2Sa 17 | TyvTUV | STEP | Ахитофел Авессаломга мынча дээн: «12 000 шеригден шилип аарын меңээ чөпшээреп көрүңер. Бо дүне мен Давидти сүрүп чоруптайн.

‏ 2 Samuel 17

Хусийниң Авессаломну будулдурганы

1 Ахитофел Авессаломга мынча дээн: «12 000 шеригден шилип аарын меңээ чөпшээреп көрүңер. Бо дүне мен Давидти сүрүп чоруптайн. 2 Амдыызында ол могап-турупкан болгаш кошкак турда, ону мен коргудуптарымга, ооң бүгү улузу тарады маңнажы бээр болдур ийин. Мен чүгле хаанны өлүрүп кааш, 3 бүгү чонну силерже ээлдириптер мен. Олар ону эдергени дег, силерже база эглип кээр. Силер ол чаңгыс кижиниң өлүмүн күзеп туруңарда, өске улус бүрүн артсын». 4 Ол сөстер Авессаломга болгаш Израильдиң бүгү баштыңнарынга дыка таарышкан.

5 Ынчалза-даа Авессалом: «Архи уктуг Хусийни ^a кыйгырыптыңар, ол чүү дээр эвес, дыңнап көрээлиңер» – дээн. 6 Хусий чедип кээрге, Авессалом: «Ахитофел ындыг сүме катты. Ооң чугаазын ёзугаар кылыр бис бе? Бир эвес хоржок деп бодаар болзуңза, сүмең кадып көрем» – деп оон айтырган.

7 Хусий Авессаломга: «Ахитофел бо удаада багай сүме берген-дир. 8 Силер ачаңарны болгаш ооң улузун билир болгай силер. Олар күштүг дайынчылар болгай. Ам олар, ховуда оолдарын хунааткан кыс адыг дег ^b, ажынып-хорадап турарлар. Ачаңар дээрге дуржулгалыг дайынчы болгай, ол шериглер-биле кады аңаа хонуп-даа чытпас-тыр ийин. 9 Ам ол куйда азы кандыг-бир черде чашты берген чыдар. Кажан силерниң шериглериңерниң чамдыызы бир дугаар тулчуушкунда өлүр болза, ону дыңнаан улус: „Авессаломну эдерип чорутканнар чылча шаптырган-дыр“дижир болгай. 10 Ынчан арзылаң дег чүректиг эң-не эрес-дидим дайынчы безин корга бээр, чүге дээрге силерниң ачаңар күчүлүг дайынчы, а ооң шериглери эрес-дидим улус дээрзин бүгү Израиль билир болгай.

11 Ынчангаш мен силерге мону сүмелээр-дир мен: бүгү израиль черден – Дандан Беэр-Шевага чедир ^c – далайның элезини дег, хөй санныг аг-шериг силерге чыглып келзин. Оларны силер бодуңар тулчуушкунче баштап кириңер. 12 Ынчан бис Давид каяа-даа чаштып чыдырда, аңаа удур үнүп, шалыңның черге дүжери дег бүзээлээш, халдаар бис. Ол боду-даа, ооң шериглериниң чаңгызы-даа дириг артпас. 13 Бир эвес ол хоорайже кире бээр болза, бүгү Израиль ол хоорайже хендирлер эккээр. Ынчан бис ону үрээш, чаңгыс-даа даш артпас кылдыр хемче киир сөөртүр бис».

14 Авессалом болгаш бүгү израильчилер: «Архи Хусийниң сүмези Ахитофелдиинден эки-дир» – дишкеннер. Авессаломга хора чедирер дээш, Ахитофелдиң чөптүг сүмезин Дээрги-Чаяакчы ынчалдыр будап каан чүве-дир ^d.

Хусийниң Давидче медээ чорутканы

15 Бурганның бараалгакчылары Садок биле Авиафарга Хусий мынча дээн: «Ахитофел Авессаломга болгаш Израильдиң баштыңнарынга ынчал-мынчал деп сүмелээн, а мен аңаа ынчал-мынчал деп өскээр сүмеледим. 16 Ынчангаш Давидче дүрген: „Ээн кургаг ховуда хемниң кежиг аксынга бо дүне хонма. Канчап-даа тургаш, хемни кеже бер“– деп дамчыдыңар. Оон башка хаан болгаш ооң хамык улузу узуткаттырар».

17 Ионафан биле Ахимаас ^e хоорайга көстүрүнден сестир болгаш, Эн-Рогел ^f деп кара суг кыдыынга турганнар. Бир чалча херээжен чүү болуп турарын дамчыдып чугаалаарга, олар Давидче дыңнадыр ужурлуг турганнар. 18 Оларны бир оол көрүп кааш, Авессаломга чугаалапкан. Ынчалза-даа олар кончуг дүрген чорупкаш, Бахуримге чедип келгеш, бир кижиниң бажыңының чанында казып каан кудук иштинче кирип, чаштына берген. 19 Бажыңның ээзи херээжен кудук кырынга шывыг хере чадыпкаш, ооң кырынга тараа чажып каан. Ынчангаш чүү-даа эскертинмес болган ^g.

20 Авессаломнуң улузу ол бажыңга келгеш, херээженден: «Ахимаас биле Ионафан канчалды?» – деп айтырган. Херээжен оларга: «Олар хемни кеже бердилер» – дээн. Демгилери дилеп-дилеп, кымны-даа тыппайн, Иерусалимче дедир чана берген.

21 Улус чоруй баарга, Ахимаас биле Ионафан кудуктан үнүп келгеш, Давид хаанга баргаш: «Дүрген тургаш, хемни кежип чоруптуңар. Ахитофел силерге удур ынчал-мынчал деп сүмелээн-дир» – деп чугаалаан. 22 Давид болгаш ооң бүгү улузу Иордан хемни кежип чорупкан. Даң бажынга чедир чаңгыс-даа кижи артпаан, шупту хемни кеже бергеннер.

23 Ахитофел бодунуң сүмези күүсеттинмээн боорга, элчигенин мунгаш, бодунуң хоорайында бажыңынче чана берген ^h. Ол ажыл-херээн аайлап-башкарып кааш, моңнуп өлү берген ⁱ. Ону адазының чевег-куюнга орнукшудуп каан чүве-дир.

24 Давид Маханаимге ^j чедип келген. А Авессалом болгаш ооң-биле кады бүгү израиль шериг Иордан хемни кежип келген. 25 Авессалом шериг баштыңчызы кылдыр Иоавтың орнунга Амессай деп кижини ^k салып алган. (Амессай дээрге измаилчи ^{▼▼ Өске бурунгу сөзүглелдерде «измаилчи» эвес, а «израильчи» азы «изреелчи» деп бижээн.} Иетер деп кижиниң оглу чүве-дир ^m. Иетер Наастың уруу, Саруйяның дуңмазы Авигеяны кадай кылдыр алган. А Саруйя Иоавтың авазы чүве-дир.) 26 Авессаломга баштаткан израильчилер галаад черге турлагжып алган.

27 Давид Маханаимге чедип келгенде, аммоннарның найысылалы Равва ⁿ чурттуг Наастың оглу Сови, Лодавар чурттуг Аммиилдиң оглу Махир ^o база Галаадтың Роглим чурттуг Верзеллий ^p олар 28 дөжек-кудус, аяк-шынак, дой савалар, кызыл-тас, арбай, далган, чочак-тараа, хооруп каан тараа, 29 ары чигири, ак чем, шээр мал, инек сүдүнден кылган быштак – эңдерик аъш-чемни Давидке болгаш ооң улузунга чизин дээш эккелгеннер ^q. Олар: «Ээн кургаг ховуда улус турупкан, аштаан-суксаан болгай» – дээннер.