Act 1 | TyvTUV | STEP

‏ Acts 1

Киирилде сөстер

1 – 2 Феофил ^a, баштайгы номумга Иисустуң эң эгезинден эгелээш, Бодунуң шилип алган элчиннеринге Ыдыктыг Сүлде дамчыштыр айтыышкыннарын бергеш, дээрже көдүрлүп үнгени хүнге чедир ^b чүнү кылып база чүү чүвеге өөредип турганын силерге дөгерезин бижип берген мен. 3 Хилинчек көрүп, өлген соонда, Иисус ол улуска чедип кээп, хөй-ле бүзүренчиг барымдаалар-биле Бодун дириг кылдыр көргүскен ^c. Ол оларга дөртен хонук дургузунда чедип кээп, Бурганның Чагыргазының дугайында чугаалап турган.

Христостуң дээрже көдүрүлгени

4 Оон бир-ле катап, олар-биле кады чемненип оргаш ^{▼▼ Азы: «Оларны чаңгыс черге чыып алгаш».}, Иисус мындыг айтыышкын берген: «Иерусалимни кагбаңар ^e, а Мээң чугаалааным дег, Мээң Адамның силерге аазааны Ыдыктыг Сүлдениң кээрин манаңар. 5 Иоанн силерни сугже суп турган ^f, а Мээң Адам, каш хүн эртерге, силерни Ыдыктыг Сүлдеже сугар-дыр» ^g.

6 Өөреникчилер база катап Иисус-биле ужуражып келгеш: «Дээрги, израиль күрүнени катап тургузарың үе-шаг ам келбээн бе?» – деп айтырганнар ^h.

7 Ол оларга мынча дээн: «Аданың Бодунуң эрге-чагыргазы-биле доктаатканы үелер болгаш хуусааларны билири – силерниң херээңер эвес-тир! ⁱ 8 Ынчаарга Ыдыктыг Сүлде силерже бадып кээрге, күчү-күштү хүлээп алгаш, Иерусалимге, бүгү Иудеяга, Самарияга ^j база чер-делегейниң кыдыынга чедир Мээң херечилерим боор силер» ^k.

9 Ынча дээш, Иисус оларның караанга көзүлдүр дээрже көдүрлүп үнгеш, булутче ажытталы берген ^l. 10 Олар дээрже топтап көрүп турда, хенертен ак хептиг ийи эр кижи оларга көстүп келгеш ^m, 11 мынча дээннер: «Галилейжилер, чүге мында дээрже кайгап тур силер? Силерниң мурнуңарга дээрже көдүрлү берген Иисус, Ооң ам канчаар чоруй барганын көргениңер дег, шак-ла ынчаар дедир ээп кээр» ⁿ.

Иуданың орнунга элчинни шилип алганы

12 Ооң соонда Иисустуң өөреникчилери Елеон даандан ^o баткаш, Иерусалимче ээп келгеннер. Ол даг Иерусалимден амыр-дыш хүнүнде эртерин чөпшээрээн чер хире ырак турган ^{▼▼ Иудей раввиннерниң ыдыктыг хоойлуну боттарының тайылбырлаарын ёзугаар улуска амыр-дыш хүнүнде эртерин чөпшээрээни чер аразы (бир километр хире хемчээл).}. 13 Олар хоорайже киргеш, делгем өрээлге чыглып келгеннер. Аңаа Пётр, Иоанн, Иаков, Андрей, Филипп, Фома, Варфоломей, Матфей, Алфейниң оглу Иаков, Симон Зилот болгаш Иаковтуң оглу Иуда олар турган чүве-дир ^q. 14 Өөреникчилер шупту үргүлчү чыглып, мөргүүр чаңчылдыг турганнар. Элээн каш херээжен болгаш Иисустуң авазы Мария база Ооң дуңмалары ^r олар-биле кады орта кээп турганнар.

15 Каш хүн эрткенде, база бир шак ындыг чыышка 120 хире кижи чыылган турда, Пётр туруп келгеш, мынча дээн: 16 «Ха-дуңма, Иисусту садыпкаш, оон Ону тудуп хоругдаар улусту баштап кээр Иуда дугайында ^s Ыдыктыг Сүлдениң Давидтиң аксы-биле Бижилгеде өттүр билип медеглээн чүвези боттаныр ужурлуг турган-дыр ^t. 17 Иуда бистиң бирээвис турган, ол кылып келген ажыл-чорудулгавыска база киржип чораан» ^u. 18 (Ол бузуттуг үүлгедии дээш алган акшазы-биле чер садып алган, ынчалза-даа черже ок кадалдыр кээп ушкаш, хырны чарлып, ижин-шөйүндүзү уштуна берген. 19 Иерусалимде шупту улус ол дугайында билир турган болгаш, Иуданың черин боттарының дылынга Акелдама азы «Ханныг шөл» деп адааннар.) ^v

20 «А Ыдыктыг ырлар номунда: „Аал-чурту ээн калзын, аңаа кым-даа чурттавазын“ база „Өске кижи ооң эрге-дужаалын эдилезин“ – деп бижээн болгай ^w. 21 Ынчангаш Дээрги Иисус бистиң-биле кады турар үеде, үргүлчү аравыска чораан өске-бир кижиден шилип алыр ужурлуг бис. 22 Ол кижи Иоанның улусту сугже суп турган үезинден эгелеп ^x, Иисустуң бистиң мурнувуска дээрже көдүрүлгенинге чедир аравыска чоруп турган, Иисустуң катап дирилгенин бистиң-биле кады көрген херечи болзун» ^y.

23 Олар ийи кижини: Варсава деп өске аттыг, Иуст ^z деп шолалыг Иосифти база Матфийни саналдааннар. 24 Элчиннер: «Дээрги-Чаяакчы, кижи бүрүзүнүң сеткил-чүрээн билир болгай сен ^aa. Бо ийи кижиниң кайызын шилип алганыңны база 25 бодунуң турар ужурлуг черинче чорупкан Иуданың орнунга кымның элчин бооп, бараан болур ужурлуун көргүс» – деп мөргүп турганнар. 26 Оон олар үлүг шилип, төлге дажы октаарга, үлүг Матфийге онаашкан ^ab. Ол арткан он бир элчинге немей он ийигизи деп санаттыра берген.