‏

Ийиги чагаазында дег, Иоанн элчин бодун чүгле «эң улууңар» деп адап турар. Ол бо чагааны бир христиан ниитилелдиң Гаий деп кежигүнүнге бижээн. Иоанн ону ынакшылдың илерээшкини дээш база аян-чоруктар кылып, Буянныг Медээни тарадып турар танывазы христианнарга деткимчези дээш мактап, Диотреф деп кижиниң төлеп чок аажы-чаңының дугайында аңаа сагындырып турар.

‏ 3 John

Байыр чедириишкини

1Шынап-ла ынакшааным эжим Гаийге эң улууңардан байыр ^a.

2Ханы ынак эжим! Сеткил-чүрээңниң кадыы дег, мага-бодуңнуң кадык болуру дээш база бүгү-ле чүүлдерге чедиишкинниг болуруң дээш мөргүп тур мен. 3Чамдык бүзүрээн ха-дуңмавыс биске келгеш, алыс шынга бердингениңни база алыс шынның оруу-биле бар чыдарыңны херечилээрге, аажок өөрүдүм. 4Ажы-төлүм алыс шынның оруун эдерген деп билип аарындан артык өөрүшкү меңээ турбас! ^b

5Ханы ынак эжим! Олар-биле танышпас-даа болзуңза, бүзүрээн ха-дуңмавыстың чаагай чоруу дээш ^c ак сеткилдиг ажылдап чоруур-дур сен. 6Ам оларның чорук-херээн уламчылаарынга дузалажыр болзуңза, ол чорууң Бурганның мурнунга төлептиг болур. 7Чүге дээрге олар Христоска бараан болур дээш, чер кезип чорупкаш, Христоска бүзүревестерден чүнү-даа албайн чоруур улус-тур. 8Ындыг улусту деткиир ужурлуг бис. Ынчангаш бис оларның алыс шынга бараан болуушкунунуң киржикчилери боор бис ^d.

Бакты эвес, а экини өттүнери

9Мен христиан ниитилелче чагаа бижидим, ынчалза-даа оларны удуртуксап турар Диотреф дээрзи бистиң чугаалаан чүвевисти хүлээп албас-тыр. 10Ылап-ла ынчангаш, мен ынаар чеде берзимзе, ооң чүнү кылып турарының дугайында сагындырар мен. Ол бисти бак сөстер-биле нүгүлдеп тур, ынчалза-даа ол безин аңаа эвээш болган де. Диотреф боду-даа ха-дуңмавысты хүлээп албайн турар, өске улустуң-даа ону кылырынга шаптык кадып, оларны христиан ниитилелден үндүр сывыртап турар!

11Ханы ынак эжим! Кандыг-даа бузутту эвес, а чүгле буянны өттүнүп көр ^e. Буянныг херектер кылып турар кижи Бургандан укталган болур ^f. Бузут үүлгедип турар кижи Бурганны көрбээн боор ^g.

12Димитрийни шупту улус эки кижи деп үнелээр болду, алыс шын боду-ла ол дугайында херечилеп турар-дыр; бис база ол дээш дагдындывыс, а херечилеливис шынныг дээрзин билир болгай сен ^h.

Түңнел байыр чедириишкини

13Оон-даа хөй чүве дугайында сеңээ бижип, чугаалап болур турдум, ынчалза-даа ону демир-үжүк-биле саазынга бижиир хөңнүм чогул ⁱ. 14Удавас сээң-биле арын көржүп ужуражырымга база аравыста хөөрежи бээривиске идегеп тур мен. 15Амыр-тайбыңны күзедим. Сээң өңнүктериң байыр чедирип тур. Шупту эш-өөрүвүске, кижи бүрүзүнге тус-тузунда, байырдан чедирип көр ▼

▼ Өске бурунгу сөзүглелдерде бо сөстерге «Аминь» деп сөстү немээн.

.