2Ti 1 | TyvTUV | STEP | Христос Иисус-биле сырый харылзаалыг апаргаш, Бурганның аазааны мөңге амыдыралды медеглээри-биле Ооң күзел-соруун ёзугаар айбылаткан кижиден, Христос Иисустуң элчини Павелден байыр.

‏ 2 Timothy 1

Киирилде сөстер

1 Христос Иисус-биле сырый харылзаалыг апаргаш, Бурганның аазааны мөңге амыдыралды медеглээри-биле ^a Ооң күзел-соруун ёзугаар айбылаткан кижиден, Христос Иисустуң элчини Павелден байыр. 2 Ханы ынак оглум Тимофей сеңээ бижидим ^b. Бурган Адавыстан база Дээргивис Христос Иисустан келген авырал, өршээл база амыр-тайбың сеңээ доктаазын! ^c

Буянныг Медээни суртаалдаарынга шынчы чорук

3 Сени сактып, дүне, хүндүс үргүлчү мөргүл кылган санымда-ла ^d, ада-өгбем дег, арыг арын-нүүр-биле ^e бараан бооп чоруурум Бурганга өөрүп четтирер-дир мен ^f. 4 Карааң чажын сактып чор мен, ол ышкаш сени аажок көрүксеп тур мен: ужурал мени өөрүшкү-биле бүргептер боор! 5 Сеткилиң ханызындан бүзүрээниңни сактыр-дыр мен: кырган-аваң Лоида биле аваң Эвника ^g база ынчалдыр бүзүреп чораан болгай. Оларныы дег бүзүрел сенде база бар дээрзинге ыяк бүзүрээр мен.

6 Аңаа сылдап алгаш, сагындырып ор мен: холдарымны сеңээ дегзиримге ^h, Бургандан алганың ачы-буянныг белектиң одун өжүрбейн көр. 7 Бурган биске коргуушкуннуң сүлдезин эвес, а күчү-күштүң, ынакшылдың, бодамчалыг боорунуң Сүлдезин берген болгай ⁱ. 8 Ынчангаш Дээргивисти херечилээринден ыятпа ^j, Ол дээш хоругдаттырган менден база ыятпа. Харын Бурганның сеңээ бээри күшке даянгаш, Буянныг Медээни суртаалдааным ужун хилинчээмни үлежип көр ^k. 9 Бурган бисти камгалааш, Ооң ыдыктыг улузу боору-биле кыйгырып алган. Ол ону бистиң кылган ажыл-херээвис дээш эвес ^l, а Ооң Бодунуң сорулгазы база авыралы дээш кылган. Ол биске ук авыралын Христос Иисусту дамчыштыр үе-шагның мурнунда хайырлаан. 10 А ам Бурган оозун Камгалакчывыс Христос Иисустуң биске чедип келгенин дамчыштыр көргүскен. Христос өлүмнү күш чок болдурган ^m база Буянныг Медээни дамчыштыр мөңге амыдырал биле өлүм чок чоруктуң чырыын бо делегейге эккелген ⁿ.

11 Бурган мени ол Буянныг Медээниң медээчизи, элчини база башкызы ^{▼▼ Өске бурунгу сөзүглелдерде «Башкызы» деп сөске «Өске чоннар улузунуң» деп сөстерни немээн.} кылдыр шилип томуйлап каан! ^p 12 Мен ам ол бүгү чүүлдер дээш, хилинчек көрүп тур мен ^q. Ынчалза-даа ол дээш ыятпас мен ^r, чүге дээрге Кымга бүзүрээнимни билир болгаш, сөөлгү хүнге чедир Ооң меңээ идегээн чүүлүн ^{▼▼ Азы: «Мээң Бурганга идегээн чүүлүмнү».} кадагалап шыдаарынга бүзүрээр мен ^t.

13 Менден дыңнааның сөстерден туттун, олар сеңээ шынныг өөредигниң үлегери болзун, Христос Иисус-биле сырый харылзаалыг апаргаш, бүзүрелдиг база ынакшылдыг бооп амыдыра. 14 Сеңээ идегээн бүгү буянны бисче сиңнигип кире берген Ыдыктыг Сүлдениң күжү-биле кадагала ^u.

15 Асия девискээринде хамык улус, ооң иштинде Фигелл биле Эрмоген, мени каапкаш барганын билир сен ^v. 16 Онисифорнуң өг-бүлезинге ^w Дээрги-Чаяакчы Бодунуң өршээлин көргүссүн, чүге дээрге ол мени чеже-даа катап часкарып келген база мээң кинчилерим көргеш-даа ^x, менден ыятпаан болгай ^y. 17 Ол Римге кээп чорааш, кызымак дилеп тургаш, мени тып алган. 18 Сөөлгү хүн кээрге, Дээрги-Чаяакчы аңаа Бодунуң өршээлин хайырлазын. Ооң Эфеске меңээ кайы хире дузалаанын бодуң кончуг эки билир сен.