2Sa 9 | TyvTUV | STEP | Давид: «Саулдуң өг-бүлезинден арткан кижи ам бар бе? Мен аңаа Ионафан дээш энерел көргүскей эртик мен»

‏ 2 Samuel 9

Давид болгаш Мемфивосфей

1 Давид: «Саулдуң өг-бүлезинден арткан кижи ам бар бе? Мен аңаа Ионафан дээш энерел көргүскей эртик мен» – дээн ^a.

2 Саулдуң өг-бүлезинге бараан болган Сива деп чалча кижи турган ^b. Ону Давидче кыйгыртып эккээрге, хаан: «Сива деп кижи сен сен бе?» – деп айтырган.

Оозу: «Силерниң чалчаңар мен-дир мен» – деп харыылаан.

3 Хаан: «Саулдуң салгалдарындан чаңгыс-даа кижи артпаан чүве бе? Мен аңаа Бурганныы дег энерел көргүзүксеп тур мен» – дээн.

Сива хаанга: «Ионафанның аскак оглу бар» – деп харыылаан ^c.

4 Хаан: «Кайдал ол?» – деп айтырган.

Сива: «Ол Лодавар чурттуг Аммиилдиң оглу Махирниң бажыңында турар ^d» – деп харыылаан.

5 Давид хаан ону Лодаварда Аммиилдиң оглу Махирниң бажыңындан сүрдүрүпкен. 6 Ионафанның оглу, Саулдуң оглунуң оглу Мемфивосфей ^e Давидке чедип келгеш, хаанны хүндүлеп черге чедир мөгейген. Давид: «Мемфивосфей сен сен бе?» деп айтырган.

«Силерниң чалчаңар мен-дир мен» – деп ол харыылаан.

7 Давид аңаа мынча дээн: «Кортпа. Сээң ачаң Ионафан дээш мен сеңээ энерелдиг болур мен. Сээң кырган-ачаң Саулдуң шөлдерин сеңээ эгидип бээр мен. Сен мээң-биле кады чемненир сен».

8 Мемфивосфей мөгейип кааш, чугаалаан: «Менче кичээнгей салыр хире кым мен мен? Мен дээрге өлген ыттан дээредевес кижи ышкажыл мен».

9 Хаан Саулдуң чалчазы чораан Сиваны кыйгырып алгаш, аңаа чугаалаан: «Саулга болгаш ооң өг-бүлезинге чүү хамааржырыл, шуптузун сээң дээргиңниң оглунга берип тур мен. 10 Ынчангаш сен, оолдарың база кулдарың ооң черин болбаазыраткаш, ону хандырар кылдыр дүжүдүн эккеп туруңар. А сээң дээргиңниң оглу Мемфивосфей үргүлчү мээң-биле кады чемненир». Сива он беш оолдуг, чээрби кулдуг турган чүве-дир ^f.

11 «Мээң дээрги хааным чалчазы меңээ чүнү чугаалаар болдур, шуптузун күүседир мен» – деп, Сива харыылаан. Ынчалдыр Мемфивосфей, Давид хаанның оолдарының бирээзи дег, ооң-биле кады чемненир апарган.

12 Мемфивосфейниң Миха деп бичии оглу бар турган ^g. Сиваның бажыңында чурттап турар улус шупту Мемфивосфейге бараан болур апарган. 13 Ийи буду аскак Мемфивосфей Иерусалимге чурттап турган, чүге дээрге ол хаан-биле кады үргүлчү чемненир турган.