‏ 2 Kings 6

Элисей болгаш балды

1 Бурганның медээчилери Элисейге: «Дыңнаңар даан, силерниң башкарылгаңар адаанда чурттап турарывыс бо чер биске дыкпыш-тыр. 2Биске Иордан хемче баарын чөпшээреп көрүңерем. Кайывыс-даа бир чудуктан ап алгаш, аңаа чурттаар бажың-савадан тудуп аалы» – дээннер.

Ол: «Чаа, барыңар» – деп харыылаан.

3Оларның бирээзи: «Чалчаларыңар бис-биле кады барыксавайн-дыр силер бе?» – деп айтырган.

Элисей: «Баргай-ла мен» – деп харыылааш, 4медээчилер-биле кады чорупкан. Олар Иордан хемге келгеш, ыяш кезип эгелээннер. 5Оларның бирээзи ыяш ужуруп турда, балдызының демир бизи сугже кээп дүшкен.

«Аа халак, дээргим! – деп, ол алгыра берген. – Ачылап алган балдым чүве!»

6Бурганның кижизи: «Кайнаар кээп дүштү?» – деп айтырган.

Кажан демгизи ол черни көргүзерге, Элисей будук одура шапкаш, ынаар октаптарга, балдызының бизи суг кырынга салдап үнүп келген. 7Элисей: «Ооңну ап ал» – дээн.

Демги кижи холун сунгаш, балдызының бизин ап алган.

Элисей болгаш согурарган арамейлер

8Арамей хаан Израильге удур чаалажып турган. Ол бодунуң дүжүметтери-биле сүмележип: «Турлаамны дуу орта база дуу орта тип аар мен» – деп шиитпирлеп турган.

9А Бурганның кижизи Израильдиң хаанынче кижи айбылап: «Ол черни таварып эртеринден кичээн! Ында арамейлер туруп алган-дыр» – деп сөгледипкен.

10Израильдиң хааны Бурганның кижизиниң айыткан черин хынадып турган. Элисей хаанны хөй катап баш бурунгаар сагындырган; хаан ындыг черлерге сезиктиг болур турган. 11Арамей хаан ол дээш аажок дүвүрээн. Ол бодунуң дүжүметтерин кыйгырып алгаш: «Меңээ чугаалаңар, бистиң улузувустан кым Израильдиң хаанынга медээ чедирип турарыл?» – деп айтырган.

12«Кым-даа эвес, дээрги хааным – деп, дүжүметтерниң бирээзи харыылаан. – Израиль чурттуг Элисей медээчи удуур өрээлиңерге чугаалаан сөстериңерни безин Израильдиң хаанынга катаптап чугаалап шыдаар кижи-дир».

13«Ооң кайда турарын барып билип эккелиңер – деп, хаан дужааган, – мен ону тудуп эккээр кылдыр улус чорудуптайн».

Хаанның улузу аңаа: «Ол Дотанда ^a турар-дыр» – деп дыңнатканнар. 14Хаан ынаар аъттар, дайынчы тергелер болгаш хөй шериг чорудупкан. Олар дүне када келгеш, хоорайны бүзээлеп алганнар. 15Даартазында эртен медээчиниң чалчазы эртежик тургаш, үнүп көөрге, хоорайны аъттарлыг, дайынчы тергелерлиг шериг бүзээлеп алган болган.

Чалча: «Ах, дээргим, канчаар бис ам?» – деп айтырган.

16«Кортпа – деп, медээчи харыылаан. – Бистиң талавыста шериг оларның талазында шеригден хөй-дүр ^b».

17Элисей оон: «О, Дээрги-Чаяакчы, көрүп шыдаар кылдыр, ооң караан ажыдып берем» – деп мөргээн.

Дээрги-Чаяакчы чалчаның караан ажыдып берген. Ынчан ол топтап көөрге, дагны оттуг аъттар, дайынчы тергелер шыва апкан болган ^c, олар Элисейни долгандыр турган. 18Кажан арамейлер Элисейже шимчеп үнүптерге, ол Дээрги-Чаяакчыга: «Бо чонну согурартып каап көрем» – деп мөргээн.

Элисейниң дилээн ёзугаар Дээрги-Чаяакчы дайзыннарны согурартып каан ^d. 19Элисей оларга: «Ол орук, ол хоорай бо эвес-тир. Мээң соомдан чоруптуңар. Мен силерни дилеп турар кижиңерге чедирип каар мен» – дээн.

Оон оларны Самарияга чедире берген. 20Арамейлер хоорайже кирип кээрге, Элисей: «О, Дээрги-Чаяакчы, бо улус көөр кылдыр, оларның карактарын ажыдып берем» – деп дилээн.

Дээрги-Чаяакчы оларның карактарын ажыдып бээрге, олар Самарияда турарын көрүп кааннар. 21Израильдиң хааны оларны көрүп кааш, Элисейден: «Ачай, бо улусту кыра шаап кааптайн бе?» – деп айтырган.

22«Хоржок, өлүрбе – деп, медээчи харыылаан. – Бодуңнуң хылыжың база ча-согунуң дузазы-биле тудуп албаан улузуңну өлүрбес ужурлуг сен. Оларга аъш-чем биле сугдан бериңер ^e, чемненип алгаш, боттарының дээргизинче чана берзиннер».

23Хаан оларга улуг дой белеткеп бээрге, арамейлер ижип-чип шаг болган. Оон оларны салып чорудуптарга, олар дээргизинче ээп келгеннер. Арамей дээрбечи бөлүктер ооң соонда израиль черже халдап көрбээн.

Бүзээлеттирген Самарияда коргунчуг аш

24Элээн үе эрткенде, арамей хаан Венадад ^f бүгү аг-шериин чыггаш, халдап үнгеш, Самарияны бүзээлеп алган. 25Хоорайга коргунчуг аш эгелээн. Бүзээлээшкин аажок узамдыкканындан элчиген бажын сезен шекел мөңгүнге, а бичии көге-буга өдээн беш шекел мөңгүнге садып турган.

26Израильдиң хааны бир катап хоорай ханазының кыры-биле эртип бар чыдырда, бир херээжен кижи аңаа: «Дээрги хааным, дузалап көрүңерем!» – деп алгырып, дилег кылган ^g.

27Хаан: «Бир эвес сеңээ Дээрги-Чаяакчы дузалавайн турар болза, мен сеңээ канчап дузалап шыдаар мен? Шаңдан бе, виноград сы базар оңгардан бе?» – деп харыылаан.

28Хаан оон: «Чүү болганы ол?» – деп айтырган.

Ол херээжен: «Дуу херээжен меңээ: „Оглуңну бер, бөгүн ону чиили, а даарта мээң оглумну чиир бис“– диди. 29Мээң оглумну хайындыргаш, чип алдывыс ^h. Дараазында хүнде мен аңаа: „Оглуңну бер че, ам ону чиили“– дидим. А ол оглун чажырыпты» – дээн.

30Херээжен кижиниң сөстерин дыңнааш, хаан кеткен хевин качыгдалдан ора соп каапкан. Ол хана кырлап бар чыдырда, чон хаанның ора соп каапкан хевиниң адаанда качыгдалдың самдар хеви барын көрүп каан. 31Хаан: «Бир эвес Шафаттың оглу Элисейниң бажын бөгүн ооң эктинге арттырып каар болзумза, Бурган мени канчаар-даа кезеткей аан!» – дээн.

32Ол бодунуң айбычызын медээчиже чорудупкан. Элисей бажыңынга чоннуң баштыңнары-биле кады олурган. Айбычы келбээнде, чоннуң баштыңнарынга ол: «Бо өлүрүкчү менче бажым алыр кижи чорудупканын билир силер бе? Көрдүңер бе, айбычы чедип кээрге, эжикти хаап, ооң мурнунга дуглап алгаш, киирбеңер. Адыр, айбычының артында ооң дээргизиниң базымнары дагжап тур!» – дээн.

33Элисей олар-биле чугаалашпышаан турда, айбычы аңаа чедип келгеш, хаанының сөстерин дамчыткан: «Бо айыыл-халап Дээрги-Чаяакчыдан келген-дир. Мен ам Дээрги-Чаяакчыга оон ыңай идегээш чоор мен?»