2Sa 13 | TyvTUV | STEP | Элээн үе эрткенде, Давидтиң оглу Амнон Фамар деп чараш кыска хандыкшый берген. А Фамар дээрге Давидтиң өске оглу Авессаломнуң төрээн дуңмазы чүве-дир .

‏ 2 Samuel 13

Амнон биле Фамар

1 Элээн үе эрткенде, Давидтиң оглу Амнон Фамар деп чараш кыска хандыкшый берген. А Фамар дээрге Давидтиң өске оглу Авессаломнуң төрээн дуңмазы чүве-дир ^{▼▼ Оларның адазы Давид, ынчалза-даа Амноннуң авазы аңгы турган чүве-дир (2 Хаан. 3:2-5; 1 Чыл. 3:9 көр).}. 2 Бодунуң дуңмазы болур Фамарга хандыкшаанындан хилинчектенип, Амнон аарый берген. Амнон ооң-биле чүнү-даа канчап шыдавас болган, чүге дээрге Фамарга кым-даа дегбээн, арыг кыс турган. 3 Давидтиң акызы Шиманың ^b оглу Ионадав ^c Амноннуң эжи турган. Ол кончуг кажар кижи чүве-дир.

4 Ионадав Амнондан: «Хаанның оглу, сен чүге хүн келген тудум-на арып турар апардың? Чылдагаанын меңээ чугаалап көрем» – деп айтырган.

Оозу: «Авессаломнуң дуңмазы Фамарга ынакшый бердим» – деп харыылаан.

5 Ионадав аңаа: «Орунга чыдып алгаш, аарыычаңнай бер. Ачаң сени көөр дээш чедип кээрге: „Мээң дуңмам Фамар мен көрүп чыдырымда, чемден белеткээш, мени боду чемгерзин“деп чугаала» – деп сүмелээн.

6 Амнон орунга чыдып алгаш, аарыычаңнай берген. Хаан ону көөр дээш чедип кээрге, Амнон аңаа: «Мээң дуңмам Фамар чедип келгеш, меңээ чиир кылдыр, көрүп чыдырымда, бичии далгандан быжырып бергеш, мени боду чемгерзин» – дээн.

7 Давид: «Акың Амноннуң бажыңынга баргаш, аңаа чемден кылып берип көрем» – деп Фамарже сөгледипкен. 8 Фамар аарып чыдар акызы Амноннуң бажыңынче чорупкан. Ол далганны нугааш, акызы көрүп чыдырда, ону быжырыпкан. 9 Паштан далганны ап бээрге, акызы чивес болган. Амнон: «Бажыңдан шупту улус үне берзин» дээрге, кым-даа артпайн үнүп чоруй барган. 10 Ынчан Амнон Фамарга: «Чемиңни мээң удуур өрээлимче эккелгеш, мени чемгерип көрем» – дээн. Фамар быжырып алган далганын акызының удуур өрээлинче эккелген.

11 Далганны чизин дээш чедире бээрге, Амнон Фамарны сегирип алгаш: «Дуңмам, бээр кел, мээң-биле чыдып алам» – дээн.

12 Фамар: «Чок, акый. Мени албадавайн көр. Израиль чон аразынга ындыг чүве турбас ужурлуг. Ындыг сээдең үүлгедиг кылбайн көр ^d. 13 Бужартай бергеш, оон канчаар мен? А сен, сен Израильде сээдең-бак кижилерниң бирээзи деп санаттырар сен. Хаан-биле чугаалажып көр даан. Ол мени сеңээ бээринден ойталавас-тыр ийин» – деп дилээн.

14 Ынчалза-даа Амнон ону дыңнаарын күзевээн. Ол оон күштүг болгаш, Фамарны күштеп-чазарлап каапкан. 15 Ооң соонда Амнон ону кедергей көөр хөңнү чок апарган. Аңаа ынак турганындан-даа артык кылдыр көрбестей берген. Амнон аңаа: «Тур, моон ырап чор!» – дээн.

16 Фамар: «Чок, мени ойладыры дээрге мээң-биле ам чаа-ла кылып каан үүлгедииңден-даа артык каржы чорук-тур ол» – деп аңаа чугаалаан.

Ынчалза-даа Амнон ону тооваан. 17 Ол бодунуң чалчазын кыйгырыпкаш: «Бо чүвени моон үндүр ойладыпкаш, ооң соондан эжикти эки дүкчүп каг» – дээн. 18 Чалча оол Фамарны үндүр ойладыпкаш, ооң соондан эжикти хаап алган.

Фамар онзагай чараш хептиг чораан. Ындыг хепти хаанның кыс уруглары кедер турган. 19 Фамар качыгдалдан бажынче хүл чаштынып алгаш, бодунуң кедип чорааны чараш хевин ора соп алгаш, бажын туттунуп алган ыглап-сыктап чораан. 20 Акызы Авессалом: «Акың Амнон сээң-биле турду бе? Ам канчаар сен, дуңмам, ону ыыттава. Ол дээрге сээң акың ышкажыл. Эмин эрттир муңгарааш канчаар сен» – деп Фамарга чугаалаан. Фамар акызы Авессаломнуң бажыңынга кагдырган херээжен бооп чурттап чораан.

21 Давид хаан ол болуушкунну дыңнааш, аажок ажынып-хорадаан. 22 А Авессалом Амнонга эки-даа, багай-даа чүве чугаалаваан. Ооң дуңмазы Фамарны күштеп-чазарлап кааны дээш, ол Амнонну көөр хөңнү чок турган.

Авессаломнуң Амнондан өжээн негээни

23 Ийи чыл эрткен. Эфрем чериниң кызыгаарында Ваал-Гацорга Авессаломнуң хоюнуң кыргылдазы болган. Авессалом хаанның оолдарын шуптузун ынаар чалаан ^{▼▼ Хой кыргылдазының үезинде улус найыр-дой кылып, аалчылар чалап, байырлаар турган.}. 24 Авессалом хаанга келгеш: «Силерниң чалчаңар мен бөгүн хоюм кыргыдып тур мен. Дүжүметтериңер-биле кады ынаар барбас силер бе?» – деп айтырган.

25 «Чок, оглум, – деп, хаан чугаалаан. – Сеңээ берге болбазын дээш, бис шуптувус ынаар барбас бис». Авессалом дилээрге-даа, ол ынаар баарындан ойталаан. Ынчалза-даа ол оглун алгап-йөрээп каан.

26 Ынчан Авессалом: «Оода акым Амнон бистиң-биле кады барзын» – дээн.

Хаан оон: «Ооң ынаар барган херээ чүл?» – деп айтырган. 27 Авессалом дилеп туруп бээрге, хаан Амнонну болгаш бүгү өске тажыларны чорудупкан. 28 Авессалом бодунуң чалчаларынга мынча деп чагып каан: «Көрдүңер бе, Амноннуң эзирии улгаткаш, хөөрей бээрге, мен силерге „Амнонче халдаңар“дээримге, ону өлүрүп каар силер. Кортпаңар. Мен силерге дужаап тур мен, эрес-дидим болуңар». 29 Авессалом канчаар дужааганыл, чалчалары ынчалдыр Амнонну аажылаан. Бүгү өске тажылар элчигеннерин мунупкаш, дезе берген.

30 Олар орукка чоруп олурда, тажыларны Авессалом шуптузун өлүрүп каапкан, олардан кым-даа дириг артпаан деп дамчыыр чугаа Давидтиң кулаанга чеде берген чүве-дир. 31 Хаан туруп келгеш, качыгдалдан хевин ора соп каапкаш ^f, черже барып ушкан ^g. Ооң чанынга турган дүжүметтери база хептерин ора соккулап каапкан. 32 Давидтиң акызы Шиманың оглу Ионадав ^h мынча дээн: «Мээң дээрги хааным бодунуң оолдарын шуптузун өлүрүп каан деп бодавазын. Чүгле чаңгыс Амнон өлүп калган. Чүге дээрге дуңмазы Фамарны күштеп каапкан хүнден эгелеп, Авессалом ону өлүрер деп бодап алган турган. 33 Ынчангаш мээң дээрги хааным хей черге дүвүреп, оолдары шупту өлүп калган деп бодавазын. Чүгле чаңгыс Амнон өлүп калган».

34 А Авессалом ол үеде дезип чоруй барган.

Хайгыылга турган оол көрүптерге, барыын чүкте дагның ийинден дыка хөй чон чоруп орган. 35 Ионадав хаанга: «Хаанның оолдары чоруп олур. Шупту чүве силерниң чалчаңарның чугаалааны дег болган-дыр» – дээн. 36 Ол чугаалап доозары билек, тажылар ыы-сыылыг бо кирип келгеннер. Хаан болгаш ооң дүжүметтери база аажок качыгдап ыглашканнар.

37 Авессалом дезип чоруткаш, Аммиудтуң оглу, гессур хаан Талмайга чеде берген ⁱ. А Давид оглу дээш хөй хүннер иштинде качыгдап ыглаан. 38 Авессалом дезипкени Гессурга үш чыл чурттаан. 39 Давид Амноннуң өлгениниң соонда оожургай бергеш, Авессаломну истеп-сүрерин соксаткан чүве-дир.