүшкүвүс ▼

▼ Өске бурунгу сөзүглелдерде «Силерниң өөрүшкүңер» деп бижээн.

эгээртинмес долу болзун дээш ⁿ, удавайн силерге дужуп, арын көржүп чугаалажыр сагыштыг мен ^o. 13Бурган шилээн угбаңның ажы-төлү сеңээ байыр чедирип турлар ▼

▼ Өске бурунгу сөзүглелдерде бо сөстерге «Аминь» деп сөстү немээн.

.