2Sa 5 | TyvTUV | STEP | Израильдиң бүгү аймактары Хевронда Давидке чедип келгеш: «Бо-дур бис, силерниң хан төрелиңер улус-тур бис

‏ 2 Samuel 5

Давидтиң бүгү Израильдиң хааны апарганы

(1 Чыл. 11:1-3)

1 Израильдиң бүгү аймактары Хевронда Давидке чедип келгеш: «Бо-дур бис, силерниң хан төрелиңер улус-тур бис – дээннер. – 2 Шагдан бээр-ле, Саул бистиң хаанывыс турар үелерде безин, израильчилерни дайын-чаага баштап турган кижи силер силер ^a. Дээрги-Чаяакчы силерге: „Сен Мээң израиль чонумну кадарар сен ^b. Израильдиң чагырыкчызы сен болур сен“– деп чугаалап турду». 3 Израильдиң бүгү баштыңнары Хевронда хаанга чедип кээрге, Давид хаан олар-биле Дээрги-Чаяакчының мурнунга керээ чарып алган. Олар Давидти Израильдиң хааны болур кылдыр чаап каан.

4 Хааннап эгелеп турда, Давид үжен харлыг турган. Ол дөртен чыл иштинде хааннаан ^c. 5 Хевронга Иудеяны чеди чыл алды ай иштинде чагырып келген ^d. А Иерусалимге үжен үш чыл иштинде бүгү Израильди болгаш Иудеяны чагырып хааннаан.

Давидтиң Иерусалимни эжелеп алганы

(1 Чыл. 11:4-9)

6 Хаан шериглери-биле Иерусалимде чурттап турар иевус чонга удур дайынче үнүпкен ^e. Иевустар Давидке: «Сен бээр кирбес сен. Сени согур, аскак улус безин сывырып чорудуп боор» – дээннер. Ол дээрге «Давид бээр кирип шыдавас» дээни ол чүве-дир. 7 Ынчалза-даа Давид Сион шивээзин эжелеп алган. Ол болза Давидтиң Хоорайы-дыр ^{▼▼ Сион дагда турар Иерусалимниң эрги талазы. Ында шивээ болгаш хаанның ордузу бар турган.}. 8 Ол хүн Давид мынча дээн: «Иевустарны өлүрер дээн кижи бүрүзү хоорайның суун ^{▼▼ Бо домактың утказы эки билдинмес. Хоорайның суу – хоорайны суг-биле хандырып турар камгалалдыг чер чадавас.} таварып эрте бергеш, Давидти көөр хөңнү чок „ол согур, аскак“улусту чыда-биле шанчып өлүрзүн!» (Ол үеден бээр «Согур-даа, аскак-даа кижи ордуже кирбес» деп чугаа тывылган чүве-дир.) 9 Давид ол шивээге турумчуп алгаш, ону Давидтиң Хоорайы деп адап алган. Ол Милло шивээзинден эгелеп ^h, хоорайны долгандыр быжыг камгалал кылып алган. 10 Давид улам-на күштүг бооп кел чыткан ⁱ, Аг-шериглиг Дээрги-Бурган-Чаяакчы ооң-биле кады болуп турган.

Давид өг-бүлези-биле Иерусалимде

(1 Чыл. 14:1-7)

11 Тирниң хааны Хирам ^j Давидче бодунуң элчилери-биле бызаңчы, дашчы улузун чорудупкан. Олар пөш чудуктар эккелгеш, Давидке орду тудуп бергеннер. 12 Ынчан Дээрги-Чаяакчы ону Израильдиң хааны кылдыр быжыглап, Бодунуң израиль чону дээш, ооң чагыргазын өрү көдүрүп каан-дыр деп Давид билип каапкан.

13 Хеврондан чедип келгениниң соонда, Давид Иерусалимден база кадайлар, кул-кадайлар ап алган. 14 Аңаа өске оолдар, кыстары төрүттүнген. Иерусалимге төрүттүнген ажы-төлүнүң аттары бо-дур ^k: Шаммуй, Шовав, Нафан, Соломон, 15 Ивхар, Элишуа, Нефег, Иафиа, 16 Элишама, Элиада болгаш Элифелет.

Филистимнерни тиилээни

(1 Чыл. 14:8-17)

17 Давидти Израильдиң хааны кылып каан деп дыңнааш, шупту филистимнер ону дилеп эгелээннер. Давид ону дыңнааш, шивээже кире берген. 18 Филистимнер Рефаим шынаазынга ^l чедип келгеш, аңаа турумчуп алган ^m. 19 Ынчан Давид Дээрги-Чаяакчыдан: «Филистимнер-биле тулчууйн бе? Оларны мээң холумга хүлээдип бээр сен бе?» – деп айтырган. Дээрги-Чаяакчы Давидке: «Бар. Филистимнерни сээң холуңга албан хүлээдип бээр мен» – деп чугаалаан. 20 Давид Ваал-Перацимче келгеш ⁿ, филистимнерни аңаа чылча шаап каан. Давид ынчан: «Дээрги-Чаяакчы дайзыннарымны мээң мурнумга, сугнуң чууй шавары дег, ууй шаап кагды» – дээн. Ынчангаш ол черни Ваал-Перацим деп адап каан ^{▼▼ Ваал-Перацим – «Дээрги ууй шапкан» дээн.}. 21 Филистимнер ол черге боттарының дүрзү-бурганнарын каапкаш баарга, Давид бодунуң шериглери-биле оларны ап алган.

22 Филистимнер катап база чедип келгеш, Рефаим шынаазынга турумчуп алганнар. 23 Давид Дээрги-Чаяакчыдан сүме айтырарга, Ол: «Оларже уткуштур үнме. Оюп чоруткаш, оларның артындан – бальзам ыяштарлыг талазындан халда. 24 Бальзам ыяштарның кырынга кылаш даажын дыңнап кааш-ла ^p, халдап кирер сен – ол дааш дээрге филистим шеригни чылча шавар дээш, Дээрги-Чаяакчы сээң мурнуңда чоруп орары ол-дур» – дээн. 25 Давид Дээрги-Чаяакчының чугаалаанын ёзугаар кылгаш, филистимнерни Гевадан Гезерге чедир чылча шаап каан.