Act 18 | TyvTUV | STEP | Павел ооң соонда Афиныны каапкаш, Коринф хоорайже чоруй барган.

‏ Acts 18

Павел Коринф хоорайда

1 Павел ооң соонда Афиныны каапкаш, Коринф хоорайже чоруй барган. 2 Ол аңаа Понт девискээринге төрүттүнген Акила ^a дээр еврей кижи-биле таныжып алгаш, ооң бажыңынга чеде берген. Акила бодунуң кадайы Прискилла-биле кады чоокта чаа Италиядан келген турган, чүге дээрге Клавдий император ^b хамык иудейлерге Римден үнүп чоруурун дужааган чүве-дир. 3 А оларның кылып турар ажылы ооңуу-биле дөмей – майгыннар даарап турар боорга, Павел артып калгаш, олар-биле кады ажылдай берген. 4 Ол амыр-дыш хүнү кээрге-ле, синагогага иудейлер болгаш гректер-биле маргыжып, оларны бүзүрелче ээлдирерин кызыдып турган ^c.

5 Сила биле Тимофей Македониядан кээрге ^d, Павел бодун суртаал кылырынга бараалгадып ^{▼▼ Өске бурунгу сөзүглелдерде «Павел бодунуң бүгү үезин суртаал кылырынга бараалгадып» эвес, а «Павел Сүлдеге албадаткаш» деп бижээн.}, иудейлерге «Иисус дээрге Христос ол-дур» дээрзин херечилеп турган. 6 А олар аңаа удурланып, бак сөглээр боорга, ол бодунуң хевинден доозунну тө силгипкеш ^{▼▼ Павелдиң ынчаар кылганы иудейлерниң бүзүрел чогун ооң ам черле шыдажыр арга чок апарганын херечилеп турар (Неем. 5:13 көр).}, оларга мынча дээн: «Өлүмүңер дээш бодуңар шоруңар! ^g Мээң ам силер дээш, харыысалгам чок. Амдан эгелээш, өске чоннар улузунга суртаалдап чоруурум ол-дур» ^h. 7 Павел синагогадан үнгеш, бажыңы ооң чанынга турган Бурганга мөгеер бир кижиже чорупкан. Ооң адын Тит Иуст ^{▼▼ Өске бурунгу сөзүглелдерде «Тит» деп ат таварышпайн турар.} дээр чүве-дир. 8 А синагога даргазы Крисп ^j бодунуң өг-бүлезиниң улузу-биле кады Дээрги-Чаяакчыга бүзүрей берген ^k. Павелди дыңнаан Коринфиниң хөй чурттакчылары база бүзүрээш, сугга суктуруп алганнар.

9 Бир-ле дүне Павелдиң дүжүнге Дээрги-Чаяакчы аңаа: «Кортпа! Чугааңны уламчыла база ыыттавайн барба. 10 Мен сээң-биле кады мен, кым-даа сеңээ хора чедирип шыдавас. Бо хоорайда Мээң улузум хөй деп билип ал» – дээн. 11 Павел ол хоорайга улусту Бурганның медээзинге өөредип, бүдүн чартык чыл дургузунда турган.

Иудейлерниң Павелди шиидери-биле эккелгени

12 Ахаия девискээринге Римден томуйлаан чагырыкчызы Галлион дээрзи турар өйде, иудейлер Павелге удур бөлүглежип алгаш, ону шииткел черинге эккелгеннер. 13 Олар мынча дээннер: «Бо кижи улусту хоойлу-дүрүмге дүүшпес кылдыр Бурганга мөгееринче бүзүредип тур». 14 Павел аксын ажыдып чадап чыдырда-ла, ону буруудаткан иудейлерге Галлион мынча дээн: «Иудейлер, кандыг-бир хоойлу-дүрүм үрээшкини азы кем-херек үүлгедиишкини болган болза, силерни дыңнаар чылдагаан меңээ тургай эртик. 15 Ынчалза-даа мында өөредиглер, аттар база ыдыктыг хоойлуңар дугайында чугаа чоруп турар болганда, боттарыңар сайгаржып алыңар. Мен ол айтырыгга шииткекчи болбас мен» ^l. 16 Оон оларны шииткел черинден үндүр сывырыпкан. 17 Олар ынчан шупту синагога даргазы Сосфенни шииткел чериниң мурнунга эттей бергеннер, ынчалза-даа Галлион ынаар хензиг-даа сагыш салбаан.

Павелдиң Антиохияже ээп келгени

18 Павел Коринфиге элээн каш хонгаш, эш-өөрү-биле байырлажып чарылгаш, Сирияже эжиндирип чорупкан. Прискилла биле Акила ^m база ону эдерип чорупкан. Павел эжиндирип чоруур бетинде, Бурганга берген даңгыраан күүсеткен болгаш, Кенхреяга ⁿ бажын дөңгүрертип каапкан ^o. 19 Эфес хоорайга ^p эжиндирип келгеш, Павел Прискилла биле Акиланы каапкаш, боду синагогаже чорупкаш, иудейлер-биле чугаалажып эгелээн. 20 Олар ону олар-биле кады ам-даа артып каарын дилээннер, ынчалза-даа ол чөпшээрешпээн. 21 Чоруп тура, Павел мынча дээн: «Бурганның күзел-соруу ындыг болур болза, мен ээп кээр мен» ^q. Оон ол Эфестен эжиндирип чорупкан ^{▼▼ Өске бурунгу сөзүглелдерде бо шүлүкке «Чоокшулап олурар байырлалды Иерусалимге уткуурум эргежок чугула-дыр» база «А Акила биле Прискилла Эфеске артып калганнар» деп сөстерни немээн.}.

22 Кесарияга эрикке дүшкеш, ол Иерусалимге келгеш, ында христиан ниитилелдиң амыр-мендизин айтыргаш, Антиохияже чоруй барган. 23 Антиохияга элээн тургаш, Павел аян-чоруун уламчылап, Галатия биле Фригияның хоорайларын дургаар таварып эрткеш ^s, хамык өөреникчилерниң бүзүрелин быжыктырып чораан.

Аполлостуң Эфеске суртаалы

24 Ол өйде Эфеске Аполлос ^t дээр еврей чедип келген. Ол Александрияга төрүттүнген, Бижилгени эки билир, аажок чечен кижи чүве-дир. 25 Аполлос Дээрги-Чаяакчының айтып-сургаан оруун эки билип алгаш, хайнып-хөлзээн сеткилинден чугаалап, боду чүгле Иоанның суртаалдааны сугже суктурарын билир-даа болза ^u, Иисустуң дугайында шынчы сөс-биле өөредип турган. 26 Ол синагогага дидими-биле чугаалап эгелээн ^v. Прискилла биле Акила ону дыңнап кааш, бажыңынче чалап эккелгеш, Бурганның оруун аңаа оон-даа долузу-биле тайылбырлап бергеннер. 27 Аполлос улаштыр Ахаияже чоруур деп баарга, бүзүрээннер ону сорук кииргеш, ында христианнарга «Бо кижини хүлээп алыңар» деп чагаа чорудупканнар ^w. Ол ынаар чеде бергеш, Бурганның авыралының ачызында бүзүрей берген улуска улуг дузазын көргүскен. 28 Чүге дээрге Аполлос Иисус – Христос-тур дээрзин Бижилгелер-биле шынзыдып, хөй чон мурнунга иудейлерниң аксын аажок күштүг барымдаалар-биле дуй шаап келген ^x.