2Sa 4 | TyvTUV | STEP | Саулдуң оглу Иевосфей Хевронга Авенирниң өлүп калганын дыңнап кааш, холу салдына берген, а бүгү израиль чон дүвүрелге алзыпкан.

‏ 2 Samuel 4

Иевосфейниң өлүрткени

1 Саулдуң оглу Иевосфей Хевронга Авенирниң өлүп калганын дыңнап кааш, холу салдына берген, а бүгү израиль чон дүвүрелге алзыпкан.

2 Иевосфейниң шериглерин баштаар ийи кижизи турган: бирээзиниң ады – Баана, өскезинии – Рихав. Олар Беерот чурттуг вениаминчи Реммоннуң оолдары турган. (Беерот хоорай Вениаминниң аймаанга хамааржыр чүве-дир ^a. 3 Ооң үндезин чурттакчылары Гиффаимче ^b дезе берген, бо хүннерге чедир ында чурттап чоруур.)

4 А Саулдуң база бир салгакчызы – ооң оглу Ионафанның аскак оглу турган чүве-дир ^c. Изреелден Саул биле Ионафанның өлүмүнүң дугайында медээ чедип келгенде, ол оол беш харлыг турган. Ажаакчызы ону алгаш, далажып дезип турган үезинде оол кээп ушкаш, аскак апарган. Ооң адын Мемфивосфей дээр.

5 Бир катап бееротчу Реммоннуң оолдары Рихав биле Баана хүн хөөрей берген өйде, Иевосфейниң бажыңынга чеде бергеннер. Дүъш үезинде ол орунунда дыштанып чыткан. 6 Рихав биле Баана алышкылар бажың иштинче тараа алыр дээн улус бооп кире бергеш, Иевосфейниң иштинче шанчып каапкаш, дезе бергеннер. 7 (Олар бажыңче кирип кээрге, Иевосфей удуур өрээлинде орунунда дыштанып чыткан. Ооң иштинче шанчып өлүрүп кааш, бажын ооруп алгаш, Иордан шынаазында оруктап дүннү өттүр чоруп келгеннер.) 8 Иевосфейниң бажын Хевронда Давидке эккеп бергеш, аңаа мынча дээннер: «Силерниң амы-тыныңарга чедиксеп турган дайзыныңар Саулдуң оглу Иевосфейниң бажы бо-дур. Бөгүн Дээрги-Чаяакчы бистиң дээрги хаанывыс дээш Саулдан болгаш ооң салгалдарындан өжээнни негеп алды».

9 Бееротчу Реммоннуң оолдары Рихав биле Баана алышкыларга Давид мынча деп харыылаан: «Мээң амы-тынымны кандыг-даа айыылдан адырып каан Дээрги-Чаяакчының ады-биле даңгыраглап тур мен ^d – 10 кажан бир кижи меңээ эки медээ эккелдим деп бодап: „Саул өлген“дээрге, ындыг „эки“медээ дээш ону сегирип алгаш, Циклагка өлүрүп каан болгай мен ^e. 11 Ам бак-бузуттуг улус буруу чок кижини бодунуң-на бажыңынга орунунга чыдырда, өлүрүп каарга, ооң төккен ханы дээш оларны кезедип, чер кырын олардан арыглавас кижи мен бе?!» 12 Ынча дээш, Давид бодунуң улузунга дужаал бээрге, олар Рихав биле Баана алышкыларны өлүргеш, оларның хол-буттарын одура шапкаш, мага-боттарын Хевронда хөөлбек суг чанынга азып каан. А Иевосфейниң бажын алгаш, Хевронда Авенирниң чевег-куюнга ажаап кааннар.