2Sa 19 | TyvTUV | STEP | «Хаан Авессалом дээш ыглап-сыктап тур»

‏ 2 Samuel 19

Иоавтың Давидти чемелээни

1 «Хаан Авессалом дээш ыглап-сыктап тур» – деп Иоавка дамчытканнар. 2 Ол хүннүң тиилелгези бүгү чоннуң ыы-сыызынче шилчий берген. Чүге дээрге ол хүн бүгү улус хаанының оглу дээш кажыыдап турарын дыңнап каапкан. 3 Шериглер ол хүн, тулчуушкун үезинде дайын шөлүнден дезипкеш, ады баксыраан шериглер дег, хоорайже чаштынып кирип турган. 4 А хаан арнын дуглап алган: «Мээң оглум Авессалом! Авессалом, мээң оглум, мээң оглум!» – деп ыыткыр ыглап-сыктап турган.

5 Ынчан аңаа Иоав чедип келгеш, мынча дээн: «Сен бөгүн сээң амы-тыныңны, сээң ажы-төлүңнүң, кадайларыңның, кул-кадайларыңның амы-тынын мырыңай чаа-ла камгалап каан улузуңну бак атка киирип тур сен. 6 Сен бодуңну көөр хөңнү чок улуска ынак, а сеңээ ынак улусту көөр хөңнүң чок кижи-дир сен. Сен бөгүн сээң шериг баштыңчыларың болгаш дүжүметтериң сеңээ кымнар-даа эвес-тир дээрзин кончуг эки бадыткадың. Бөгүн бис шупту өлүп калгаш, Авессалом дириг арткан болза, сен аажок өөрүүр турган-дыр сен деп билип тур мен. 7 Бээр үнүп келгеш, улузуңну деткип, чугаалажып көр. Дээрги-Чаяакчының ады-биле ааш кыннып тур мен, бир эвес сен үнүп келбес болзуңза, бо дүне сээң-биле чаңгыс-даа кижи артпас деп бил. Ол дээрге аныяаңдан тура, амдыгаа дээр көрүп келген човалаңыңдан-даа артык коргунчуг чүве-дир».

8 Хаан туруп келгеш, хоорайның хаалгазының чанынга кээп олуруп алган ^a. Бүгү шериглерге «Хаан хаалга чанында олур» деп дыңнадыптарга, олар аңаа чедип келген. А израильчилер шупту бажыңнарынче дезе берген чүве-дир.

Давидтиң Иерусалимче ээп келгени

9 Израильдиң бүгү аймактарында чон маргыжып турган. Олар мынча дижип турганнар: «Хаан бисти дайзыннарның холундан адырып кагды, бисти филистимнерниң холундан адырып кагды ^b. Ам боду Авессаломнуң хайында бо чурттан дезе берген-дир. 10 Бистиң хаанывыс болзун дээш шилип алганывыс Авессалом дайынга өлген-дир. Давид хаанны дедир эгидип аар дээш, чүге чүнү-даа кылбайн турар силер?»

11 Давид хаан Бурганның бараалгакчылары Садок биле Авиафарже ^c мынча деп сөгледипкен: «Иудеяның баштыңнарынга мынча деп дамчыдыңар: „Хаанны ордузунче дедир эгидип аар дээн херекке чүге силер сөөлүнде киржир ужурлуг улус силер? Ооң дугайында бүгү Израильдиң чугаалап турары хаанга дыңналып келди ышкажыл. 12 Силер дээрге мээң хан төрелдерим болгай силер. Хаанны эгидип алыр херекке чүге силер сөөлүнде киржир ужурлуг улус силер?“ 13 Амессайга база: „Мээң хан төрелим эвес сен бе? ^d Сен бөгүнден эгелээш, кажан кезээде Иоавтың орнунга мээң шериим баштыңчызы болур сен ^e. Мегелептер болзумза, Дээрги-Чаяакчы мени канчаар-даа кезеткей аан ^f“деп чугаалаңар».

14 Давид бүгү иудейлерниң сеткил-сагыжын бодунче чаңгыс кижи дег ээлдирип алган. Олар хаанче: «Бодуңар хамык улузуңар-биле эглип келиңер» – деп сөгледипкен. 15 Хаан ээп келгеш, Иордан хемге чедип келген. Иудейлер хаанны уткуп алгаш, хемни кежирип аар дээш Галгалга ^g чыглып келген. 16 Бахурим чурттуг вениаминчи Гераның оглу Шимей ^h иудейлер-биле кады Давид хаанны уткуп аар дээш чедип келген. 17 Ооң-биле кады муң вениаминчи база Саулдуң өг-бүлезиниң чалчазы Сива ⁱ он беш оглу болгаш чээрби чалчазы-биле кады чедип келген. Олар далаш-биле хаанның чедип келгениниң мурнунда Иорданче чорупкан. 18 Олар хаанның өг-бүлезин кежирер дээш, аңаа таарымчалыг болзун дээш, хемниң ындынче кежип келген.

Гераның оглу Шимей, хаан Иордан хемни кежип кээри билек, ооң мурнунга кээп мөгейгеш, 19 аңаа чугаалаан: «Дээрги хааным, силер Иерусалимден чоруп туруңарда, мээң кылган чүүлүмнү ^j үүлгедиг деп санавайн көрүңер. Ону сеткилиңерге шыгжавайн көрүңер. 20 Чалчаңар мен бачыт үүлгеткенимни билир мен, ынчалза-даа дээрги хаанымны уткуур дээш, бөгүн мен Иосифтың салгалының ^{▼▼ Иосифтиң салгалы – Израильдиң соңгу аймактарын ынча дээн.} аразындан бир дугаарында чедип келдим».

21 Саруйяның оглу Авесса: «Дээрги-Чаяакчының чаап шилип кааны хаанны бак сөглээни дээш ^l, Шимей өлүр ужурлуг кижи эвес чүве бе?» – деп айтырган ^m.

22 Давид мынча дээн: «Ол мээң-даа, силерниң-даа херээңер эвес-тир, Саруйяның оолдары ⁿ. Бөгүн силер чүге мээң удурланыкчыларым апардыңар? Бөгүн Израильге чаңгыс-даа кижини өлүрүп болур деп бе? Бөгүн мен Израильдиң хааны мен деп билбейн турар кижи эвес мен?» 23 Хаан Шимейге: «Сен өлбес сен» – дээш, аңаа даңгыраан берген ^o.

24 Саулдуң оглунуң оглу Мемфивосфей ^p база хаанга уткуштур үнүп келген. Хаан чорупкаш, менди-чаагай ээп келгижеге дээр, ол качыгдалдан будун чугбаан, салын чүлүвээн база хевин-даа чугбаан чүве-дир. 25 Кажан Иерусалимниң чурттакчылары хаанны уткуур дээш чедип кээрге, хаан оон: «Мемфивосфей, сен чүге мээң-биле кады чорбадың?» – деп айтырган.

26 Ол мынчаар харыылаан: «Дээрги хааным! Чалчаңар мен аскак болгаш, „Элчигеним мунуп алгаш, хаан-биле кады чоруптар мен“деп чугаалап турдум. Ынчалза-даа мээң чалчам мени мегелеп каан. 27 Ол мени, силерниң чалчаңарны, хаанымның мурнунга нүгүлдеп каан-дыр ^q. Ындыг-даа болза, мээң дээрги хааным Бурганның төлээзи дег болгай ^r. Мени канчаарыңарны бодуңар билиңер. 28 Мээң төрел бөлүүм өлүмден өске мээң дээрги хаанымдан чүнү-даа чаалап албаан-даа болза, силер чалчаңар меңээ хаан-биле кады чемненир чоок улустуң аразынга олутту берген болгай силер ^s. Мен хаанымга моон ыңай чарбыттынар эргем чок».

29 Хаан аңаа: «Улаштыр чугаалаан херээң чок. Мен сеңээ Сива-биле кады шөлдерни үлежип аарын дужаап тур мен» – дээн.

30 Мемфивосфей хаанга: «Дээрги хаанымның менди-чаагай ээп чанып келгени дээш, Сива шөлдерниң дөгерезин-даа болза ап алгай аан» – деп харыылаан.

31 Хаанны Иордан хемни кежиришкеш, оон ыңай үдеп каар дээш, Галаад чурттуг Верзеллий база Роглимден чедип келген. 32 Верзеллий кырып назылаан, сезен харлыг турган. Ол дыка бай болгаш, хаан Манахаимге турда, ону бүгү талазы-биле хандырып турган чүве-дир ^t. 33 Хаан Верзеллийге: «Мээң-биле кады чорувут, Иерусалимге чуртта, сени мен хандырар мен» – дээн.

34 Верзеллий мынча деп харыылаан: «Хаан-биле кады Иерусалимче чорааш канчаар мен. Мен ам кайы хире үр чурттаар деп мен? 35 Ам сезен харлыг-дыр мен. Эки чүүлдү багайындан ылгап шыдаар мен бе? Ижип-чип орар чемимниң амданын ылгап билир мен бе? Эр, кыс ыраажыларның үнүн дыңнап шыдаар мен бе? Дээрги хаанымга аартык болган ажыым чүү боор? ^u 36 Силерниң чалчаңар мен хааны-биле кады чүгле Иордан хемни кежер мен, ырадыр барбас мен. Хаанның мени ынчаар шаңнаан херээ чүү боор? 37 Чалчаңарга дедир хоорайынче чоруткаш, ында ада-иезиниң хөөржүдүлге чериниң чанынга өлүрүн чөпшээреп көрүңер. А бо дээрге силерниң чалчаңар Кимгам-дыр ^v. Ол мээң дээрги хааным-биле кады чорупкай аан. Ооң-биле чүнү канчаарын бодуңар билиңер».

38 Хаан: «Кимгам мээң-биле кады чоруптарга, сен аңаа чүнү күзээр сен, ону кылыр мен. А сээң кандыг күзелиң бар болдур, шуптузун күүседип бээр мен» – деп чугаалаан.

39 Бүгү шериг Иордан хемни кеже бээрге, хаан база кежип келген. Хаан Верзеллийни ошкап кааш, ону алгап-йөрээп каан. Ооң соонда Верзеллий чана берген.

Израильчилер болгаш иудейлер аразында маргыштың эгелээни

40 Хаан Галгалче чорупкан. Ооң-биле кады Кимгам база чорупкан. Иудеяның бүгү шериглери база Израильдиң шериглериниң чартыы ооң-биле кады чорупкан. 41 Удаваанда израильчилер хаанга чедип келгеш: «Чүге төрелдеривис болур иудейлер хаанны оорлапкаш, силерни, өг-бүлеңерни база бүгү улузуңарны хемни кежирип кагдылар?» – деп айтырганнар.

42 Бүгү иудейлер израильчилерге: «Хаан бистиң чоок төреливис боорга, ынчалдывыс. Ол дээш чүге хорадаар силер? Бис хаанның чемин чип, оон белек-селек ап алган улус бис бе?» – деп харыылаан.

43 Израильчилер иудейлерге мынча дээн: «Хаанда бистиң он аймаавыс бар. Силерге көөрде, Давидке хамаарыштыр бистиң эргевис улуг болдур ийин. Бисти чүге куду көөр силер? Хаанны дедир эгидериниң дугайында чугааны баштай бис эгелээн улус эвес бис бе?» ^w

Ынчалза-даа иудейлерниң сөзү израильчилерге бодаарга, оон-даа кадыг, туруштуг болган.