‏ 2 Samuel 16

Давид болгаш Сива

1Давид даг бажындан элээн чавызап бадып келгенде, аңаа Мемфивосфейниң чалчазы Сива уткужуп келген ^a. Ол ийи элчигенде 200 хлеб, чүс шарыг үзүм, чүс шарыг фига база хөм савада арага чүдүрүп алган чораан. 2Хаан: «Ону канчаарың ол?» – деп айтырган.

Сива тургаш: «Элчигеннерни хаанның өг-бүлезинге чорук кылып мунзун дээш, хлеб болгаш чимистерни чалчалары чизин дээш, а араганы ээн кургаг ховуда шылап турупкан улус ишсин дээш аппар чыдыр мен» – деп харыылаан ^b.

3Хаан: «А сээң дээрги хааныңның оглу ^c кайыл?» – дээн.

Сива хаанга: «Ол Иерусалимде артып калды. „Ам-на израильчилер мээң кырган-ачамның чагыргазын меңээ эгидип бээр боор“деп ол бүзүреп турар кижи» – деп чугаалаан ^d.

4Ынчан хаан Сивага мынча дээн: «Дыңна. Мемфивосфейге хамааржыр чүү-ле бар-дыр, ол бүгү ам сээңии болзун».

Сива черге чедир мөгейгеш: «Дээрги хааным, силерниң менче ээ көрүнгениңер моон соңгаар база уламчылаар болзун!» – деп четтиргенин илереткен.

Давид болгаш Шимей

5Давид хаан Бахуримге чедип келгенде, оон Саулдуң төрел бөлүүнге хамааржыр бир кижи үнүп келген. Ооң ады Гераның оглу Шимей. Ол Давидти бак сөглеп чоруп орган. 6Давидти ооң шериглери долгандыр камгалап чорда-ла, ону база ооң дүжүметтерин Шимей даш-биле соккулап турган. 7Ол Давидти: «Моон ырап чор! Моон ыра, дүржок, ханга борашкан чүве! – деп сөглеп турган. – 8Дээрги-Чаяакчы дүжүлгезин ээлээниң Саулдуң өг-бүлезиниң төккен ханы дээш сени шиидип турары бо-дур. Ынчангаш эрге-чагырганы сээң оглуң Авессаломнуң холунга хүлээдипкени ол-дур. Ханга борашкан-дыр сен, ат болур сен!»

9Саруйяның оглу Авесса ^e хаандан: «Бо кончуг өлген ыттың мээң дээрги хаанымны чүге бак сөглеп турары ол? – деп айтырган. – Мен баргаш, ооң бажын одура шааптайн, чөпшээреп көрүңер» – деп дилээн.

10Хаан: «Ол мээң-даа, силерниң-даа херээңер эвес-тир, Саруйяның оолдары ^f. Бир эвес Дээрги-Чаяакчы „Барып, Давидти бак сөгле“дээн болза, аңаа удур „Чүге сөглеттинип тур сен?“деп шыдаар кижи бар эвес» – дээн. 11Авессага болгаш бодунуң чалчаларынга Давид мынча дээн: «Бодумнуң-на төрүп каан оглум мээң амы-тынымга чедиксеп турар-дыр. Ындыг болганда, бо вениаминчиниң дугайында чүнү чугаалаар боор. Чоор силер ону! Дээрги-Чаяакчы дужааган болганда, сөглеттинип турар ыйнаан. 12Канчап билир, Дээрги-Чаяакчы мээң човалаңымны көрүп кааш, бөгүн ол кижиниң каргыжының орнунга меңээ ачы-буян бээр чадавас». 13Давид бодунуң улузу-биле оруун уламчылап чорупкан, а Шимей оларга чергелештир дагның эдээ-биле кылаштааш, Давидти бак сөглевишаан, даш-биле соккулап, олче довурак чажып чораан.

14Хаан болгаш ооң улузу шаг-шинээ төнүп, хемниң кежиг аксынга чедип келгеш, аңаа дыштаныры-биле доктаап алган.

Авессалом Иерусалимде

15Ол үеде Авессалом болгаш бүгү израильчилер Иерусалимче кирип келген, оларның аразында Ахитофел база чораан. 16Давидтиң өңнүү архи уктуг Хусий ^g Авессаломга чедип келгеш: «Хаан делгерезин! Хаан делгерезин!» – дээн ^h.

17Авессалом Хусийден: «Кончуг өңнүүңге бердингениң ол бе кай? Чүге ооң-биле кады чорбадың?» – деп айтырган.

18Хусий Авессаломга мынча деп харыылаан: «Чок, мен Дээрги-Чаяакчының болгаш бүгү израиль чоннуң шилип алган кижизиниң талазында мен. Мен силер-биле артар мен. 19Оон аңгыда мен кымга бараан боор мен? Ачаңарның оглунга эвес бе? Силерниң ачаңарга канчаар бараан бооп чораан мен, ынчалдыр силерге бараан боор мен».

20Оон Авессалом Ахитофелден: «Биске сүмеден кадып көр. Ам чүнү канчалзывысса экил?» – деп айтырган.

21Ахитофел мынча деп сүмелээн: «Ачаңарның ордуну ээлеп карактаары-биле арттырып каан кул-кадайлары-биле холбажып удуңар ⁱ. Ынчан бүгү Израиль силерни ачаңарның мурнунга бужар кижи апарган деп билип каар. Ынчангаш силерниң талаңарда турар хамык чоннуң холу дыңзый бээр».

22Авессаломга ордунуң серизиниң кырынга майгын тип бергеннер. Ол бүгү израиль чон көрүп турда, ачазының кул-кадайлары-биле удуур дээш майгынче кирген ^j.

23Ол үеде Ахитофелдиң берип турган сүмелерин Бурганның Бодунуң сөглээн сөзүнге дең деп санап турган. Давид-даа, Авессалом-даа ооң сүмезин ынчалдыр үнелеп дыңнаар турган.