‏ 2 Kings 13

Иоахаз – Израильдиң хааны

1Охозияның оглу, Иудеяның хааны Иоастың чагыргазының чээрби үшкү чылында Иехунуң оглу Иоахаз Израильдиң хааны апаргаш ^a, чуртту ооң найысылалы Самарияга он чеди чыл чагырган. 2Ол Дээрги-Чаяакчының мурнунга бузут үүлгедип, Наваттың оглу Иеровоамның – Израильди бачытче киирген хаанның бачыттарын өттүндүр кылып, олардан ойталаваан ^b. 3Дээрги-Чаяакчының килеңи израильчилерже кыптыгып ^c, оларны үргүлчү арамей хаан Азаилдиң, ооң оглу Венададтың холунга хүлээдип берип турган ^d.

4Иоахаз Дээрги-Чаяакчыдан дуза дилеп чаннырга, Ол ону дыңнап каан, чүге дээрге арамей хаанның Израильди кайы хире кызагдап турарын көрүп турган ^e. 5Дээрги-Чаяакчы Израильге камгалакчы тургузуп бээрге ^f, чурт арамейлерниң холундан адырлы берген. Израильчилер боттарының аалдарынга биеэде ышкаш амыр-тайбың чурттап эгелээн. 6Ындыг-даа болза, олар Израильди бачытче киирген Иеровоамның салгалдарының бүгү бачыттарындан ойталавайн, оларны үүлгедирин уламчылааннар. Самарияга Ашера бурганга тураскааткан адагаш хевээр турган ^g.

7Иоахазтың аг-шериинден бежен аъттыг шеригжи, он дайынчы терге болгаш 10 000 чадаг шеригжиден аңгыда, кым-даа, чүү-даа артпаан, чүге дээрге арамей хаан ол аг-шеригни кыргып-хыдып, бастырган тараа дег кылып каан.

8Иоахазтың өске ажыл-херектери, ооң кылган бүгү чүвези, өндүр улуг чоруктары Израильдиң хааннарының чылдар бижилгезинде тодараттынып бижиттинген. 9Иоахаз өгбелериниң соондан өске оранче чоруй баарга, ону Самарияга ажаап каан. Ооң оглу ачазының орнунга хаан апарган.

Иехоаш – Израильдиң хааны

10Иудеяның хааны Иоастың чагыргазының үжен чедиги чылында Иоахазтың оглу Иехоаш Израильдиң хааны апаргаш, чуртту ооң найысылалы Самарияга он алды чыл чагырган. 11Ол Дээрги-Чаяакчының мурнунга бузут үүлгедип, Наваттың оглу Иеровоамның – Израильди бачытче киирген хаанның бүгү бачыттарындан ойталавайн, оларны үүлгедирин уламчылаан ^h.

12Иехоаштың өске ажыл-херектери, ооң кылган бүгү чүвези, өндүр улуг чоруктары, Иудеяның хааны Амасия-биле канчаар чаалажып чорааны Израильдиң хааннарының чылдар бижилгезинде тодараттынып бижиттинген ⁱ. 13Иехоаш өгбелериниң соондан өске оранче чоруй баарга, дүжүлгеге ону Иеровоам солаан. Иехоашты Самарияга, Израильдиң чок апарган хааннарының чанынга ажаап каан.

Элисейниң өлүмү

14Элисей аарый берген. (Медээчи сөөлүнде ол аарыындан өлүп калган.) Израильдиң хааны Иехоаш аңаа ужуражып келгеш, ол дээш ыглап: «Ачай! Ачай! Силер Израильдиң дайынчы тергелерлиг, аъттарлыг аг-шерии дег турган силер!» – деп кыйгырып турган ^j.

15Элисей: «Ча-согундан ап ал» – дээн.

Иехоаш ча-согун эккелген. 16Медээчи хаанга: «Ча-согунну тудуп ал» – дээн.

Демгизи ча-согунну тудуп аарга, Элисей холдарын хаанның холдарынга дегзип алган.

17Медээчи: «Чөөн чүкче көрүнген соңганы ажыдывыт!» – дээрге, хаан ажыдыпкан.

Элисей: «Адывыт!» – дээн.

Иехоаш адыптарга, медээчи: «Дээрги-Чаяакчының тиилелгезиниң согуну, арамей чонну тиилээр согун бо-дур! Арамейлерни сен Афекке ^k бүрүнү-биле чылча шавар сен» – дээн.

18Оон Элисей: «Согуннарны ап ал» – дээн.

Хаан согуннарны тудуп аарга, медээчи аңаа: «Олар-биле черни хап-соп көрем» – дээн.

Хаан үш катап хап-сопкаш, соксап каан. 19Бурганның кижизи аңаа килеңнеп: «Черни беш азы алды катап сопкан болзуңза, арамей күрүнени бүрүнү-биле узуткап каар ийик сен. Ам ону чүгле үш катап чылча шавар-дыр сен» – дээн. 20Элисей өлүп каарга, ону ажаап каан.

Чылдың-на чазын Моавтан дээрбечи бөлүктер чуртче халдап чаңчыга берген чүве-дир. 21Бир катап мөчээн кижи ажаап турган израильчилер дээрбечи бөлүк көрүп кааш, ол кижини Элисейниң чевег-куюнче далаштыг октапканнар. Мөчү-сөөк Элисейниң сөөгүнге дээптери билек, өлүг кижи дирилгеш, бут кырынга туруп келген.

Израильдиң арамей күрүне-биле чаалашканы

22Арамей хаан Азаил Иоахазтың чагырган бүгү үезинде Израильди кызып-кыйып турган ^l. 23Ынчалза-даа Дээрги-Чаяакчы израиль чонга ээ-хайыралыг болуп, оларны кээргеп, Авраам, Исаак болгаш Иаков олар-биле чарган чагыг-керээзин бодааш, израильчилерже сагыш салып турган. Дээрги-Чаяакчы амдыгаа чедир оларны узуткап каарын, Бодунуң мурнундан сывырып чорудуптарын күзевейн турар.

24Арамей хаан Азаил өлүп каарга, ооң оглу Венадад ачазының орнунга хаан апарган. 25Иоахазтың оглу Иехоаш Азаилдиң оглу Венададтың бодунуң ачазындан чаалап алган хоорайларын дедир чаалап алган. Иехоаш Венададты үш катап чылча шаап ^m, Израильдиң хоорайларын эгидип ап турган.