Act 15 | TyvTUV | STEP | Антиохияга Иудеядан бир-ле улус келгеш, бүзүрээннерни өөредип эгелээн: «Моисейниң ёзу-чаңчылын ёзугаар кыртыжап демдектеттирбес болзуңарза, камгалал ап шыдавас силер» .

‏ Acts 15

Иерусалимге чыыш

1 Антиохияга Иудеядан бир-ле улус келгеш, бүзүрээннерни өөредип эгелээн: «Моисейниң ёзу-чаңчылын ёзугаар кыртыжап демдектеттирбес болзуңарза, камгалал ап шыдавас силер» ^a. 2 Павел биле Варнава ол улус-биле чөпшээрешпээннер, ынчангаш кончуг изиг маргылдаа үнген ^b. Бүзүрээн улус ынчан ол айтырыгны элчиннер-биле база христиан ниитилелдиң удуртукчулары-биле чугаалашсыннар дээш, Павел биле Варнаваны база бүзүрээннерниң чамдыызын Иерусалимче чорудупкан. 3 Олар христиан ниитилелдиң даалгазы-биле Финикия болгаш Самарияны таварты эртип бар чыткаш, өске чоннар улузу Бурганче эглип турарын чугаалаарга, ол черлерде чурттаан бүгү ха-дуңманың өөрүүрү аттыг болган. 4 Иерусалимге кээрге, оларны христиан ниитилел, элчиннер база удуртукчулар эвилең-ээлдек хүлээп алган. Павел биле Варнава Бурганның оларны дамчыштыр кылган бүгү чүвезин ^{▼▼ Өске бурунгу сөзүглелдерде «Бүгү чүвезин» деп сөстерге «База Ооң бүзүрелдиң эжиин өске чоннар улузунга канчаар ажыдып бергенин» деп сөстерни немээн.} чугаалап бергеннер. 5 Фарисейлер бөлүүнге хамааржыр чамдык бүзүрээн улус туруп келгеш, мынча дээннер: «Өске чоннар улузу ам кыртыжап демдектеттирер ужурлуг, ол ышкаш Моисейниң хоойлузун сагыырын олардан негээр херек».

6 Элчиннер болгаш удуртукчулар ол айтырыгны чугаалажыр дээш чыглып келгеннер. 7 Үр чугаалажыышкыннар соонда, Пётр туруп келгеш, мынча дээн: «Ха-дуңма, өске чоннар улузу Буянныг Медээни мээң суртаалымдан дыңнааш, бүзүрей берзиннер дээш, Бурган бистиң аравыстан эң эгезинде-ле мени шилип алганын билир силер ^d. 8 Бурган кижилерниң чүректерин билир болгай ^e, өске чоннар улузунга база Ыдыктыг Сүлдени, биске хайырлааны дег, хайырлааш ^f, оларны хүлээп көргенин Ол көргүстү. 9 Бурган олар-биле бистиң аравыста кандыг-даа ылгал кылбайн турар ^g, харын оларның чүректерин арыглап алган-дыр ^h, чүге дээрге олар бүзүрей берген-дир. 10 Ынчаарга бистиң-даа, өгбелеривистиң-даа уур харык чок болганы үүрге-чүъктү бүзүрээннерниң оорга-мойнунче чүдүргеш ⁱ, Бурганны чүге шенеп турар силер? 11 Ынчалза-даа бис база олар ышкаш, Дээрги Иисустуң авыралын дамчыштыр камгалал алырывыска бүзүрээр бис» ^j.

12 Бүгү чыыш ыыт-шимээн чок барып, өске чоннар улузунуң аразынга Варнава биле Павелди дамчыштыр Бурганның кылганы кайгамчык демдектер дугайында ол ийиниң чугаазын дыңнай бергеннер.

Иаковтуң чугаазы

13 Олар чугаазын доозуптарга, Иаков ^k чугаалап эгелээн: «Ха-дуңма, мени дыңнаңар! 14 Бурган эң баштай өске чоннар улузунче ээ көрүп, Бодунуң адын хүндүлээр кылдыр, оларның аразындан улусту шилип алганын Симон Пётр биске чугаалады. 15 Ол дугайында медээчилерниң бижээн сөстери база ооң-биле дүгжүп турар-дыр:

16 „Оон Мен ээп келгеш, Давидтиң буступ дүшкен чадырын катап тургузар мен.
Мен ону бузундулардан чыып тургускаш, эде тудуп, чаартыр мен.
17 – 18 Ынчан кижи төрелгетен артынчызы – Мээң адымны эдилээн бүгү өске чоннар
Дээрги-Чаяакчыже чүткүп эгелээр.
Ол бүгүнү шаг-шаандан бээр билдингир кылып каан Дээрги-Чаяакчы
ынча деп турар-дыр“ ^l.

19 Ынчангаш Бурганче эглирин күзээн өске чоннар улузунга шаптык катпас ужурлуг бис деп санап тур мен. 20 Харын-даа оларга дүрзү-бурганга өргээн аъш-чем чииринден ^m, самыыраарындан, бооп өлүрген дириг амытаннар эъдинден база хандан ойталаар ⁿ дугайында чагаа бижиир ужурлуг бис ^{▼▼ Өске бурунгу сөзүглелдерде бо сөстерге «Ол ышкаш боттарыңарга кылырын күзевээн чүвеңерни өске улуска база кылбаңар» деп сөстерни немээн.}. 21 Чүге дээрге Моисейниң хоойлузун хоорай бүрүзүнге суртаалдаар база амыр-дыш хүнүнде-ле синагогаларга номчуур улус шагдан бээр бар болгай».

Элчиннер болгаш удуртукчуларның чагаазы

22 Элчиннер болгаш христиан ниитилелдиң удуртукчулары бүгү ниитилел-биле кады боттарының аразындан каш кижи шилээш, оларны Павел биле Варнавага кошкаш, Антиохияже чорударын шиитпирлээннер. Олар бүзүрээн улус аразында удуртукчулар болур Варсава деп ады база бар Иуда биле Силаны ^p шилип алганнар. 23 Олар-биле кады мындыг уткалыг чагаа чорутканнар:

«Антиохия, Сирия болгаш Киликияда турар өске чоннар уктуг бүзүрээн ха-дуңмавыс силерге элчиннерден болгаш христиан ниитилелдиң удуртукчуларындан изиг байыр! 24 Бистен адырлып чоруй барган чамдык улус бистен
кандыг-даа даалга албайн, боттарының чугаазы-биле ^{▼▼ Өске бурунгу сөзүглелдерде бо сөстерге «Кыртыжап демдектеттирер база Моисейниң хоойлузун сагыыр ужурлуун чугаалааш» деп сөстерни немээн.} силерни дүвүредип, угаан-бодалыңарны хөлзедип турарын дыңнадывыс ^r. 25 Ынчангаш бис шупту чыглып, чаңгыс эп-сеткилдиг дугурушканывыстың түңнелинде, аравыстан каш кижи шилээш, биске эргим Варнава биле Павелди кады силерже чорударын шиитпирледивис. 26 Ол ийи кижи болза Дээргивис Иисус Христоска бараан болур дээш амы-тынын артынга каапкан улус-тур. 27 Ол ышкаш Иуда биле Силаны чоруттувус, олар силерге бижээн чүвевисти аас-биле база дамчыдарлар. 28 Ыдыктыг Сүлде болгаш бис дараазында айытканывыс эргежок чугула чүүлдерден өске чүнү-даа сагыырын силерден негевес деп шиитпирледивис ^s: 29 дүрзү-бурганнарга өргээн аъш-чем чииринден, хандан, бооп өлүрген дириг амытаннар эъдинден база самыыраарындан ойталаңар ^{▼▼ 15:20-де немелде тайылбырны көр.}. Бо бүгүнү сагыыр болзуңарза, шын кылып турар-дыр силер. Байырлыг, менди-чаагай!»

Айбычылар Антиохияда

30 Айбылатканнар Антиохияга келгеш, ында бүзүрээн улусту чыггаш, чагааны хүлээдип бергеннер. 31 А демгилери ону номчааш, деткимчелиг медээге аажок өөрээннер. 32 Иуда биле Сила ийи боттары Бурганның медээчилери турган болгаш ^u, ха-дуңмазынга хөй суртаал кылып, оларны деткип база бүзүрелин быжыктырып турганнар. 33 – 34 Иуда биле Сила аңаа элээн болган соонда, бүзүрээннер оларга амыр-тайбыңны, ак орукту күзээш, оларны айбылаан улусче дедир чорудупканнар ^{▼▼ Өске бурунгу сөзүглелдерде бо сөстерге «Ынчалза-даа Сила ол черге артып каарын шиитпирлээн, а Иуда Иерусалимче чана берген» деп сөстерни немээн.}. 35 А Павел биле Варнава Антиохияга артып калган. Олар өске хөй улус-биле кады өөредиг берип база Дээрги-Чаяакчының Буянныг Медээзин суртаалдап турганнар ^w.

Павел биле Варнаваның аразында чөрүлдээ

36 Элээн үе эрткенде, Павел Варнавага: «Дедир чоруткаш, Дээрги-Чаяакчының медээзин суртаалдап турганывыс бүгү хоорайларда ха-дуңмавыска барып чедип, оларның канчаар чурттап олурарын көрээлем» – деп санал киирген. 37 Варнава Марк деп ады база бар Иоанны ^x эдертип алыр бодаан. 38 Ынчалза-даа Памфилияга оларны каапкаш, бо ажыл-херекти олар-биле кады уламчылаваан боорга, Павел Маркты алган херээ чок деп санаан ^y. 39 Ол дээш, оларның аразынга шыңгыы чөрүлдээ үнүп кээрге, Павел биле Варнава чарлырын шиитпирлээн. Варнава Маркты эдерткеш, Кипрже эжиндирип чорупкан. 40 А Павел Силаны ^z шилип алгаш, бүзүрээннер ону Дээрги-Чаяакчының авыралынга хүлээдип бээрге, орукче үнүпкен. 41 Ол Сирия болгаш Киликияны эргий кезип, христиан ниитилелдерни быжыктырып чораан.