2Sa 15 | TyvTUV | STEP | Элээн үе эрткенде, Авессалом аъттарлыг, чуузалыг болгаш үдеп чоруур бежен камгалал шериглиг апарган .

‏ 2 Samuel 15

Авессаломнуң сүлчээзи

1 Элээн үе эрткенде, Авессалом аъттарлыг, чуузалыг болгаш үдеп чоруур бежен камгалал шериглиг апарган ^a. 2 Ол эртенниң-не тургаш, хоорайже кирер хаалга аксында орук кыдыынга туруп аар турган ^b. Кандыг-бир кижи бодунуң чаргызын хаанга дыңнадыр дээш кел чыдырда, Авессалом ону кыйгырып алгаш: «Кайы хоорайдан сен?» – деп айтырар турган. Келген кижи: «Силерниң чалчаңар Израильдиң ындыг-бир аймаандан» – деп харыылаар. 3 Ынчан Авессалом: «Сээң чаргың шынныг болгаш чөптүг-дүр, ынчалза-даа хаанның улузунуң сени дыңнаар чайы чок-тур» – дээр. 4 Ол мынча деп уламчылаар: «О, бир эвес мени бо чурттуң баштыңчызы кылып каан болза! ^c Ынчан хомудалдыг, чаргылыг кижи бүрүзү меңээ кээрге, мен шыны-биле шиидип турбас мен бе». 5 Кым-бир кижи аңаа сөгүрүүр дээш чедип кээрге, Авессалом холдарын чада туткаш, ону куспактап, ошкап каар турган. 6 Чаргызын шиитпирлезин дээш хаанга кээп турган бүгү израильчилерге хамаарыштыр Авессалом ынчаар алдынып турган. Ынчалдыр ол бүгү израильчилерниң чүрээн тудуп эгелээн.

7 Дөрт чыл ^{▼▼ Өске бурунгу сөзүглелдерде «дөрт чыл» эвес, а «дөртен чыл» азы «дөртен хүн» деп бижээн.} эрткенде, Авессалом хаанга: «Дээрги-Чаяакчыга берген даңгыраамны күүседири-биле Хевронче баргаш кээрин меңээ чөпшээреп көрүңер. 8 Силерниң чалчаңар мен арамей чоннуң Гессурга чурттап тургаш: „Бир эвес Дээрги-Чаяакчы мени Иерусалимче эгидиптер болза, Аңаа өргүл кылыр мен“деп даңгырак берген мен болгай» – дээн ^e. 9 Хаан: «Амыр-тайбың чорувут» – деп чөпшээрээрге, Авессалом Хевронче дораан чорупкан.

10 Авессалом Израильдиң бүгү аймактарынче бодунуң улузун бүдүү чорудуп тура: «Кажан силер мыйыс эдиски үнү дыңнап кааш-ла: „Авессалом Хевронга хаан апарган!“деп чарлаар силер» – дээн. 11 (Авессалом-биле кады Иерусалимден 200 кижи чорупкан. Чалаарга, олар чүнү-даа билбейн, ак сеткил-биле чорупкан чүве-дир.) 12 Авессалом өргүлдер кылып тургаш, Давидтиң Гило ^f чурттуг сүмелекчизи Ахитофелди ^g ооң хоорайындан үндүр бодунче кыйгыртып алган. Сүлчээ ынчалдыр улам күштелип, Авессаломнуң талалакчылары улам-на көвүдеп орган ^h.

Давидтиң Иерусалимден дезипкени

13 Давидке бир медээчи чедип келгеш: «Израильчилер Авессаломнуң талазынче чайгылып турлар» – дээн ⁱ. 14 Давид Иерусалимге кады турган бүгү дүжүметтеринге: «Туруңар, дезип чоруптаалыңар! ^j Оон башка Авессаломдан камгаланыр кандыг-даа аргавыс чок-тур. Далажыңар, маңаа турувуста, бисти тудуп алгаш, ат кылып, хоорайның чурттакчыларын өлүрүп каапса канчаар» – дээн. 15 Давидтиң улузу: «Дээрги хаанывыс чүү деп шиитпирлээрил, чалчаларыңар бис ону күүседиринге белен бис» – дээн.

16 Хаан бүгү өг-бүлезин эдерткеш, шимчеп үнүпкен. Чүгле он кул-кадайын бодунуң ордузун ээлеп карактаары-биле каапкан ^k. 17 Бүгү чадаг улузунга үдеттирген хаан элээн черни эрткеш, хоорайның кыдыкы бажыңының чанынга доктаап турупкан. 18 Хаанның бүгү дүжүметтери база керет, пелет уктуг камгалакчылары ^l ооң чанынга чоруп орган. А Гефтен келген 600 шериг шуптузу ооң мурнунга чоруп орган.

19 Хаан Гефтен келген Иттайга: «Сен чүге бистиң-биле кады чорууруң ол? Дедир чорупкаш, демги хаан-биле артып кал, чүге дээрге сен төрээн чериңден үндүр ойлаттырган даштыкы кижи ышкажыл сен. 20 Сен дүүн чаа-ла келдиң. А бөгүн сени мен бистиң-биле кады чор деп албадаар мен бе? Мен бодум баш углаан черже баар мен. Бодуңнуң чаңгыс чер чурттугларыңны алгаш, дедир чорувут. Дээрги-Чаяакчы сеңээ энерелдиг болгаш шынчы болзун» – дээн.

21 Иттай хаанга мынча деп харыылаан: «Дириг Дээрги-Чаяакчының-даа, мээң дээрги хаанымның-даа ады-биле даңгыраглап тур мен: мээң хааным каяа-даа чорда, чалчаңар мен өлүр-даа болзумза, база кады чоруур мен ^m».

22 Давид Иттайге: «Ындыг-дыр, чоруулу че» – дээн. Гефчи Иттай бодунуң бүгү улузу-биле, бүгү ажы-төлү-биле кады чорупкан. 23 Черниң бүгү чурттакчылары ыыткыр ыглап турган. Бүгү шериг хаан-биле Кедрон хемни эрткеш ⁿ, ээн кургаг ховуже углаан орукче үнүп келген.

Бүзүрелдиг дузалакчыларын Давидтиң Иерусалимче чорудупканы

24 Садок ^o болгаш ооң-биле турган бүгү левиттер Бурганның ыдыктыг аптаразын көдүржүп эккелгеш, салып каарга, Авиафар бараалгакчы ^p бүгү шериг хоорайдан төндүр үнгүже, өргүл салып турган ^{▼▼ Азы: «Бедигээшке туруп алган».}. 25 Хаан Садокка: «Бурганның аптаразын хоорайже дедир аппар. Бир эвес Дээрги-Чаяакчы менче ээ көрнүр болза, Ол мени катап эгидиптер. Ынчан мен ыдыктыг аптараны база ооң турар черин көөр мен. 26 А бир эвес Ол: „Сен Мээң сеткилимге таарышпаан сен“дээр болза, ам канчаар, мени канчаарын Ол Боду билгей аан ^r» – дээн. 27 Оон хаан Садок бараалгакчыга мынча деп чугаалаан: «Көр даан, оглуң Ахимаасты база Авиафарның оглу Ионафанны ^s эдертип алгаш, хоорайже амыр-тайбың чорувут. Оолдарыңарны ийилдирзин эдерткилеп ал. 28 Мен силерден медээни ээн кургаг ховуда хемниң кежиг аксынга манаар мен, көрдүңер бе». 29 Садок биле Авиафар Бурганның аптаразын Иерусалимче эккелгеш, аңаа артып калганнар.

30 Давид Елеон даанче ^t үнүп бар чорааш, ыглап чораан. Ол качыгдалдан бажын шып алган ^u болгаш кызыл-даван чораан. Ооң кады чораан улузу шуптузу база баштарын шыпкылап алган, ыглажып кылаштап чораан. 31 Кажан Давидке: «Ахитофел Авессалом-биле сүлчээлешкен улус аразында-дыр» – деп дыңнадыптарга, ол: «Дээрги-Чаяакчы! Ахитофелдиң сүмезин будалдырып көрем! ^v» – деп чалынган.

32 Давид даг кырында Бурганга мөгейиишкин кылыр черге үнүп кээрге, аңаа уткуштур архи уктуг ^w Хусий деп кижи чоруп орган. Ол бодунуң хевин качыгдалдан ора сопкан, бажында довурак-доозун чажып алган болган. 33 Давид аңаа мынча дээн: «Бир эвес сен мээң-биле чоруур болзуңза, меңээ аартык апаар сен ^x. 34 А бир эвес сен дедир хоорайже баргаш, Авессаломга: „Силерниң чалчаңар болуйн, хаан. Мооң мурнунда силерниң ачаңарның чалчазы чордум, а ам силерниң чалчаңар болуйн“дээр болзуңза, Ахитофелдиң сүмезин будап каапкаш, меңээ дузалап болур сен ^y. 35 Ында сээң-биле кады Бурганның бараалгакчылары Садок биле Авиафар база бар. Хаанның ордузунга чүнү дыңнаар-дыр сен, шуптузун оларга дамчыдып берип турар сен. 36 Ында Садоктуң оглу Ахимаас база Авиафарның оглу Ионафан бар. Оларны дамчыштыр дыңнаан бүгү медээлериңни менче дамчыдып турар сен ^z».

37 Авессалом Иерусалимче кирип келгенде, Давидтиң өңнүү Хусий ^aa база хоорайже ээп келген чүве-дир.