2Th 3 | TyvTUV | STEP | Ха-дуңма, түңнелинде бис дээш мөргүүрүңерни дилеп тур бис . Дээрги-Чаяакчының медээзи оккуру-биле нептереп, силерниң араңарга дег, алдаржый берзин.

‏ 2 Thessalonians 3

Бис дээш мөргүңер

1 Ха-дуңма, түңнелинде бис дээш мөргүүрүңерни дилеп тур бис ^a. Дээрги-Чаяакчының медээзи оккуру-биле нептереп, силерниң араңарга дег, алдаржый берзин. 2 Оон аңгыда будалган болгаш бузуттуг-бак улустан Бурган бисти камгалазын дээш мөргүңер ^b: чамдык улус Буянныг Медээге бүзүревес-ле болгай.

3 Ынчалза-даа Дээрги-Чаяакчы сөзүнге шынчы ^c. Ол силерни быжыктырар база бузуттуг эрликтен кадагалаар ^d. 4 А бис силерниң айыткан чүүлүвүстү күүседип келгениңерге база ам-даа күүседириңерге Дээрги-Чаяакчының мурнунга ыяк бүзүрелдиг бис. 5 Дээрги-Бурган-Чаяакчы чүректериңерге Бодунуң бээри ынакшылче база Христостуң бээри шыдамык чорукче орукту айтып берзин ^e.

Ажыл чок орбаңар

6 Ха-дуңма, Дээргивис Иисус Христостуң ады-биле силерге айыткап тур бис: кылыр ажыл чок амыдырап чоруур ^f база бистен шиңгээдип алганы өөредигни эдербес ха-дуңмаңарның чанынче чагдаваңар. 7 Бисти канчаар өттүнер ужурлууңарны боттарыңар билир-ле болгай силер ^g. Чүге дээрге силерниң араңарга чалгаа улус диртпээн бис. 8 Кымның-даа кескинди хлевин халаска чип, азыратпадывыс, харын кайы-бирээңерге аартык болбас дээш, дүне-хүндүс дивейн, карак кызыл ажылдап келдивис ^h. 9 Силерден дуза дилээр эргевис чогундан-даа эвес ⁱ, а бистен үлегер аарыңарны күзээш, ынчаар кылдывыс ^j. 10 Кады турар үевисте, силерге мындыг дүрүм арттырган бис: «Кым ажылдаар хөңнү чогул, ол чем чивезин!» ^k

11 А ам араңарда чамдык улустуң кылыр ажыл чок чурттап турары биске дыңналып тур. Олар боттары каяа-даа ажылдавайн, өскелерниң ажыл-херээнче холгаарлаарынга өйлежип турар дээр-дир ^l. 12 Ындыг улусту химиренмейн ажылдап, амыдыраар кошкулун боттары тыпсын деп, Дээрги Иисус Христостуң адындан дужаап база кыйгырып тур бис. 13 А силер, ха-дуңма, буян тарыырын могаг-шылаг чокка уламчылаңар-ла ^m.

14 Бо чагаада айтыышкыннарывысты дыңнавас кандыг-бир кижи бар болза, ону демдектей көрүп алыңар. Аңаа ыянчыг болзун дээш, ооң-биле харылзашпаңар. 15 Ындыг-даа болза, аңаа дайзыныңарга дег хамаарылга көргүспеңер, а ха-дуңмаңарны дег, билиндир сургаңар ⁿ.

Түңнел байыр чедириишкиннери

16 Амыр-тайбыңның үнер дөзү боор Дээрги-Чаяакчы ^o Боду амыр-тайбыңны силерге кажан-даа, кандыг-даа арга-биле хайырлазын. Дээрги-Чаяакчы шуптуңар-биле кады болзун! 17 Бодумнуң холум-биле бижип олур мен ^p: Павелден байыр. Ол чагаа мээңии-дир деп көргүзер дээш, чагааларымның шуптузун ынчаар демдектеп тур мен. 18 Дээргивис Иисус Христостуң авыралы силер бүгүдеге доктаазын! ^{▼▼ Өске бурунгу сөзүглелдерде бо шүлүк «аминь» деп сөс-биле төнген.}