2Ki 22 | TyvTUV | STEP | Иосия сес харлыында хааннап эгелээш, чуртту Иерусалимге үжен бир чыл чагырган. Ооң авазын Иедида дээр турган, ол

‏ 2 Kings 22

Иосияның Иудеяга хааннап эгелээни

(2 Чыл. 34:1-13)

1 Иосия сес харлыында хааннап эгелээш, чуртту Иерусалимге үжен бир чыл чагырган. Ооң авазын Иедида дээр турган, ол – Боцкат ^a чурттуг Адайяның уруу чүве-дир. 2 Иосия Дээрги-Чаяакчының мурнунга таарымчалыг чүүлдер кылып турган база бодунуң өгбези Давидтиң бүгү оруктарын эдерип, оң-даа, солагай-даа талаже барбаан ^b.

3 Чагыргазының он сески чылында Иосия хаан Мешулламның оглунуң оглу, Ацалияның оглу Шафан бижээчини Дээрги-Чаяакчының өргээзинче айбылап чорудупкан. Хаан мынча дээн: 4 «Бурганның дээди бараалгакчызы Хелкияга четкеш кел, ол Дээрги-Чаяакчының өргээзинче эккелген, хаалгачыларның чондан чыгган акша-мөңгүнүн саназын ^c. 5 Ол акша-мөңгүннү Дээрги-Чаяакчының өргээзинде ажыл башкарып турар харагалзакчыларга берип кагзын, а олар өргээде септелге кылып турар ажылчыннар: 6 бызаңчылар, тудугжулар, дашчыларга төлеп берзин. Олар оон ыңай өргээни септээринге херек ыяш болгаш чонуп каан даштардан садып каап турзун. 7 Оларның холунче дамчыткан акшаны канчаар чарыгдаанын айтырган херээ чок, чүге дээрге оларга бүзүреп болур улус-тур ^d».

Ыдыктыг хоойлу номунуң тывылганы

(2 Чыл. 34:14-28)

8 Дээди бараалгакчы Хелкия Шафан бижээчиге: «Мен Дээрги-Чаяакчының өргээзинден ыдыктыг хоойлунуң дүрүг номун тып алдым» – дээн ^e.

Хелкия номну Шафанга тутсуп бээрге, ол ону номчуп көрген.

9 Ооң соонда Шафан бижээчи хаанга келгеш: «Силерниң чалчаларыңар Дээрги-Чаяакчызының өргээде бар-ла акша-мөңгүннү чыып алгаш, өргээде ажыл башкарып турар харагалзакчыларга дамчыдып бердилер» – деп айыткаан.

10 Оон Шафан бижээчи хаанга: «Хелкия бараалгакчы меңээ бир дүрүг ном берди» – деп дыңнаткаш, ону хаанның мурнунга номчуп берген. 11 Ыдыктыг хоойлунуң номунуң сөстерин дыңнааш, хаан кеткен хевин качыгдалдан ора тыртып каапкан. 12 Ол Хелкия бараалгакчыга, Шафанның оглу Ахикамга ^f, Михейниң оглу Ахборга, Шафан бижээчиге болгаш бодунуң чалчазы Асайяга мынча дээн: 13 «Барып, мээң өмүнээмден база бүгү иудей чоннуң өмүнээзинден бо номнуң сөстериниң дугайында Дээрги-Чаяакчыдан айтырып көрүңер. Ада-өгбевис бо номнуң сөстерин тооп дыңнавайн турган, биске хамаарыштыр бижээн бүгү чүүл ёзугаар кылбайн чораан боорга, Дээрги-Чаяакчының коргунчуг килеңи бисче кыптыккан-дыр ^g».

14 Хелкия бараалгакчы, Ахикам, Ахбор, Шафан болгаш Асайя олар Шаллумнуң өттүр билип медеглээр кадайы Олда-биле чугаалажыр дээш чорупканнар ^h. (Шаллум болза хаанның хевиниң кадагалакчызы кижи чүве-дир. Ол Тикваның оглу турган, а Тиква – Хархастың оглу турган чүве-дир.) Олда Иерусалимниң чаа кезээнге чурттап турган ⁱ. 15 Ол херээжен оларга мынча дээн: «Израильдиң Бурганы Дээрги-Чаяакчы: „Силерни Менче айбылап чорудупкан кижиге 16 Мээң чугаалаан чүвемни дамчыдыңар: Мен бо черже база ооң чурттакчыларынче айыыл-халапты – Иудеяның хаанының номчааны номда бижээн бүгү чүүлдерни ыдарым ол-дур. 17 Менден ойталааны дээш, хары бурганнарга айдызап, боттарының холу-биле кылган бүгү чүүлдери-биле Мени хорадатканы дээш ^j, Мээң килеңим бо черже кыптыккан, ол ам өжүртүнмес“– деп чугаалады.

18 Дээрги-Чаяакчыдан чүве айтырары-биле силерни айбылап чорудупкан Иудеяның хаанынга мону дамчыдыңар: дыңнаан сөстериң дугайында Израильдиң Бурганы Дээрги-Чаяакчы мынча дээн-дир: 19 „Сээң чүрээңниң чымчай бергени дээш, бо черге база ооң чурттакчыларынга удур Дээрги-Чаяакчының чүве чугаалап, олар каргыштыг хоозуралга алзып аар дээнин дыңнааш ^k, Мээң мурнумга бодуңну томаартканың дээш, кеткен хевиңни ора тыртып, Мээң мурнумга ыглап турганың дээш, Мен сени дыңнап кагдым ^l – деп, Дээрги-Чаяакчы медеглээн. – 20 Ынчангаш Мен сени ада-өгбеңге кадып каар мен, чевег-куйга амыр-тайбың ажааттырар сен ^m. Мээң бо черже ыдарым айыыл-халапты сээң карааң көрбес“».

Айбычылар ол харыыны хаанга дамчыдып берген.