Amo 4 | TyvTUV | STEP | Самарияның даанда чурттап турар, Васанның семис-чаагай инектери ышкаш херээженнер – ядыы улусту кызып-кыйып, түреңги улусту дарлап, боттарының ашактарынга: «Эккеп кудуңар-ла, ижер бис!» – деп турар херээженнер

‏ Amos 4

1 Самарияның даанда чурттап турар, Васанның семис-чаагай инектери ышкаш херээженнер ^a –
ядыы улусту кызып-кыйып, түреңги улусту дарлап,
боттарының ашактарынга: «Эккеп кудуңар-ла, ижер бис!» – деп турар херээженнер –
бо чугаа-сөстү дыңнаңар.
2 Дээрги-Бурган-Чаяакчы Бодунуң ыдыктыы-биле даңгыраглап ^b, мынча дээн:
«Силерни – тыртпалар-биле, арткан өөрүңерни – сыырткыыштар-биле
сөөртүп алгаш баар үе чедип кээр ^c.
3 Мурнуңарда ханаларның оюк черлерин дамчыштыр үнер апаар силер ^d.
Дайзын силерни үндүр сывыртааш, Хармонче ^{▼▼ Бо сөстүң утказы эки билдинмес. Чамдык бурунгу очулгаларда «Эрмон даг» азы «Армения» деп бижээн.} аппаар».
Дээрги-Чаяакчының медеглээн чүвези ол-дур.

Израиль чоннуң Бурганче эглир хөңнү чогу

4 «Вефил хоорайга баргаш, бачыттан үүлгедиңер-ле,
Галгал хоорайга баргаш, кем-бурууңар көвүдедиңер-ле ^f;
эртенниң-не – өргүлдериңерни ^g, үш хонгаш-ла – дүжүдүңерниң оннуң бир кезээн
эккеп салыңар-ла.
5 Израильчилер, ажыткылыг безин далган-тарааны
өөрүп четтириишкин өргүлү кылдыр эккеп салыңар-ла,
боттарыңарның эки тура-биле салып турар өргүлдериңер дугайында медээлеңер-ле ^h,
оларны салганыңар дугайында ыыткыр чарлаңар-ла ⁱ.
Ынчаар кылырынга ынак эвес ийик силер бе?»
Дээрги-Бурган-Чаяакчының медеглээн чүвези ол-дур.

6 «Шупту хоорайларыңарга Мен силерни аш-биле кезедип турган мен,
бүгү чурттап турар черлериңерге аъш-чемиңер чедишпейн турган.
Ындыг-даа болза, Менче эглип келбээн силер ^j».
Дээрги-Чаяакчының медеглээн чүвези ол-дур.

7 «Мен дүжүт ажаалдазынга чедир үш ай арткан турда,
силерже чаъс чагдырбайн турдум ^k;
бир хоорайже чаъсты чагдыргаш, өскезинче чагдырбас турдум;
бир шөлдү чаъс-биле суггаргаш, өскезин суггарбайн баарымга, кургап каар турду.
8 Элээн каш хоорайларның чону суксунун хандырар дээш
чаңгыс хоорайга элеңейндир кылаштап кээрге-даа,
шуптузунуң суксунун хандырар суг чок боор турду.
Ындыг-даа болза, Менче эглип келбээн силер».
Дээрги-Чаяакчының медеглээн чүвези ол-дур.

9 «Тарып алган үнүш-тарааңарны
чалынныг изиг хат болгаш дүдүк-биле чиртип турдум ^l;
дыка хөй чимистиг садтарыңарны, виноград тараан шөлдериңерни,
фига биле оливаңар ыяштарын шартылаа чип кааптар турду ^m.
Ындыг-даа болза, Менче эглип келбээн силер».
Дээрги-Чаяакчының медеглээн чүвези ол-дур.

10 «Египетке болуп турганы дег,
силерже мал-маган кырар хамчык аарыгны ыттым ⁿ,
аныяк эрлериңерни хылыш-биле кырып кагдым,
аъттарыңарны сүрүп аппаар турду;
турлагларыңарда өлүмнүң чыды думчууңар үдүн дола берди.
Ындыг-даа болза, Менче эглип келбээн силер».
Дээрги-Чаяакчының медеглээн чүвези ол-дур.

11 «Мээң Содом биле Гоморраны чылча базып кааным дег ^o,
силерниң чуртуңарда чамдык хоорайларны чылча базып кагдым;
ынчан силер оттан ушта тырткан кезектен дээредевес турдуңар ^p.
Ындыг-даа болза, Менче эглип келбээн силер».
Дээрги-Чаяакчының медеглээн чүвези ол-дур.

12 «Ынчангаш Мен сени мынчаар аажылаар мен, Израиль,
сээң-биле мынчалдыр кылыр мен,
бодуңнуң Бурганың-биле ужуражырынга белеткенип ал, израиль чон!»

13 Дагларны тывылдырып, хатты чаяап,
кижиге Бодунуң угаан-бодалын медээлеп,
даң хаяазын болгаш дүмбейни чаяап турар,
черниң бедиктерин базып турар Бурган ^q – Бурганың Ол-дур.
Ооң ады – Дээрги-Чаяакчы, Аг-шериглиг Бурган!