2Ki 11 | TyvTUV | STEP | Охозияның авазы Гофолия оглунуң өлүп калганын дыңнааш , ол дораан хаан уктуг бүгү улусту узуткап каапкан .

‏ 2 Kings 11

Гофолия болгаш Иоас

(2 Чыл. 22:10—23:21)

1 Охозияның авазы Гофолия ^a оглунуң өлүп калганын дыңнааш ^b, ол дораан хаан уктуг бүгү улусту узуткап каапкан ^c. 2 Ынчалза-даа Иорам хаанның уруу, Охозияның дуңмазы Иосавет Охозияның оглу Иоасты өлүртүр ужурлуг турган тажылар аразындан бүдүү аппарган. Иосавет оолду база ону эмзирип турган херээженни удуур өрээлге чажырып каан. Иоасты Гофолиядан ынчаар чажырып каарга, оол өлүртпейн барган. 3 Гофолия чуртту чагырып турган үеде оол эмзирикчизи-биле кады Дээрги-Чаяакчының өргээзинге алды чыл чаштынып турган.

4 Гофолияның чагыргазының чедиги чылында Иодай бараалгакчы кари уктуг таңныылдар биле камгалакчы шериглерниң чүс шериг баштыңнарынче улус айбылап чоруткаш, оларны бодунче, Дээрги-Чаяакчының өргээзинче чалап алган. Ол баштыңнар-биле дугуржулга кылып, Дээрги-Чаяакчының өргээзинге оларның даңгыраан алгаш, хаанның оглун оларга көргүскен. 5 Иодай оларга дужаал берген: «Силер мынчаар кылыр ужурлуг силер. Үш кезекке үстүп алыңар – амыр-дыш хүнүнде албан-ажыл эрттирип турар ^d силерниң үштүң бир кезииңер хаанның ордузунуң мурнунга таңныылдазын, 6 өске үштүң бир кезииңер Сур хаалганың чанынга турзун, а арткан үштүң бир кезииңер Ахар-Харацим хаалгага турзун, ордуну ээлчеглежип камгалаңар. 7 Ол ышкаш амыр-дыш хүнүнде албан-ажылындан халажыр ужурлуг ийи кезекке хамааржыр улус Дээрги-Чаяакчының өргээзин таңныылдап, хаанны камгалап артып калыңар. 8 Хаанны долгандыр ок-чепсектиг туруп алгаш, өргээниң девискээринче ^{▼▼ Азы: «Силерниң одурууңарже».} чоокшулап келген кижи бүрүзүн өлүрүп турар силер. Хаан кайнаар-даа баар болза, ооң чанынга чоруп туруңар».

9 Чүс шериг баштыңнары Иодай бараалгакчының дужаалын күүсеткен. Баштың бүрүзү бодунуң улузун – амыр-дыш хүнүнде ажыл-албанынче үнүп турар-даа, ажыл-албанындан халажып чоруп турар-даа улусту – эдертип алгаш, Иодай бараалгакчыга чедип келген. 10 Чүс шериг баштыңнарынга Иодай Давид хаанга хамааржыр, Дээрги-Чаяакчының өргээзинге шыгжаттынып турган чыдаларны, дозуг-камгалалдарны үлеп берген ^f. 11 Камгалакчы шериглер ок-чепсээн холунга туткаш, хаанны долгандыр – Бурганның өргээзиниң оң талазындан солагай талазынга чедир, өргүл салыр бедигээш биле өргээни дескиндир туруп алганнар. 12 Иодай Иоас тажыны үндүре бергеш, аңаа оваадай кедирип, ыдыктыг хоойлунуң хоолгазын ^g берип каан ^{▼▼ Азы: «Каасталгалар-биле каастап каан».}. Оон тажыны хаан кылдыр чарлап, олива үзү-биле чаап каарга, чыылган чон: «Хаан делгерезин!» – деп алгыржып, адыш часкап турган ⁱ.

13 Шериглер биле чоннуң алгы-кышкызын дыңнап кааш, Гофолия Дээрги-Чаяакчының өргээзиниң мурнунда турар чонче чорупкан. 14 Ол топтап көөрге, чаңчыл ёзугаар хаан турар черде – өргээниң адагажының чанында ^j – хаан бо турган! Ооң чанында шериг баштыңнары, трубалар этсир улус бар болган, а чурттуң бүгү чону өөрүп-байырлап, трубалар этсип турган. Гофолия кеткен хевин качыгдалдан ора тыртып: «Сүлчээ! Сүлчээ!» – деп алгыра берген.

15 Иодай бараалгакчы шеригни башкарып турган чүс шериг баштыңнарынга дужаал берип: «Ону өргээниң девискээринден ^{▼▼ Азы: «Одуруглай чыскаалган шериглер аразы-биле».} үндүре бергеш, эдерип чорупкан кижи бүрүзүн хылыш-биле шанчып өлүрүп калыңар. Чүгле Дээрги-Чаяакчының өргээзинге ону өлүрүп болбас» – дээн.

16 Гофолияны сегирип алганнар; кадын хаанның ордузунче аъттар кирер черге ^l чедип келгеш, аңаа өлүртүп алган.

17 А Иодай Дээрги-Чаяакчы биле хаанның, чоннуң аразынга, ол чон Дээрги-Чаяакчыга хамааржыр чон боор дугайында, керээ чарган. Оон ыңай хаан биле чоннуң аразынга керээ чарган. 18 Чурттуң бүгү чону Ваалдың өргээзинче баргаш, ону үреп бузуп каапкан ^m. Улус өргүл салыр бедигээштерни база Ваалдың дүрзүлерин бүрүнү-биле чуура шаап, өргүл бедигээжиниң мурнунга Ваалдың бараалгакчызы Маттанны өлүрүп каан.

Оон Иодай бараалгакчы Дээрги-Чаяакчының өргээзи дээш сагыш салыр кылдыр улус тургузуп каан. 19 Иодай чүс шериг баштыңнарын, кари уктуг таңныылдарны, камгалакчы шериглерни болгаш чурттуң бүгү чонун эдертип аарга, олар шупту хаанны Дээрги-Чаяакчының өргээзинден кады үндүре бергеш, Харацим хаалгазын дамчыштыр ордуже кирип келген. Иоас дүжүлгеде бодунуң саадаар черин ээлепкен. 20 Чурттуң бүгү чону өөрүп-хөглеп турган, а хоорайжылар, Гофолияны хаанның ордузунга хылыш-биле шанчып каан соонда, оожургай берген. 21 Иоас хааннап эгелээрде, чеди харлыг турган.