Act 20 | TyvTUV | STEP | Хөлзээзин төне бээрге, Павел христианнарны кыйгырткаш, оларны сорук киирип, чүве чугаалааш, байырлажып чарылган соонда, Македонияже чоруй барган .

‏ Acts 20

Павел Македония биле Грецияда

1 Хөлзээзин төне бээрге, Павел христианнарны кыйгырткаш, оларны сорук киирип, чүве чугаалааш, байырлажып чарылган соонда, Македонияже чоруй барган ^a. 2 Орук ара ол чер болганга бүзүрээннерни суртаалдары-биле быжыктырып чораан. Оон ол Грецияга чедип келгеш, 3 аңаа үш ай болган. Ооң Сирияже эжиндирип чоруурунуң мурнуу чарыында иудейлер аңаа удур сүлчээ кылган ^b. Ынчангаш ол дедир Македония таварты эртерин шиитпирлээн. 4 Павелди Верия чурттуг Пиррниң оглу Сосипатр, Фессалоника чурттуг Аристарх биле Секунд, Дервия чурттуг Гаий ^c, Тимофей база Асия чурттуг Тихик биле Трофим олар ^d үдеп чораан ^{▼▼ Өске бурунгу сөзүглелдерде «Үдеп чорааннар» деп сөстерге «Асияга чедир» деп сөстерни немээн.}. 5 Олар баштай үнүпкеш, бисти Троадага манап турганнар ^f. 6 А бис Хаарган далганнар байырлалының ^g соонда Филиппыдан эжиндирип үнгеш, беш хонук эрткенде, Троадага өөрүвүске катчып алгаш, аңаа чеди хонган бис.

Павелдиң Эвтихти катап диргискени

7 Улуг-хүнде ^h эп-сеткилдиң чемин үлежип чиир дээш, чыылган бис. Павел чыылган улуска суртаалдап турган. Ол даарта эжиндирип чоруур деп турган болгаш, дүн ортузу чедир чугаалап келген. 8 Бистиң чыглып келгенивис үстүкү өрээлге хөй-ле чырыткылар хып турган. 9 Павел суртаалын дыка үр уламчылап келген болгаш, соңга караанга олурган Эвтих деп аныяк оол бажын согайтып, уйгузунга бастыргаш, үшкү каъттан чайлып кээп дүшкен ⁱ. Ону көдүрүп кээрге, ол өлүг болган. 10 Павел дүжүп келгеш, оолдуң кырынга чыдыпкаш ^j, куспактап алгаш: «Муңгараваңар, ол тынныг-дыр!» – дээн. 11 Ол үстүнче үне бергеш, чемни үлежип чигеш, дыка үр, даң аткыже, чугаалап келген, а оон чоруй барган. 12 Аныяк оолду бажыңынга дириг хевээрзин эккелгеннер, а шупту улустуң сагыжы ажый берген.

Троададан Милитче аян-чорук

13 Бис корабльга олурупкаш, Ассче эжиндирип чорупкан бис. Аңаа Павелди ап алыр ужурлуг турган бис, чүге дээрге боду ынаар кургаг черлеп чоруй баар дээш, ол ынчаар айыткан. 14 Павел биске Асска таваржы бээрге, ону корабльче ап алгаш, Митилина хоорайже эжиндирип чоруптувус. 15 Оортан даартазында хүндүс эжиндирип үнгеш, Хиос ортулуктуң дужунга келгеш, оон бир хүн эрткенде, Самос ортулукка доктаадывыс ^{▼▼ Өске бурунгу сөзүглелдерде «Самос ортулукка доктаадывыс» деп сөстерге «Оон Трогиллийге барыпкаш» деп сөстерни немээн.}. База бир хүнзээш, Милит хоорайга эжиндирип келдивис. 16 Павел Асияга саадап, үе чидирбес дээш, Эфестиң чаны-биле эрте бээрин шиитпирлээн, чүге дээрге Иерусалимче далажып бар чыткан. Ол ынаар, аргалыг-ла болза, Беженги хүннүң байырлалында ^l чеде бээрин күзээн.

Эфестиң христиан удуртукчулары-биле байырлажыг

17 Павел Милиттен Эфесче улус чоруткаш, Эфестиң христиан ниитилелиниң удуртукчуларын кыйгырткан. 18 Олар чедип кээрге, ол мынча дээн: «Асияга мээң келгеним баштайгы хүнден-не ^m үргүлчү силер-биле кады канчаар чурттап турганымны билир силер ⁿ. 19 Мен Дээрги-Чаяакчыга караам чажын эңдере төп, иудейлерниң кара сагыштыындан салым-хуумга таварышкан шенелделерни ажып эртпишаан, биче сеткилдиг бараан бооп келдим. 20 Силерге ажыктыг болгу дег бүгү чүүлдү суртаалдап, силерни хөй улус мурнунга база бажыңнар кезип, коргуш чок өөредип келдим. 21 Бачыдын миннип, Бурганче эглириниң база Дээргивис Иисус Христоска бүзүрээриниң дугайында иудейлерге-даа, өске чоннар улузунга-даа медеглеп келдим. 22 А ам, Ыдыктыг Сүлдениң айытканы-биле, мени ында чүү манап турарын билбес-даа болзумза, Иерусалимче чоруур ужурлуг мен. 23 Чүгле Ыдыктыг Сүлдениң хоорай бүрүзүнге меңээ сагындырыг кылып, Иерусалимге мени хилинчек болгаш хоругдал манап турарын чугаалап келгенин-не билир мен ^o. 24 Ынчалза-даа амы-тыным меңээ кандыг-даа үне чок, чүгле бодумнуң чарыжым төндүр маңнап ^p, Дээрги Иисустуң меңээ даандырган бараан болуушкунун эчизинге чедирген болзумза – Бурганның авыралының дугайында Буянныг Медээни улуска дыңнаткан болзумза!

25 Араңарга аралажып, Бурганның Чагыргазын суртаалдап турганым улустан чаңгызыңар-даа мени моон соңгаар көрбезин билир мен. 26 Силерниң кайы-бирээңер өлүмче бажы-биле баар болза ^q, ол дээш, буруум чогун бөгүн силерге медеглеп тур мен. 27 Чүге дээрге Бурганның күзел-соруун силерге долузу-биле коргуш чок суртаалдап келген мен.

28 Бодуңарны база Ыдыктыг Сүлдениң силерге хүлээдип берген кодан хоюн хайгаарап көрүп чоруңар ^r. Бурганга бүзүрээннер ниитилелиниң кадарчылары бооп көрүңер, ону Ол Бодунуң ханын төккеш, бөлүп алган болгай ^s. 29 Мен силерден чоруй баарымга, каржы бөрүлер чедип келгеш ^t, коданны черле өршээвес дээрзин билир мен. 30 Бүзүрээннер оларны эдерзин дээш, алыс шынны соора өөреди бээр улус силерниң араңарга безин тыптып кээр ^u. 31 Ынчангаш серемчилелдиг болуңар! ^v Мээң үш чыл дургузунда, дүне-хүндүс караам чажын төп, силерге могаг-шылаг чок сагындырып келгенимни сактып чоруңар.

32 Мен ам силерни Бурганга болгаш Ооң авыралдыг медээзинге хүлээдип тур мен ^w. Ол медээ силерни быжыктырып база Бурганның ыдыктаан бүгү улузунга аазаан өнчүнү силерге берип шыдаар ^x.

33 Мен кайыңардан-даа алдын, мөңгүн, идик-хеп алырын күзевээн мен ^y. 34 Бодумнуң база эш-өөрүмнүң хереглээр чүвезин бо ийи холум-биле ажылдап ап келгенимни билир силер ^z. 35 Чүнү-даа кылып турган болзумза, бодумнуң үлегерим-биле бис ажылдаар ужурлуг, Дээрги Иисустуң сөстерин сактып, кошкак улуска дузалажыр ужурлуг бис дээрзин силерге көргүзүп келген мен. Ол: „Алырынга көөрде, бээри – амыр-чыргалдыг“– дээн болгай» ^aa.

36 Павел ынча дээш, шупту улус-биле кады дис кырынга олурупкаш, мөргүп алган ^ab. 37 Шупту улус ыглап-сыктап, ону куспактааш, ошкап турган. 38 Ылаңгыя ооң: «Моон соңгаар мени көрбес силер» – дээн сөстери оларны муңгарадыпкан. Оон Павелди корабльга чедир үдеп кааннар.