aЫ. х. к. 13:1-3; Иер. 14:14; 23:16; Мф. 7:15
bАж.-ч. 20:30; 2 Кор. 11:13; 1 Тим. 4:1; Иуда 1:4
c1 Кор. 6:20; 7:23
dРим. 16:18; Кол. 2:4
eИуда 1:6
fЭ. д. 7:17; 1 Пет. 3:19-20
gЭ. д. 7:23
hЭ. д. 19:24
iЭ. д. 19:16
jЫд. ыр. 118:136; Аж.-ч. 17:16
k1 Кор. 10:13; Ажыд. 3:10
lИуда 1:16
mИуда 1:8-9
nИуда 1:10
oСан. 22:5; 25:1-2; 31:16; Ы. х. к. 23:3-6; Иуда 1:11; Ажыд. 2:14
pСан. 22:21-30
qИуда 1:12-13
r2 Пет. 1:4
sГал. 5:13
tИн. 8:34; Рим. 6:16-20; Тит. 3:3
uМф. 12:45; Лк. 11:26
vРим. 7:12
wУ. ч. 26:11

‏ 2 Peter 2

Меге башкылар

1Ындыг-даа болза, Бурганның улузунуң аразындан меге медээчилер база үнүп кээп турган a. Силерниң араңарга база ынчалдыр меге башкылар тыптып кээр b. Олар өлүп чидеринге чедирер меге өөредиглерин нептередип, оларны Бодунга садып алган c Чагырыкчыны безин хүлээп көрбестей бээр база оларның ындыг чоруу боттарының бажынче суг кудуп, манавааны буураашкынга чедирер. 2Хөй-ле улус оларны өттүнүп, самыырап чурттаар база алыс шынның оруу оларның ужун бак атка кирер. 3Алыксак-чиксек болгаш, олар оптуг сөстерин дамчыштыр силерни чүгле ажыглаарын бодаар d. Бурган оларны шагда-ла шиидип каан, оларның өлүмү эргин артында чайлаш чок манап турар.

4Бурган бачыт үүлгеткен дээрниң төлээлерин безин хайыралавайн, шииткел хүнүн манап, орта демирледип алган турзуннар дээш, оларны тамының дүмбей караңгы ханы дүвүнде тудуп турар e. 5Бурган эрте-бурунгу делегейге-даа хайыра көргүспейн, чөптүг-шынныг чорукту суртаалдаан Нойдан база өске чеди кижиден аңгыда f, Бурганны хүндүлевес бүгү бачыттыг кижи төрелгетенни суг халавы-биле узуткап каапкан g. 6Ол Содом биле Гоморра хоорайларны чылча базар кылдыр шииткеш, келир үениң бачыттыг улузу-биле чүү болу берип боорун сагындырып чорзун дээш, оларны от-биле хуюктап каапкан h.

7А хоойлу-дүрүм билбес улустуң бужар аажызындан баш муңгаш хинчектенген Лотту, чөптүг-шынныг кижини, Бурган камгалап алган i. 8Ол чөптүг кижи бачыттыг улустуң аразынга чурттап чорааш, оларның хоойлу-дүрүм чок үүлгедиглерин көрүп база дыңнап, хүн бүрү сагыш-сеткили хинчектенип келген j.

9Ийе, Дээрги-Чаяакчы Ону хүндүлээр улусту шенелде байдалдарындан канчаар адырарын k, а хоойлу-дүрүм сагывастарны кезедип, шииттирер хүнүнге чедир канчаар кадарып арттырарын билир. 10Ылаңгыя боттарының бужар күзээшкиннериниң аайындан эртпес l, дээди эрге-чагырганы дора көөр улуска ол кончуг хамааржыр!

Ындыг бардам, улуургак кижилер өндүр улуг күштерни-даа бак сөглээринден чалданмас m, 11а ол күштерни ындыг улустан артык күш-шыдалдыг дээрниң төлээлери безин Дээрги-Чаяакчының мурнунга дорту-биле буруудатпайн турар болгай. 12Меге башкылар боттарының билбес чүүлүн бак сөглеп чоруур. Боттарының согур меделинге чагырткан, оларны чүгле туткаш, соп чиир кылдыр төрүттүнген адыгуузуннарга ол башкылар дөмей-дир. Ындыг адыгуузуннар ышкаш, олар узуткаттырып аар n.

13Үүлгеткен хамык хоразы дээш, олар чогуур кеземче алыр. Ындыгларның байгы таалалы – самыыралын хандырар дээш дойлап, хүннер эрттирери. Ат болган ыят чок, бужар улус-тур ол! Силерниң-биле кады дойлап тура, олар силерни дуурайлапкаш, таалал алыр. 14Олар херээженнер көргеш, чүгле бирикшиирин бодаар, канчап-ла оларны дуурайлап аарыл деп шыданмайн чоруур. Ындыг улус – быжыг туруш чоктарны бачытче чыгаар, өскениң чүвезин алыр-чиир дээнде амырай бээр каргыштыг хейлер болбазыкпе! 15Дорт оруктан соора баргаш, олар Восорнуң оглу Валаамның изин истеп чорупкан, а Валаам болза бак ажыл-херээ дээш, төлевир алырынга ынак кижи турган o. 16Ындыг бузуду дээш, Валаам чемелээшкин дыңнаан, ону аас-дыл чок мал сойгалап, кижигилештир чугаалай бергеш, медээчиниң солуудаанын соксаткан болгай p.

17Меге башкылар кадып калган суг баштарынга, хатка сывыртаткан булуттарга дөмей. Бурган оларга турар черни тамының караңгызында белеткеп каан q. 18Олар сыңзыг, хоозун сөстер эдип, бачыттыг бүдүштүң күзээшкиннерин ажыглааш, азып-тенээннер санындан мырыңай чаа адырлып эгелээн улусту r аайынга киирип ап турарлар. 19Меге башкылар ол улуска хосталганы аазап турза-даа, боттары будалчак чоруктуң кулдары-дыр s. Кижи дээрге ону холга киирип алган чүүлдүң кулу-ла болгай t.

20Дээргивис болгаш Камгалакчывыс Иисус Христосту билип алганының ачызында бо делегейниң бужар багындан адырлып шыдаан улус ам база катап аңаа дузактадып, алзып аар болза, оларның сөөлгү байдалы баштайгызындан-даа дора боор u. 21Чөптүг-шынныг орукту билип алган соонда, оларга дамчыдып берген ыдыктыг чагыгдан v ойталаарының орнунга, ону шуут билбес боору дээре. 22Ындыг улус-биле чүү болганын үлегер домактар өттүр-ле сөглээн-дир: «Ыт кускузунче дедир ээп кээр» w база «Хаванны чеже-даа чуурга, кара малгаштан ыраар эвес».
Copyright information for TyvTUV