2Ki 14 | TyvTUV | STEP | Израильдиң хааны, Иоахазтың оглу Иехоаштың чагыргазының ийиги чылында Иудеяның хааны Иоастың оглу Амасия хаан апарган .

‏ 2 Kings 14

Амасия – Иудеяның хааны

(2 Чыл. 25:1-4, 17-24)

1 Израильдиң хааны, Иоахазтың оглу Иехоаштың чагыргазының ийиги чылында Иудеяның хааны Иоастың оглу Амасия хаан апарган ^a. 2 Ол чээрби беш харлыында хааннап эгелээш, чуртту Иерусалимге чээрби тос чыл чагырган. Ооң авазын Иегоаддин дээр турган, Иерусалим чурттуг херээжен чүве-дир.

3 Амасия Дээрги-Чаяакчыга таарымчалыг чүве кылып турган, ындыг-даа болза, ооң өгбези Давид ышкаш хире хөйнү кылбаан. Ол бүгү чүвени бодунуң ачазы Иоас ышкаш кылып турган. 4 Чүгле мөгейиишкин кылыр бедик черлер узуткаттынмаан ^b. Чон аңаа өргүлдер салырын, чаагай чыттыг чүүлдер кыпсырын соксатпаан.

5 Кажан Амасияның холунда эрге-чагырга быжыга бээрге, ол бодунуң хаан ачазын өлүрген дүжүметтерни шаажылап каан ^c. 6 Ынчалза-даа өлүрүкчүлерниң ажы-төлүн Амасия өлүрбээн. Чүге дээрге Дээрги-Чаяакчы Моисейни дамчыштыр айтып-чагааны дүрүм-хоойлу номунда: «Ада кижи ажы-төлүнүң кем-буруузу дээш өлүмге онаар кеземче албас ужурлуг, ажы-төл база адазы дээш өлүртпес ужурлуг; кижи бүрүзү чүгле бодунуң кем-буруузу дээш өлүр ужурлуг» – деп дужааган чүве-дир ^d.

7 Амасия Дус шынаазынга ^e 10 000 эдом шеригни чылча шапкаш, Села хоорайны ^f чаалап алгаш, аңаа Иокфеил деп ат тывыскан ^g, ол черни амдыгаа чедир ынчаар адап турар.

8 Амасия Иехунуң оглунуң оглу, Иоахазтың оглу, Израильдиң хааны Иехоашче элчилер ыдып: «Арыннарывыс удур-дедир көржүп ужуражыылы!» – деп чөңгээлиг сөс дамчыткан.

9 А Израильдиң хааны Иехоаш Иудеяның хааны Амасияга мынча деп харыылаан ^h: «Ливан сынында бир-ле тенниг үнүш пөш ыяшка: „Урууңну мээң оглумга кадай кылдыр бер“– деп сөглеткен. А оон Ливан сынының черлик аң-меңи келгеш, тенниг үнүштү таптап каапкан. 10 Ийе, сен Эдомну чылча шаап кагдың, ам ол дээш менээргенип турар-дыр сен. Тиилелгең дээш мактан, ынчалза-даа аал-чуртуңга артып кал! Бодуңга айыыл-халап дилеве, оон башка буураар сен, Иудея база сээң-биле кады узуткаттырар!»

11 Ынчалза-даа Амасия сагындырыгны тоовайн баарга, Израильдиң хааны Иехоаш аңаа удур үнүп келген. Иехоаш биле Иудеяның хааны Амасия Иудеяда Бет-Шемеш деп черге ⁱ удур-дедир көржүп ужурашкан. 12 Иудея Израильге чылча шаптырып алган, бүгү иудейлер аалдарынче тарай маңнажы берген.

13 Израильдиң хааны Иехоаш Иудеяның хааны, Охозияның оглунуң оглу, Иоастың оглу Амасияны Бет-Шемештиң чанынга тудуп алган. Оон ол Иерусалимче чорупкаш, хоорайның ханазын – Эфрем хаалгазындан эгелээш, Азыгда хаалгага чедир ^j – 400 кыры дурту черни үрегдеп каапкан. 14 Иехоаш Дээрги-Чаяакчының өргээзинден база хаанның ордузунуң эртине шыгжамырларындан тывылган шупту алдын-мөңгүннү, шупту саваларны алгаш барган ^k. Оон ыңай ол долаа кылдыр улус тудуп алгаш, Самарияже ээп келген.

15 Иехоаштың өске ажыл-херектери, ооң кылган чүвези, өндүр улуг чоруктары, Иудеяның хааны Амасия-биле ооң канчаар чаалажып турганы Израильдиң хааннарының чылдар бижилгезинде тодараттынып бижиттинген ^l. 16 Иехоаш өгбелериниң соондан өске оранче чоруй баарга, ону Самарияга, Израильдиң чок апарган хааннарының чанынга ажаап каан. Ооң оглу Иеровоам ачазының орнунга хаан апарган.

Амасияның өлгени

(2 Чыл. 25:25-28)

17 Израильдиң хааны, Иоахазтың оглу Иехоаштың өлгениниң соонда, Иудеяның хааны, Иоастың оглу Амасия он беш чыл чурттаан. 18 Амасияның өске ажыл-херектери Иудеяның хааннарының чылдар бижилгезинде тодараттынып бижиттинген. 19 Иерусалимге аңаа удур сүлчээ кылырга, ол Лахис хоорайже ^m дезе берген. Ынчалза-даа дайзыннары ооң соондан Лахисче улус ыдыпкаш, ону аңаа өлүрүп каан. 20 Амасияның мөчү-сөөгүн Иерусалимче аъттарга дедир чүдүрүп эккелгеш, ооң ада-өгбезиниң чанынга, Давидтиң Хоорайынга ажаап каан.

21 Оон Иудеяның бүгү чону Амасияның он алды харлыг оглу Азарияны ^{▼▼ Бо хаанның адын Чылдар демдеглелиниң ийиги номунда, Исайя медээчиниң номунда болгаш бо номнуң чамдык шүлүктеринде Озия деп база бижип турар.} ачазының орнунга хаан кылып алган. 22 Амасия өгбелериниң соондан өске оранче чоруй барган соонда, Азария Эйлат өртээлди ^o Иудеяга дедир эгидип алгаш, ону быжыглап тудуп каан.

Иеровоам II – Израильдиң хааны

23 Иудеяның хааны, Иоастың оглу Амасияның чагыргазының он бешки чылында Израильдиң хааны Иехоаштың оглу Иеровоам хаан апаргаш, чуртту найысылалы Самарияга дөртен бир чыл чагырган. 24 Ол Дээрги-Чаяакчының мурнунга бузут үүлгедип, Наваттың оглу Иеровоамның – Израильди бачытче киирген хаанның бүгү бачыттарындан ойталаваан ^p.

25 Иеровоам Израильдиң кызыгаарын Лево-Хаматтан эгелээш ^q, Дус далайга чедир катап тургускан. Израильдиң Бурганы Дээрги-Чаяакчы Бодунуң Гат-Хефер ^r чурттуг чалчазы, Амиттайниң оглу Ионаны ^s дамчыштыр чугаалаан сөзүн ынчалдыр күүсеткен. 26 Чүге дээрге Израильде бүгү улустуң – кул-даа, хостуг-даа ^{▼▼ Азы: «Аныяк-даа, улуг-даа».} улустуң улуг хилинчекке алысканын ^u, оларга дузалаптар кижи чогун Дээрги-Чаяакчы көрүп турган ^v. 27 Ол Израильдиң адын чырык черге турбас кылдыр балап каарын чугаалаваан болгаш, чонну Иехоаштың оглу Иеровоамның холу-биле камгалап каан.

28 Иеровоамның өске ажыл-херектери, ооң кылган бүгү чүвези, өндүр улуг чоруктары, ооң канчаар чаалажып турганы, Иудеяга хамааржыр апарган турган Дамаск биле Хаматты ^w Израильге канчаар эгиткени Израильдиң хааннарының чылдар бижилгезинде тодараттынып бижиттинген. 29 Иеровоам өгбелериниң – Израильдиң хааннарының соондан өске оранче чоруй барган. Ооң оглу Захария ачазының орнунга хаан апарган.