2Sa 12 | TyvTUV | STEP | Дээрги-Чаяакчы Давидче Нафанны чорудупкан . Нафан Давидке келгеш, мынча дээн: «Бир хоорайга бирээзи бай, өскези ядыы ийи кижи чурттап чораан-дыр.

‏ 2 Samuel 12

Нафан медээчиниң Давидти сойгалап илереткени

1 Дээрги-Чаяакчы Давидче Нафанны чорудупкан ^a. Нафан Давидке келгеш, мынча дээн: «Бир хоорайга бирээзи бай, өскези ядыы ийи кижи чурттап чораан-дыр. 2 Бай кижиниң шээр болгаш бода малы кончуг хөй турган. 3 А ядыы кижиниң чаңгыс хоюндан өске чүзү-даа чок турган. Ону ол хураган турда садып алгаш, азырап өстүрүп алган. Хураганы ооң ажы-төлү-биле кады өскен чүве-дир. Ол ооң холундан чем чип, суг ижип, харын-даа ооң хойнунга удуп өскен болгаш, бодунуң уруу-биле дөмей турган. 4 Бай кижиге чорумал чедип кээрге, ол бодунуң хоюн азы бода малын келген кижиге чем кылып бээри-биле өзээринден харамнанган. Ооң орнунга ядыы кижиниң чаңгыс хоюн өзээш, чорумалга чем кылып берген чүве-дир».

5 Давид ындыг кижиге аажок хорадай бергеш, Нафанга: «Дириг Дээрги-Чаяакчының ады-биле даңгыраглап тур мен: ындыг чүвени үүлгеткен кижи өлүмге төлептиг! 6 Кээргээр сеткил чок болганы дээш, ындыг чүвени кылганы дээш, хой дээш ол дөрт дакпыр төлээр апаар ^b» – дээн.

7 Нафан Давидке мынча дээн: «Ол бай кижи дээрге силер-дир силер! Израильдиң Бурганы Дээрги-Чаяакчы мынча диди: „Сени Мен Израильдиң хааны болур кылдыр шилип алган мен ^c. Сени Мен Саулдуң холундан камгалап алган мен. 8 Сеңээ Мен дээргиңниң ордузун база ооң кадайларын хүлээдип берген мен. Сеңээ Мен Израиль биле Иудеяны берген мен. Бир эвес ол сеңээ эвээш болза, оон-даа хөйнү немеп бергей эртик мен. 9 Чүге сен Дээрги-Чаяакчының мурнунга каржы чорук кылып, Ооң сөзүн тооп көрбедиң? ^d Хет Урияны сен күчүлеп өлүрүп кааш, ооң кадайын ап алдың. Урияны сен аммоннарның чепсээ-биле узуткап каан болгай сен. 10 Ынчангаш сээң үре-салгалың үргүлчү күчүлелге таваржыр. Чүге дээрге сен Мени тооп көрбээн болгаш хет Урияның кадайын ап алган сен“».

11 Дээрги-Чаяакчы оон ыңай мынча дээн: «Мен сеңээ хай-халапты бодуңнуң үре-салгалыңның талазындан ыдар мен. Сен көрүп туруңда-ла, сээң кадайларыңны алгаш, чоок кижиңге бериптер мен, ол чырык хүндүс безин олар-биле удуур ^e. 12 Сен үүлгедииңни бүдүү кылган сен, а Мен мону бүгү Израильдиң мурнунга чырык хүндүс көзүлдүр кылыр мен».

13 Давид Нафанга: «Дээрги-Чаяакчыга удур бачыт үүлгеткеним шын-дыр» – дээн ^f. Нафан Давидке: «Дээрги-Чаяакчы сээң бачыдыңны сенден чайладып каапкан, сен бодуң өлбес сен – деп чугаалаан. – 14 Ындыг-даа болза, сээң үүлгеткен бачыдың хайы-биле Дээрги-Чаяакчының дайзыннарынга Ону бак сөглээр арганы берген бооруңга, сээң чаа төрүттүнген оглуң чайлаш чок өлүр». 15 Ынча дээш, Нафан чана берген.

Давидтиң чаш төлүнүң чок апарганы

Дээрги-Чаяакчы Урияның кадайының Давидке божуп берген оглунуң күжүн суларадыптарга, ол аарый берген. 16 Давид Бурганга мөргүп, чем чивейн, чааскаан черге чыдып алгаш ^g, дүн эрттирген. 17 Ооң ордузунуң кол улузу аңаа чедип келгеш, ону черден тургузарга, ынаваан, олар-биле кады чем-даа чивээн. 18 Чеди хонук эрткенде, чаш төл чок апарган. Давидтиң чалчалары аңаа чаш төлдүң өлгенин чугаалаарындан кортканнар. Чүге дээрге олар: «Чаш төл дириг турда безин, хаан бисти дыңнавайн турду. Ам канчап аңаа чаш кижиниң чок апарганын чугаалаар бис? Ол ат болза канчаар?» деп бодаан. 19 Чалчаларының сымыранчып турарын көргеш, чаш кижи чок апарганын Давид билип каан. Ол чалчаларындан: «Чаш кижи чок апарды бе?» – деп айтырган.

Олары: «Ийе» – деп харыылаан.

20 Ынчан Давид черден туруп келгеш, чунуп, үс-биле бажын чаап, эде кеттинип алгаш, Дээрги-Чаяакчының өргээзинге барып тейлеп алган. Ооң соонда ол бодунуң ордузунга баргаш, аңаа чем бээрин негээш, аштанып-чемненип алган.

21 Чалчалары оон: «Силер чүге ынчаарыңар ол? Чаш кижи дириг турда, силер чем чивейн, ыглап турдуңар. Ам ол чок апаарга, тургаш, чемненип турар-дыр силер?» – деп айтырган.

22 Давид мынча деп харыылаан: «Кажан чаш кижи дириг турда, мен: „Канчап билир, Дээрги-Чаяакчы менче ээ көрнүр болза, чаш кижи дириг артар чадавас“деп бодааш ^h, шээрленип, ыглап турдум. 23 Ам ол чок апарганда, чүү дээш шээрленир деп мен? Ону эгидип аар харыктыг мен бе? Мен аңаа чеде бээр мен, а ол менче эглип келбес».

24 Давид кадайы Вирсавияга баргаш, ону оожуктуруп, ооң-биле удуп, холбашкан. Кадайы иштели бергеш, аңаа оол уруг божуп берген. Оглун Соломон деп адап алган ⁱ. Дээрги-Чаяакчы аңаа ынак болгаш, 25 Нафан медээчини чорудуптарга, ол аңаа Иедидиа деп атты берген, чүге дээрге Дээрги-Чаяакчы ынчаар күзээн чүве-дир ^{▼▼ Иедидиа – «Дээрги-Чаяакчының ынак кижизи» дээн ат.}.

Аммоннар-биле дайынның төнгени

(1 Чыл. 20:1-3)

26 Ол үеде Иоав аммон черниң найысылалы Раввага ^k удур дайылдажып тургаш, хаанның шивээзин ^{▼▼ Азы: «Хаанның хоорайын».} эжелеп алган. 27 Иоав айбычыларын Давидче чоруткаш: «Мен Равваже халдааш, хоорайның ижер суун эжелеп алдым. 28 Ынчангаш арткан шериглерни чыып алгаш, хоорайже халдап киргеш, эжелеп ал. Оон башка хоорайны бодум эжелеп аар болзумза, ол мээң адым-биле ададыр апаар» – деп сөгледипкен.

29 Давид бүгү шериглерин чыггаш, барып Раввага удур дайылдашкаш, ону эжелеп алган. 30 Давид аммон хаанның ^{▼▼ Азы: «Милхом бурганның».} оваадайын ооң бажындан уштуп алгаш, боду кедип алган. Ол оваадай бир талант алдын деңзилиг болгаш үнелиг даш-биле каастап каан турган чүве-дир. Давид ол хоорайдан дыка хөй олчалыг болган. 31 Чурттакчыларын Давид хоорайдан үндүргеш, оларны албадал-биле хирээлер, демир кускун-хаайлар, балдылар тудуп алгаш ажылдаар база тууйбу өрттедир изиг суугулар чанынга ажылдаар кижилер кылып алган ^{▼▼ Азы: «Оларны хирээлер, демир кускун-хаайлар, балдылар-биле эриидеп, изиг суугуларже киирип, шаажылаан».}. Давид бүгү аммон хоорайларны база ынчалдыр аажылаан. Ооң соонда Давид бодунуң бүгү шерии-биле Иерусалимче ээп келген.