2Ki 5 | TyvTUV | STEP | Арамей хаанның шериг баштыңчызы Нееман деп кижи турган . Дээргизи ону улуг кижи деп санап, хүндүлээр турган, чүге дээрге Дээрги-Чаяакчы ону дамчыштыр арамей черге тиилелгени хайырлап турган чүве-дир. Нееман шылгараңгай дайынчы-даа болза, кеш аарыглыг кижи болган .

‏ 2 Kings 5

Нееманның аарыын экирткени

1 Арамей хаанның шериг баштыңчызы Нееман деп кижи турган ^a. Дээргизи ону улуг кижи деп санап, хүндүлээр турган, чүге дээрге Дээрги-Чаяакчы ону дамчыштыр арамей черге тиилелгени хайырлап турган чүве-дир. Нееман шылгараңгай дайынчы-даа болза, кеш аарыглыг кижи болган ^b. 2 Бир катап арамей дайынчы бөлүктер Израильче халдаашкын кылгаш, бичии кыс уруг тудуп эккелген. Ол уруг Нееманның кадайынга бараан болуп эгелээн. 3 Уруг бодунуң дээргизинге: «О, мээң дээргим Бурганның Самарияда медээчизинге баргаш келген болза! Медээчи ооң аарыын адырып кааптар-дыр ийин» – дээн.

4 Нееман бодунуң дээргизинге баргаш, израиль черден келген уругнуң чүнү чугаалаанын дамчыткан.

5 «Баргаш кел харын – деп, арамей хаан чугаалаан. – А мен Израильдиң хаанынга чагаа бижип бээр мен».

Нееман 10 талант мөңгүн, 6000 шекел алдын ^{▼▼ 300 ажыг килограмм мөңгүн, 60 ажыг килограмм алдын.} болгаш 10 солуп кедер хеп ап алгаш, чорупкан. 6 Ол Израильдиң хаанынга «Бо чагаа-биле кады сенче мээң дүжүмедим Нееманны чорудуп олур мен, ооң кеш аарыын адырып берем» деп бижээн чагаа эккелген.

7 Израильдиң хааны чагааны номчааш, кеткен хевин качыгдалдан ора тырткаш: «Өлүрүп-даа, тынгарып-даа шыдаар Бурган мен бе мен? ^d Бо кижиниң кеш аарыын адырып каар кылдыр, арамей хаан ону менче чүге чорутканы ол? Билдингир херек-тир, мээң-биле бактажыр чылдак дилеп турары ол-дур ооң ^e» – дээн.

8 Бурганның кижизи Элисей Израильдиң хаанының качыгдалдан хевин ора тыртып каапканын дыңнааш, аңаа: «Чүге кеткен хевиң ора тыртып алдың? Ол кижи меңээ келгеш, Израильде Бурганның медээчизи барын билип алзын» – деп сөс дамчыткан.

9 Нееман аъттарлыг, чуузаларлыг халдып келгеш, Элисейниң бажыңынче кирер черге доктаай берген. 10 Элисей олче бодунуң чалчазын айбылап: «Барып, Иордан хемге чеди катап чунуп каавыт ^f – мага-бодуң экирип, арыгланы бээр сен» – деп сөглеткен.

11 Нееман килеңней бергеш, чоруй барган. Ол: «Мен израиль медээчи үнүп кээп, мурнумга туруп алгаш, бодунуң Бурганы Дээрги-Чаяакчының адын кыйгырып, холу-биле аарыг черимге деггеш, кеш аарыын менден адырып каар боор деп бодадым. 12 Дамаскының хемнери Авана биле Фарфар Израильдиң бүгү сугларындан эки эвес чүве бе? Мен ол хемнерге чунуп алгаш, арыгланы берип болбас турган мен бе?» – дээн.

Нееман эргилгеш, килеңи хайныгып, дедир чоруй барган. 13 Ооң чалчалары чоокшулап кээп, аңаа: «Ачавыс, бир эвес медээчи силерге кандыг-бир берге чүүл чугаалаан болза, ону кылыр-ла турдуңар ыйнаан. Ол силерге чүгле: „Чунуп каавыт – арыгланы бээр сен“– дээрге, чүге ынчап болбазыл?» – дээннер.

14 Ынчан Нееман Бурганның кижизиниң чугаалаанын ёзугаар барып, Иорданның суунга чеди катап шымныптарга, ооң мага-боду экирип, чаш уругнуу дег арыг апарган. 15 Нееман болгаш ону үдеп чораан бүгү улус Бурганның кижизинче ээп келген. Медээчиниң мурнунга туруп алгаш, ол: «Бүгү чер-делегейде Израильдиң Бурганындан өске Бурган чогун мен ам билип алдым ^g. Ынчангаш чалчаңар мээң белээмни хүлээп ап көрүңерем» – дээн.

16 Бурганның кижизи: «Бараан болуп турарым дириг Дээрги-Чаяакчының ады-биле даңгыраглап тур мен: белээңни хүлээп албас мен!» – дээн.

Демгизи чеже-даа албадаарга, медээчи ойталап каапкан ^h. 17 Нееман ынчан: «Бир эвес алыр хөңнүңер чок болза, силерниң чалчаңар меңээ ийи элчиген сөөртүп аппаар хире довурактан берзин. Чүге дээрге силерниң чалчаңар моон соңгаар Дээрги-Чаяакчыдан өске бурганга бүрүн өрттедир-даа, өске-даа өргүлдер эккеп салбас ^{▼▼ Нееман Дээрги-Чаяакчыга чүгле Аңаа хамааржыр израиль черниң довураанга мөгейип болур деп санап турган.}. 18 Дээрги-Чаяакчы силерниң чалчаңар мени чүгле чаңгыс чүүл дээш өршээзин: мээң дээрги хааным Риммон бурганга мөгеер дээш ооң өргээзинче кирип тура, мээң холумга чөленип аар кижи, ынчан мен база мөгеер апаар мен. Риммоннуң өргээзинге ол мөгейиишкиним дээш, Дээрги-Чаяакчы силерниң чалчаңарны өршээзинем» – дээн.

19 Элисей: «Амыр-тайбың чоруй барып көр» – дээн.

Гиезийниң хоптак чоруу

Нееман дыка ыраваанда, 20 Бурганның кижизи Элисейниң чалчазы Гиезий ^j «Мээң дээргим арамей Нееманның эккелген белээн албайн, салып чорудупту. Дириг Дээрги-Чаяакчының ады-биле даңгыраглап тур мен: ооң соондан маңнап чоруткаш, кандыг-бир чүвезин ап аайн» деп бодаан. 21 Гиезий Нееманның соондан маңнап чорупкан. Нееман соондан маңнап орар кижини көрүп кааш, аңаа уткуштур чуузазындан дүжүп келгеш: «Менди-чаагай-ла бе?» – деп айтырган.

22 «Менди-чаагай бис – деп, Гиезий харыылаан. – Дээргим мени: „Эфрем дагларындан ийи аныяк медээчи чедип келди. Оларга бир талант мөңгүн биле ийи солуп кедер хептен берип көрем“– деп чугаалазын дээш чорутту» – дээн.

23 Нееман: «Ынчанмайн канчаар! Ийи-даа талантыдан ап ал» – деп харыылаан.

Ол Гиезийни бүзүредип тургаш, ийи талант мөңгүн биле ийи солуп кедер хепти ийи шоодайга суп берген. Шоодайларны ийи чалчазынга ап бээрге, олар Гиезийниң мурнунга шоодайларны чүктеп алгаш чорупканнар. 24 Гиезий тейже үнүп келгеш, ол бүгүнү чалчалардан ап алгаш, бажыңынга чажырып каан. А чалчаларны чорудуптарга, олар чана бергеннер. 25 Ооң соонда ол бодунуң дээргизиниң мурнунга кээп туруп алган. Элисей: «Гиезий, сен каяа чордуң?» – деп айтырган.

Демгизи: «Силерниң чалчаңар мен кайнаар-даа барбадым» – деп харыылаан.

26 А Элисей аңаа: «Кажан ол кижи чуузазындан сеңээ уткуштур дүжүп кээп турда, мээң чүрээм сени үдеп турбажык бе? Акша-мөңгүн, идик-хеп, олива ыяштар, виноград шөлдери, сүрүг малдар, эр, кыс чалчалар алыр үе эвес-тир. 27 Нееманның кеш аарыы сеңээ база сээң үре-салгалыңга кезээ мөңгеде чыпшынып артсын» – дээн.

Гиезий Элисейниң бажыңындан кеш аарыындан хар ышкаш агара берген үнүп келген ^k.