2Sa 22 | TyvTUV | STEP | Дээрги-Чаяакчы Давидти ооң хамык дайзыннарының болгаш Саулдуң холундан адырып каарга, ооң Дээрги-Чаяакчыга ырлаан ырызының сөстери бо-дур.

1 Дээрги-Чаяакчы Давидти ооң хамык дайзыннарының болгаш Саулдуң холундан адырып каарга, ооң Дээрги-Чаяакчыга ырлаан ырызының сөстери бо-дур. 2 Ол мынча дээн:

– Дээрги-Чаяакчы – мээң быжыг шивээм,
хоргадалым, камгалалым.
3 Мээң Бурганым – чалым-хаям ^a.
Ол – дозуг-камгалалым ^b,
мени камгалап турар күчү-күш,
мээң чаглаам болгаш хоргадалым.
Сен мени күчүлээшкинден камгалап кагдың.
4 Макталга төлептиг Дээрги-Чаяакчыдан ^c
дуза дилеп кый деп,
дайзыннарымдан мени камгалаар идегелди
Оон алыр мен.

5 Өлүмнүң чалгыглары мени ораап алган,
өлүмнүг айыыл эккээр суглар мени сүртеткен ^d;
6 алдыы оранның кинчилери мени бектеп алган,
өлүмнүң дузаа мурнумда салдынган ^e.
7 Кызыышкынга алыскаш,
Дээрги-Чаяакчыдан дуза дилеп кый дидим,
мээң Бурганымдан дуза дилеп кышкырдым.
Ол Бодунуң өргээзинден мээң үнүмнү дыңнап кагды,
дилег-кыйгым Ооң кулаанга чеде берди ^f.

8 Чер шимчеп, сирилээн,
дээрниң дөжээ божаңнаан –
Дээрги-Чаяакчының килеңинден сирилеш дээн ^g.
9 Ол килеңнээрге, думчуундан – ыш,
аксындан – өрттендир чиир чалынныг от
аттыгып үнүп, изиг көстер кызаңайндыр хып турган ^h.
10 Ол кудай-дээрни чара тырткаш, дүжүп келген ⁱ,
кара булут кырынга буттарын салып алган ^j.
11 Дээрги-Чаяакчы херувимни ^{▼▼ Мында херувимни дайынчы аът-хөлге кылдыр көргүскен азы Дээрги-Чаяакчыны херувим сөөрткен чуузада олурар кылдыр көргүскен.} мунупкаш,
чалгынныг хатты хөлге кылгаш, көстүп келген ^l.
12 Ол дүмбей караңгыже,
дээрде чаъстыг, сырый булуттарже чаштып кире берген ^m.
13 Дээрги-Чаяакчының мурнунга чырык чайынналып,
чаңныктар чырыткыланып турган.
14 Дээрги-Чаяакчы кудай-дээрден диңмиттиг диңмирээн –
Дээди Өрүкүнүң үнү чыжыраан ⁿ.
15 Ол согуннарны салып ^o, дайзыннарын тарай сывырыпкан,
чаңныктарын дүжүрүп, оларны девидедипкен ^p.
16 Дээрги-Чаяакчының түрлүг үнүнден,
Ооң думчуундан аттыккан тыныштан
далай сыыгап, дүвү көстүп,
өртемчей өзээнге чедир ажыттынып келген ^q.

17 Бурган бедик дээрден ээккеш, мени сегирип алгаш,
терең ээрем суглардан ушта тыртып каан ^r;
18 Ол мени күчү-күштүг дайзыннардан,
күш-шыдалы менден ажыг өжээтеннерден камгалап каан ^s.
19 Дайзыннарым менче айыыл-халапка алысканым хүнде
халдап келген,
а Дээрги-Чаяакчы меңээ чөленгииш болган.
20 Ол мени шөлээн черже үндүрүп ^t, камгалап каан –
чүге дээрге мен Ооң сеткилинге кирген болган мен.

21 Дээрги-Чаяакчы чөптүүм дээш меңээ ачы-буян көргүскен,
холдарым арыы дээш мени шаңнаан ^u.
22 Мен Дээрги-Чаяакчының оруктарындан соора барбаан мен,
Бурганымның мурнунга бузутче чайгылбаан мен;
23 Ооң бүгү айтыышкыннарын эдерип чоруур мен,
Ооң дүрүм-хоойлуларындан ойталаваан мен.
24 Мен Ооң мурнунга кем-буруу чок мен ^v,
бачыт үүлгетпес дээш кичээнип чор мен;
25 Дээрги-Чаяакчы мээң чөптүүм,
Ооң мурнунга арыым көргеш, мени шаңнаан.

26 Сеңээ шынчы улуска Сен база шынчы сен,
ак сеткилдиг кижиге ак сеткилдиг сен;
27 арыг улуска арыг сен, а бузуттуг улуска хамаарылгаң багай;
28 биче сеткилдиг улусту камгалап турар сен,
а адыыргактарга удурланып, оларны куду көрүп турар сен ^w.

29 Дээрги-Чаяакчы, мээң чырыткым сен,
дүмбей өттүр меңээ чырыдып турар сен ^x, Дээрги-Чаяакчы.
30 Сээң ачыңда аг-шеригни базып каар мен,
Бурганым ачызында шивээлер ханаларын ажа халыыр мен.

31 Бурган! – Ооң оруу болбаазыраңгай ^y,
Дээрги-Чаяакчының сөзү арыг шынчы ^z;
Оон хоргадал алган бүгү улуска Ол – дозуг-камгалал ^aa.
32 Дээрги-Чаяакчыдан өске, Бурган кымыл ^ab;
Бурганывыстан өске, чалым-хая бар бе?

33 Бурган мээң быжыг хоргадалым-дыр,
Бодунуң оруун актыг улуска айтып берип турар;
34 буттарымны сыын буду дег кылып,
мени бедиктерже көдүрүп турар ^ac;
35 холдарымны чаа-дайынга өөредип турар,
хүлер чаны хере тыртыптар күштүг мен ^ad.

36 Сен меңээ Бодуңнуң дозуг-камгалалыңны тутсуп берген сен,
Сээң деткимчең мени өндүр улуг кижи кылып турар.
37 Сен мээң оруумдан доктар-моондакты чайладып,
балдырларымны сирилевес быжыг кылып каан сен.
38 Дайзыннарымны истеп-сүргеш, узуткап каар мен,
оларны узуткап кагбаан шаамда, дедир эгбес мен.
39 Оларны соп, чыттыр шаварымга, олчаан туруп шыдавастар –
буттарым адаанга калырлар.
40 Сен дайын чорудар күш-шыдалды
шыңганнарымга сиңирдиң,
менче халдап келгеннерни
мээң буттарым адаанга салып тур сен ^ae.
41 Дайзыннарымның ооргазын
меңээ көргүзүп, дезеринче албадаптың ^af,
өжээтеннеримни узуткап кагдым.
42 Олар дуза манаарга, камгалакчызы чок-тур;
Дээрги-Чаяакчыдан дуза дилээрге, оларга харыы бербес-тир ^ag.
43 Оларны, довурак-доозун дег,
тарадыр эстедиптер мен,
кудумчуда малгаш дег, чуура таптай базып кааптар мен! ^ah

44 Сен мени бодумнуң чонумнуң үймээнинден камгаладың,
аймак-чоннарның бажынга олурар кылдыр
мени камгалап кагдың;
безин билбес турганым чон ам меңээ бараан болуп турар ^ai;
45 өске чер чурттуглар меңээ чашпаалап турар ^aj,
мээң дугайымда дыңнап кааш,
дораан-на чагыртып турду.
46 Өске черлер улузунуң сузу бастынып,
шивээлеринден сириңейнип үнүп турду ^ak.

47 Дээрги-Чаяакчы дириг! Мээң чөленгииш-хаямга алдар!
Мени камгалап турар Бурган кымдан-даа арттыр мактатсын!
48 Ол – мен дээш өжээн негээр,
чоннарны меңээ башкартып турар ^al,
49 дайзыннарымдан мени адырып турар Бурган-дыр.
Мени Сен меңээ удурланган улустан бедидир көдүрүп,
күш дөгээр улустан камгалап турар сен ^am.

50 Ол дээш, Сени өске чоннар мурнунга
алдаржыдар мен, Дээрги-Чаяакчы,
Сээң адыңны алгап ырлаар мен ^an.
51 Дээрги-Чаяакчы шилип алган хаанынга
өндүр улуг тиилелгелерни шаңнап турар ^ao,
Ол Давидке болгаш ооң үре-салгалынга
кезээ мөңгеде энерелдиг! ^ap