2Sa 23 | TyvTUV | STEP | Давидтиң сөөлгү сөстери бо-дур: – Дээрги Өрүкүнүң көдүрүп кааны, Иаковтуң Бурганының чаап шилип каан кижизи, Израильдиң ындынныг үннүг ыраажызы – Иессейниң оглу Давид өттүр билип медеглеп тур:

‏ 2 Samuel 23

Давидтиң сөөлгү сөстери

1 Давидтиң сөөлгү сөстери бо-дур:

– Дээрги Өрүкүнүң көдүрүп кааны,
Иаковтуң Бурганының чаап шилип каан кижизи,
Израильдиң ындынныг үннүг ыраажызы ^{▼▼ Азы: «Израильдиң күштүг Бурганының ынак кижизи».} –
Иессейниң оглу Давид өттүр билип медеглеп тур:
2 Дээрги-Чаяакчының Сүлдези мени дамчыштыр чугаалап тур,
Ооң Сөзү мээң аксымдан үнүп тур ^b.
3 Израильдиң Бурганы, Израильдиң Хаязы ^c меңээ чугаалаан:
«Чонну чөптүг чагырар дээн кижи
Бургандан коргуушкун-биле чагырар ужурлуг ^d.
4 Ол булут чок аяс дээрде үнүп орган хүн дег,
эртенги хаяаның чырыы дег,
чаъс соонда оът-сиген өстүрер чырыткы дег».
5 Бурганның мурнунда мээң ук-салгалдарым ындыг эвес ийик бе?
Ол мээң-биле хажыдып болбас болгаш
быжыг дугуржулганы чарган болгай ^e.
Мээң камгалалым болгаш күзелдерим
Ооң ачызында бодарап турар.
6 А дүржок улус хол-биле туттунмас тенниг үнүш дег
үндүр октадыптар.
7 Ындыг үнүштерге чүгле демир баштыг чыда-биле дээп болур,
олар турар черинге бүрүнү-биле өрттеттирер.

Давидтиң маадырлары

(1 Чыл. 11:11-41; 27:1-15)

8 Давидтиң дайынчыларының аттары бо-дур.

Тахкамон уктуг Йошев-Башевет ^{▼▼ Өске бурунгу сөзүглелде «Йошев-Башевет» эвес, а «Иесваал» деп атты бижээн.} – алдарлыг үш маадырның аразында кол кижи. Ол 800 дайзынга удур чыдалыг дайылдашкаш ^{▼▼ Еврей дылда «чыдалыг дайылдашкаш» деп очулдурган сөстерниң утказы эки билдинмес. Болгу дег өске утказы мындыг: «Ооң өске ады – Эцин чурттуг Адино».}, оларны чаңгыс тулчуушкун үезинде өлүрүп каан.

9 Давид-биле чораан үш маадырның ийи дугаары – Ахохиниң Додо деп оглунуң оглу Элеазар турган. Израильчилер филистимнерни бак сөглээрге, демгилер тулчур дээш белеткенгеннер. 10 Израильчилер оларга удур үнүптерге, Элеазарның холу шылаарга-даа, хылыжын салбайн филистимнерни соп келген. Ол хүн Дээрги-Чаяакчы улуг тиилелгени берген. Тулчуушкун соонда шериглер Элеазарга чедип келгеш, өлүрткеннерни үптээн.

11 Үш дугаар кижи Гарар чурттуг Агениң оглу Шамма турган. Филистимнер чочак-тараа тарып каан шөлдүг Лехи деп черже баар деп турда, израиль шериг олардан дезипкен. 12 А Шамма шөлдүң ортузунга турупкаш, филистимнерни чылча шапкаш, шөлдү камгалап алган. Дээрги-Чаяакчы улуг тиилелгени берген.

13 Бир катап, дүжүт ажаалдазының үезинде, үжен шериг баштыңчызының аразындан ол үш маадыр Одоллам куюнга Давидке чедип келген ^h. Ол үеде филистимнерниң шериг бөлүү Рефаим шынаазынга турлагжып алган турган ⁱ. 14 (Давид быжыглалдыг шивээге, а филистимнерниң доскуул чери – Вифлеемге турган.) 15 Давид суг ижиксей бергеш: «Вифлеемниң хаалга аксында кудуктуң суун меңээ кым-бир кижи эккеп берген болза» – дээн. 16 Ынчан ол үш маадыр филистимнерниң турлаан таварып эрткеш, Вифлеемниң хаалга аксында кудуктуң суун ускаш, Давидке эккеп берген. Ынчалза-даа сугну ижеринден ол ойталаан, ону Дээрги-Чаяакчыга өргүл кылдыр төпкеш ^j, 17 мынча дээн: «Чок, мен ону ижип болбас мен, Дээрги-Чаяакчы! Ол суг дээрге боттарының амы-тынын артынга каапкаш чораан улустуң төккен ханы эвес бе?» Ынча дээш, ол сугну ишпейн барган. Шак ындыг чоруктарны ол үш маадыр кылып чораан чүве-дир.

18 Саруйяның оглу, Иоавтың акызы Авесса ^k ол үш маадырның даргазы турган. Ол 300 дайзынны бодунуң чыдазы-биле узуткап кааш, демги үш маадыр-биле деңге алдаржый берген. 19 Ол үш маадырдан-даа сураглыг апаргаш, оларның баштыңчызы апарган, ынчалза-даа үш маадырның санынче кирбээн.

20 Иодайның оглу, Кавцеилден ^l келген эрес-дидими-биле сурагжаан Ванея турган ^m. Ооң маадырлыг чоруктары хөй. Ванея арзылаң дег күштүг ийи моав кижини ^{▼▼ Өске бурунгу сөзүглелде «Ариил деп моав кижиниң ийи оглун» деп бижээн.} өлүрүп каан. Оон аңгыда хар чаап турган үеде, оңгарже киргеш, аңаа арзылаң база өлүрген. 21 Оон ыңай Ванея кончуг улуг-чаагай египет кижини база өлүрүп каан. Египет кижи холунга чыда тудуп алган турда, Ванеяда чүгле даянгыыш бар турган. Египет кижиниң чыдазын былаап алгаш, ол-ла чыдазы-биле ону өлүрүп каан ^o. 22 Иодайның оглу Ванея ындыг чорук кылган кижи-дир. Ол база демги үш маадыр дег алдаржый берген. 23 Ванея үжен шериг баштыңчызының аразындан сураглыг турган, ынчалза-даа демги үш маадырның санынче кирбээн. Давид ону бодунга чоок дүжүмет кылып алган.

24 Үжен шериг баштыңчызының санында: Иоавтың дуңмазы Асаил ^p, вифлеемчи Додонуң оглу Элханан, 25 Харод чурттуг Шамма биле Элика, 26 Палти чурттуг Хелец, Текоя чурттуг Иккештиң оглу Гира, 27 Анатот чурттуг Авиезер, Хуша чуртуг Мебуннай, 28 ахохи уктуг Селмон, Нетофа чурттуг Магарай, 29 Нетофа чурттуг Баананың оглу Хелев, Вениаминниң черинде Гива чурттуг Рибайның оглу Иттай, 30 Пирафон чурттуг Ванея, Нахле-Гааш чурттуг Иддай, 31 Арава чурттуг Ави-Албон, Бархум чурттуг Азмавет, 32 Шаалбон чурттуг Элияхба, Яшенниң оолдары, Ионафан, 33 Гарар чурттуг Шамма, Арар чурттуг Шарарның оглу Ахиам, 34 Мааха чурттуг Ахасбайның оглу Элифелет, Гило чурттуг Ахитофелдиң ^q оглу Элиам ^r, 35 Кармил чурттуг Хецро, Арба чурттуг Паарай, 36 Цова чурттуг Нафанның оглу Игал, гад чер чурттуг Бани, 37 аммон аймак-сөөктүг Целек, Беерот чурттуг Нахарай (ол Саруйяның оглу Иоавтың ок-чепсек тудукчузу турган), 38 итра уктуг Гира биле Гареб, 39 хет аймак-сөөктүг Урия ^s.

Шупту үжен чеди кижи чүве-дир.