2Ki 17 | TyvTUV | STEP | Иудеяның хааны Ахазтың чагыргазының он ийиги чылында Иланың оглу Осия Израильдиң хааны апаргаш , чуртту найысылалы Самарияга тос чыл чагырган.

‏ 2 Kings 17

Осия – Израильдиң сөөлгү хааны

1 Иудеяның хааны Ахазтың чагыргазының он ийиги чылында Иланың оглу Осия Израильдиң хааны апаргаш ^a, чуртту найысылалы Самарияга тос чыл чагырган. 2 Ол Дээрги-Чаяакчының мурнунга бузут үүлгедип турган, ынчалза-даа Израильдиң ооң мурнундагы хааннары ышкаш хөй бузут үүлгетпээн.

3 – 4 Осия Ассирияның хааны Салманассарга чагыртып, аңаа чылдың-на албан-үндүт төлеп турган. Оон Салманассар Осияның өскерликчи чоруун эскерип каан – Осия Египеттиң хааны Соже ^{▼▼ Азы: «Со хоорайда Египеттиң хаанынче».} элчилер ыдып, ооң мурнунда төлеп турган албан-үндүдүн төлевестей берген. Ынчангаш Салманассар Израильге удур чаалажып үнүпкеш, Осия хаанны тудуп алгаш, кара-бажыңга суп каан ^c.

5 Ассирияның хааны бүгү чуртка удур чаалажып үнгеш, Самарияже халдааш, ону үш чыл бүзээлээн ^d. 6 Осияның чагыргазының тоску чылында Салманассар Самарияны эжелеп ап, израильчилерни Ассирияже тудуп аппаргаш, оларны Халахка, Хавор хем чанында Гозанга болгаш Мидияның хоорайларынга чурттадып каан ^e.

Израиль чүге туттуруушкунга таварышканыл

7 Оларны Египеттен үндүре берген, ук чурттуң хааны фараоннуң холундан адырып каан боттарының Бурганы Дээрги-Чаяакчыга ^f удур израильчилер бачыт үүлгеткен. Олар өске бурганнарга мөгейип, 8 бүгү чүвени Дээрги-Чаяакчының оларның мурнундан үндүр сывырыпканы чоннарның чаңчылдарын ёзугаар ^g, Израильдиң хааннарын өттүнүп кылып турган.

9 Израильчилер боттарының Бурганы Дээрги-Чаяакчыга таарымчалыг эвес чүүлдерни чажыды-биле кылып турган. Олар бүгү хоорай-суурларынга – быжыглалдыг улуг хоорайларга-даа, ында чүгле чаңгыс таңныылдаар суурга турар черлерге-даа ^h мөгейиишкин кылыр бедик черлер тудуп алганнар. 10 Бедик тей бүрүзүнге база саглагар ыяш адаанга-ла даш көжээлер болгаш Ашера бурганга тураскааткан адагаштар тургузуп алганнар ⁱ. 11 Мөгейиишкин кылыр бүгү бедик черлерге израильчилер, Дээрги-Чаяакчының оларның мурнундан үндүр сывырыпканы чоннар дег, чаагай чыттыг өргүлдер кылып турган. Олар бузут-бактыг херектер кылып, Дээрги-Чаяакчының килеңин кыптыктырып турган. 12 Дээрги-Чаяакчы: «Ынчанмаңар!» – деп чугаалап турда-ла, олар дүрзү-бурганнарга мөгейип турган ^j.

13 Дээрги-Чаяакчы Израиль биле Иудеяны Бодунуң өттүр көөр бүгү медээчилерин дамчыштыр: «Бузуттуг оруктарыңардан чайлаңар; ада-өгбеңерге күүседирин дужааганым, Мээң чалча-медээчилеримни дамчыштыр силерже чорудуп бергеним бүгү хоойлум ёзугаар Мээң айтыышкын, дүрүмнеримни сагып, күүседиңер» – деп сагындырып турган ^k.

14 Ынчалза-даа олар тооп дыңнавааннар, боттарының Бурганы Дээрги-Чаяакчыга бүзүревес ада-өгбезиниң чөрүүзү дег чөрүү болганнар ^l. 15 Олар Дээрги-Чаяакчының дүрүмнерин, Ооң оларның ада-өгбези-биле чарган чагыг-керээзин, Ооң оларга ажыдып турган сагындырыгларын тоовайн барганнар ^m. Олар хоозун дүрзү-бурганнарны эдерип, боттары база хоозун куруг апарганнар ⁿ. Дээрги-Чаяакчы израильчилерге оларны долгандыр чурттап турар чоннарның кылып турар чүүлдерин кылырын хоруп каан-даа болза ^o, олар ол чоннарны өттүнүп чурттап турганнар. 16 Олар боттарының Бурганы Дээрги-Чаяакчының бүгү айтыышкыннарындан ойталап, боттарынга бугажык хевирлиг ийи дүрзү-бурган шуткуп алганнар ^p болгаш Ашера бурганга адагаштар тураскаатканнар ^q. Олар сылдыстарның бүгү аг-шериинге мөгейип, Ваал бурганга бараан болуп турганнар ^r. 17 Израильчилер оглу-кызын от өттүр эрттирип ^s, төлгелеп, караң көрнүп, Дээрги-Чаяакчының мурнунга бузут үүлгедири-биле боттарын садып, Ону килеңнедип турган. 18 Дээрги-Чаяакчы Израильге күштүү-биле килеңней бергеш, ооң чонун бодунуң мурнундан сывырыпкан. Иуданың аймаандан аңгыда, өске кым-даа артпаан.

19 Ынчалза-даа Иуданың аймаа безин бодунуң Бурганы Дээрги-Чаяакчының айтыышкыннарын күүсетпейн, Израильдиң киирип каан чаңчылдарын эдерип чурттап турган ^t. 20 Ынчангаш Дээрги-Чаяакчы Иаковтуң бүгү үре-салгалындан ойталаан. Ол израильчилерни кезедип, оларны үптекчилерниң холунга хүлээдип турган ^u, а адак сөөлүнде оларны Бодунуң мурнундан сывырыпкан.

21 Кажан Дээрги-Чаяакчы Израильди Давидтиң салгалындан ушта тыртып кааптарга ^v, израильчилер Наваттың оглу Иеровоамны хаан кылып алган ^w. Иеровоам оларны Дээрги-Чаяакчыдан өскээр аппаргаш, улуг бачытче киирип каан ^x. 22 Израильчилер Иеровоамның кылып турган бүгү бачыттарын өттүнүп, олардан ойталаваан. 23 Адак соонда Дээрги-Чаяакчы израиль чонну Бодунуң бүгү чалча-медээчилерин дамчыштыр сагындырып турганы дег, Бодунуң мурнундан сывырып чорудупкан – израильчилерни боттарының чуртундан Ассирияже тудуп алгаш барган, олар амдыгаа чедир ында чурттап турар.

Самарияның чаа чурттакчылары

24 Ассирияның хааны Вавилон, Кута, Авва, Хамат болгаш Сепарваим деп черлерниң чурттакчыларын көжүрүп эккелгеш, Самарияга чагырткан хоорайларга израильчилерниң орнунга чурттадып каан. Олар Самарияны ээлеп алгаш, ооң хоорайларынга чурттай берген ^y. 25 Олар аңаа чаа-ла чурттап эгелеп тура, Дээрги-Чаяакчыга мөгейбейн турганнар. Ынчангаш Ол оларже арзылаңнар ыдыптарга, араатаннар оларның чамдыызын өлүрүп турган. 26 Ассирияның хаанынга ол дугайында: «Силерниң көжүрүп үндүре бергеш, Самарияга чагырткан хоорайларга чурттадып каан чоннарыңар ол черниң бурганының дүрүмнерин билбес-тир. Ол бурган оларже арзылаңнар ыдыптарга, араатаннар оларны өлүрүп турар-дыр, чүге дээрге олар ук черниң бурганының дүрүмнерин билбес-тир» деп медээ чедирген.

27 Ынчан хаан: «Самариядан тудуп алгаш барганыңар бараалгакчыларның бирээзин ынаар чорудуптуңар. Ол аңаа чурттап, оларны ук черниң бурганының дүрүмнеринге өөредип кагзын» – деп дужааган.

28 Самариядан тудуп алгаш барган бараалгакчыларның бирээзи ээп чанып келгеш, Вефилге ^z чурттап, Дээрги-Чаяакчыга канчаар мөгеерин улуска айтып берип эгелээн.

29 Ынчалза-даа аймак-чон бүрүзү чурттай берген хоорайларынга бодунуң дүрзү-бурганнарын база кылып ап, оларын Самарияның биеэги чурттакчыларының бедик черлерде тудуп кааны өргээлерге тургузуп алган. 30 Вавилоннуң чурттакчылары Сокхот-Бенот дээр, Кутаның чурттакчылары – Нергал дээр, Хаматтың чурттакчылары – Ашима дээр, 31 а аввийлер Нивхаз биле Тартак дээр дүрзү-бурганнар кылып алган. Сепарваимниң чурттакчылары төрээн чериниң бурганнары болур Адрамелех биле Анамелехке өргүл кылдыр боттарының оолдарын өрттедип турган ^aa. 32 Олар ол кадында Дээрги-Чаяакчыга база мөгейип, бедик черлерге бараан болуру-биле боттарының аразындан таварышкан-на улусту томуйлап каарга ^ab, ол бараалгакчылар бедик черлерде өргээлерге өргүл салып, бараан болуп турган. 33 Олар Дээрги-Чаяакчыга мөгейип турганнар, ынчалза-даа боттарын оортан көжүрүп үндүре берген черлерниң чаңчылдарын ёзугаар боттарының бурганнарынга база бараан болуп турганнар ^ac. 34 Амдыгаа чедир олар биеэги чаңчылдарын сагып турарлар. Олар Дээрги-Чаяакчыга шыны-биле мөгейбейн, Ооң Израиль деп ат тывысканы ^ad Иаковтың үре-салгалынга берген дүрүмнер, чаңчылдар, хоойлулар болгаш айтыышкыннарны сагывайн база күүсетпейн турарлар.

35 А Дээрги-Чаяакчы израильчилер-биле чагыг-керээ чарып алгаш, оларга: «Өске бурганнарга чүдүвеңер, оларга мөгейип, бараан болбаңар база өргүлдер кылбаңар ^ae. 36 Силерни египет черден өндүр улуг күжү-биле, күштүг холу-биле үндүре берген Дээрги-Чаяакчыдан коргуп, чүгле Аңаа бараан болуп, өргүлдерден кылыңар ^af. 37 Ооң силерге бижип берген дүрүмнер, чаңчылдар, хоойлулар болгаш айтыышкыннарын кезээде сагып, күүседиңер. Өске бурганнарга мөгейбеңер ^ag. 38 Мээң силер-биле чарган чагыг-керээмни утпаңар, өске бурганнарга мөгейбеңер. 39 Чүгле силерниң Бурганыңар Дээрги-Чаяакчыдан коргуп чоруңар, Ол ынчан силерни бүгү дайзыннарыңарның холундан адырып, камгалаар» – деп дужааган турган болгай.

40 Ынчалза-даа олар Ону тооп дыңнавааннар, боттарының биеэги чаңчылдарын сагып артканнар. 41 Дээрги-Чаяакчыдан коргуп тургаш безин, ол чоннар дүрзү-бурганнарга база бараан болуп турганнар ^ah. Оларның ажы-төлү, ажы-төлүнүң үре-салгалы ада-өгбезиниң кылып турган чүвезин амдыгаа чедир кылып турар.