2Sa 8 | TyvTUV | STEP | Элээн үе эрткенде, Давид филистимнерни чылча шаап, томаарткаш, оларның Метег-Гаамма деп хоорайын эжелеп алган.

‏ 2 Samuel 8

Давидтиң дайынчы чедиишкиннери

(1 Чыл. 18:1-13)

1 Элээн үе эрткенде, Давид филистимнерни чылча шаап, томаарткаш, оларның Метег-Гаамма деп хоорайын ^{▼▼ Азы: «Оларның найысылал хоорайын».} эжелеп алган. 2 Оон ыңай Давид моавтарны база чылча шапкан. Оларны черге чыттыргаш, хендир-биле хемчээп турган. Хендирниң ийи катап узунунга дең болганнарны өлүрүп, а үш катап дең болганнарны амы-тынныг арттырып турган. Моавтар Давидтиң үндүт төлээр чалчалары апарган.

3 Цованың хааны, Реховтуң оглу Адраазар Евфрат хемниң унунга бодунуң чагыргазын катап тургузуп аар дээш кел чорда, Давид ону база чылча шаап каан ^b. 4 Давид ол хаанның 1700 аъттыг база 20 000 чадаг шериглерин тудуп алган. Ол дайынчы тергелиг аъттарның балдырларының сиирлерин үзе кезип каапкан ^c, олардан чүгле чүс аътты бодунга арттырып алган ^{▼▼ Азы: «Ол дайынчы тергелерни узуткап каапкан, олардан чүгле чүс терге бодунга арттырып алган».}. 5 Цованың хааны Адраазарга дузалажыр дээш Дамаскыда чурттап турар арамей чон чедип кээрге, Давид 22 000 арамейни чылча шаап каан. 6 Давид арамей хоорай Дамаскыга камгалал шериин тургузуп каан, ынчалдыр арамейлер Давидтиң үндүт төлээр чалчалары апарган. Давид кайнаар-даа баарга, Дээрги-Чаяакчы аңаа тиилелге берип турган. 7 Давид Адраазарның улузундан алдын дозуг-камгалалдарын ап алгаш, оларны Иерусалимге эккелген ^e. 8 Адраазарның Бетах база Беротай деп хоорайларындан Давид хаан дыка хөй хүлер ап алган.

9 Давид Адраазарның бүгү шериин чылча шаап каан деп, Хаматтың хааны Той дыңнап каапкан. 10 Адраазар-биле дайылдашкаш, ону чылча шапканы дээш Давид хаанга байыр чедирип, ону алгап-йөрээри-биле Той хаан бодунуң оглу Иорамны олче чорудупкан, чүге дээрге Той Адраазар-биле дайылдажып турган. Иорам белек кылдыр мөңгүн, алдын база хүлер савалар эккелген. 11 – 12 Давид хаан ол саваларны бүгү-ле чагырып алганы: арамей, моав, аммон, филистим, амалик чоннардан база Реховтуң оглу, Цованың хааны Адраазардан хавырып алганы алдын-мөңгүнү-биле кады Дээрги-Чаяакчыга тураскааткан ^f.

13 Дус шынаазынга ^g 18 000 эдом шеригни ^{▼▼ Өске бурунгу сөзүглелдерде «эдом» эвес, «арамей» деп бижээн.} чылча шапкаш, ээп келгениниң соонда, Давид алдаржый берген. 14 Ол бүгү эдом черге камгалал шериин тургузуп каан, ынчалдыр эдом чурттуглар шуптузу Давидтиң чалчалары апарган ⁱ. Давид кайнаар-даа баарга, Дээрги-Чаяакчы аңаа тиилелгени берген.

Давидтиң чоок дүжүметтери

(2 Хаан. 20:23-26; 1 Чыл. 18:14-17)

15 Давид хаан бодунуң чонун шын шиидип, олар дээш чөптүг чорукту тургузуп, бүгү Израильди чагырып-башкарып турган ^j. 16 Саруйяның оглу Иоав шериглер даргазы турган ^k. Ахилудтуң оглу Иосафат төөгү бижээчизи турган ^l. 17 Ахитувтуң оглу Садок ^m биле Авиафарның оглу Ахимелех – Бурганның бараалгакчылары ⁿ, а Серайя – бижээчи турган. 18 Иодайның оглу Ванея ^o керет, пелет уктуг шериглерниң ^{▼▼ Кереттер болгаш пелеттер – хаанның камгалакчылары турган өске аймак-сөөктүг шериглер чадавас (1 Хаан. 30:14 көр).} баштыңчызы турган. А Давидтиң оолдары Бурганның бараалгакчылары турган.