2Sa 5:11-16 | TyvTUV | STEP | Тирниң хааны Хирам Давидче бодунуң элчилери-биле бызаңчы, дашчы улузун чорудупкан. Олар пөш чудуктар эккелгеш, Давидке орду тудуп бергеннер.

‏ 2 Samuel 5:11-16

Давид өг-бүлези-биле Иерусалимде

(1 Чыл. 14:1-7)

11 Тирниң хааны Хирам ^a Давидче бодунуң элчилери-биле бызаңчы, дашчы улузун чорудупкан. Олар пөш чудуктар эккелгеш, Давидке орду тудуп бергеннер. 12 Ынчан Дээрги-Чаяакчы ону Израильдиң хааны кылдыр быжыглап, Бодунуң израиль чону дээш, ооң чагыргазын өрү көдүрүп каан-дыр деп Давид билип каапкан.

13 Хеврондан чедип келгениниң соонда, Давид Иерусалимден база кадайлар, кул-кадайлар ап алган. 14 Аңаа өске оолдар, кыстары төрүттүнген. Иерусалимге төрүттүнген ажы-төлүнүң аттары бо-дур ^b: Шаммуй, Шовав, Нафан, Соломон, 15 Ивхар, Элишуа, Нефег, Иафиа, 16 Элишама, Элиада болгаш Элифелет.