2Ki 16 | TyvTUV | STEP | Ремалияның оглу Факейниң чагыргазының он чедиги чылында Иудеяның хааны Иоафамның оглу Ахаз хаан апарган.

‏ 2 Kings 16

Ахаз – Иудеяның хааны

(2 Чыл. 28:1-27)

1 Ремалияның оглу Факейниң чагыргазының он чедиги чылында Иудеяның хааны Иоафамның оглу Ахаз хаан апарган. 2 Ол чээрби харлыында хааннап эгелээш, чуртту Иерусалимге он алды чыл чагырган. Ахаз бодунуң Бурганы Дээрги-Чаяакчының мурнунга, бодунуң өгбези Давид-биле деңнээрге, таарымчалыг чүүлдер кылбайн турган. 3 Ол Израильдиң хааннарының оруун эдерип ^a, Дээрги-Чаяакчының израильчилерниң мурнундан үндүр сывырыпканы чоннарның чүдек-бужар чаңчылдарын өттүнүп, оглун безин от өттүр эрттирген ^b. 4 Ахаз мөгейиишкин кылыр бедик черлерге, тейлер бажынга болгаш саглагар ыяштың-на адаанга ^c өргүлдер салып, айдызап турган.

5 Ынчан арамей хаан Рецин болгаш Ремалияның оглу, Израильдиң хааны Факей олар Иерусалимге удур чаалажып үнгеш ^d, Ахазты бүзээлеп алганнар, ынчалза-даа тиилеп шыдавааннар. 6 Ол үеде арамей хаан Рецин Эйлат өртээлди эгидип ап ^e, иудейлерни оон үндүр сывырыпкан. Эйлатка арамей чон ^{▼▼ Өске бурунгу сөзүглелде «арамей чон» эвес, а «эдом чон» деп бижээн.} чурттай берген, олар ында амдыгаа чедир чурттап турар.

7 Ахаз Ассирияның хааны Тиглат-Пилесерже ^g элчиннер ыдып: «Мен – силерниң чалчаңар-дыр мен. Силерниң оглуңар дег-дир мен. Чедип келгеш, менче халдаан арамей болгаш израиль хааннардан мени камгалап көрүңерем» – деп сөглеткен.

8 Ахаз Дээрги-Чаяакчының өргээзинден болгаш хаанның ордузунуң эртине шыгжамырындан тывылган алдын-мөңгүннү алгаш, Ассирияның хаанынче хээли белээ кылдыр чорудупкан ^h. 9 Ол хаан ооң дилээн күүседип, Дамаскыже халдааш, эжелеп алган. Хоорайның чурттакчыларын хаан Кир деп черже ⁱ тудуп алгаш барган, а Рецинни өлүрүп каан. 10 Ынчан Ахаз хаан Ассирияның хааны Тиглат-Пилесер-биле ужуражыр дээш, Дамаскыже чорупкан. Дамаскыга ол өргүл салыр бедигээш көрүп кааш, Бурганның бараалгакчызы Урияже ^j өргүл бедигээжиниң чуруун болгаш ооң тургузуунуң тодаргай шыйыын чорудупкан. 11 Урия бараалгакчы Ахаз хаанның Дамаскыдан чорудупкан үлегерин ёзугаар өргүл бедигээжин тудуп каан. Ол ону Ахаз хаанның Дамаскыдан ээп кээриниң бетинде тудуп четтигипкен.

12 Хаан Дамаскыдан ээп келгеш, өргүл бедигээжин топтап көргеш, чоокшулап кээп, өргүлүн эккеп салган. 13 Ол бүрүн өрттедир өргүлдерин, далган-тараа өргүлдерин өрттеткеш, арага өргүлүн чашкаш, бедигээшче эп-найырал өргүлүнүң малдарының ханын төккен. 14 Дээрги-Чаяакчының мурнунга турган өргүл салыр хүлер бедигээшти ^k хаан Бурганның өргээзиниң мурнунда – чаа өргүл бедигээжи биле өргээниң аразында – туружундан көжүрүп, чаа бедигээштиң соңгу талазынга тургузуп каан. 15 Ахаз оон Бурганның бараалгакчызы Урияга: «Чаа улуг өргүл бедигээжинге эртенги бүрүн өрттедир өргүлдерни, кежээки далган-тараа өргүлдерин ^l, хаанның бүрүн өрттедир болгаш далган-тараа өргүлдерин, чурттуң бүгү чонунуң бүрүн өрттедир болгаш далган-тараа өргүлдерин база арага өргүлдерин эккеп сал. Бо өргүл бедигээжинче бүрүн өрттедир өргүл малының база өске-даа өргүл малының ханын төндүр төвүт. А хүлер өргүл бедигээжин мен Бурганның күзел-соруун айтырары-биле ажыглаар мен» ^{▼▼ Бо домактың утказы эки билдинмес. Болгу дег өске утказы мындыг: «Хүлер бедигээжин канчаарын мен ам-даа бодап көөр мен».} – деп дужааган.

16 Бурганның бараалгакчызы Урия бүгү чүвени Ахаз хаанның дужааганын ёзугаар кылган. 17 Ахаз хаан өргээде тергежигештерни адырып каапкан ⁿ. Ол «далай» дээр чунар саваны ону тудуп турган хүлер бугалардан дүжүргеш ^o, даш тавак кырынга салып каан. 18 Өргээде тудуп каан амыр-дыш хүнүнде ажыглаар өдүгнү болгаш хаанга хамааржыр даштыкы кирер черни Ахаз Дээрги-Чаяакчының өргээзинден ап каапкан. Ол ону Ассирияның хааны дээш ынчаар кылган ^p.

19 Ахазтың өске ажыл-херектери, ооң кылган чүвези Иудеяның хааннарының чылдар бижилгезинде тодараттынып бижиттинген. 20 Ахаз өгбелериниң соондан өске оранче чоруй баарга, ону оларның чанынга, Давидтиң Хоорайынга ажаап каан. Ооң оглу Эзекия ачазының орнунга хаан апарган.