Amo 6 | TyvTUV | STEP | Сион дагда сагыш амыр чурттап турар улус ат болур, «Самарияның даанга айыыл чок чурттаар бис» деп бодап турар улус, израильчилерниң оларга кээп турары баштың чоннуң ат-сураглыг улузу ат болур!

‏ Amos 6

Израильдиң туразында чурттап турар улузу ат болур

1 Сион дагда сагыш амыр чурттап турар улус ^a ат болур, «Самарияның даанга айыыл чок чурттаар бис» деп бодап турар улус,
израильчилерниң оларга кээп турары баштың чоннуң ат-сураглыг улузу ат болур!
2 Калне хоорайже барып, көрүп көрүңер ^b,
оортан өндүр улуг Хамат хоорайже чоруптуңар,
оон филистим черде Геф хоорайже бада бериңер:
ол черлер бо күрүнелериңерден дээре деп бе? ^c
Ол черлерниң девискээри бо черлерден делгем деп бе?
3 Айыыл-халап хүнүн ырак кылдыр бодап,
күчүлелдиң дүжүлгеге олурарын чоокшуладып турар-дыр силер.
4 Чаан сөөгү-биле каастаан оруннарыңарда чыдар-дыр силер,
орун-дөжээңерде хөлестеп чыдып алгаш,
сүрүг малыңарда эң-не семис хойларны,
коданыңарда семиртир азыраан шарыларны
дөгерип чип турар-дыр силер.
5 «Чадаганга үдеткеш, ырлажып, хөгжүм херекселинге Давид хаан ышкаш ойнап билир бис»
деп бодаар-дыр силер.
6 Дашкаларга арага кудуп ижип, эң эки үстер-биле чагдынар-дыр силер,
а Иосифтиң салгалының айыыл-халавы дээш сагыжыңар аарбас-тыр!
7 Ол бүгү дээш, силер ам дайзынның тудуп аппаар улузунуң
баштайгылары болур силер,
хөлестеп чыткан улустуң дою доостур!

Бурган Самарияны буурадып каар

8 Дээрги-Бурган-Чаяакчы Бодунуң амы-тыны-биле даңгыраглаан ^d,
Аг-шериглиг Бурган: «Иаковтуң салгалының улуургак чоруунга хөңнүм чок,
ооң шивээлерин көөр хөңнүм чок.
Найысылалды, ында турар бүгү чүвени дайзынга хүлээдип бээр мен – деп медеглээн. –

9 Кандыг-бир бажыңга он кижи амы-тынныг артар-даа болза,
олар база өлүп каар.
10 Оларны ажаап, өрттедир дээн төрели кижи чедип келгеш,
мөчү-сөөктерни үндүрер дээш, бажың иштинде кижиден:
„Сенден өске кижи бар-дыр бе?“– деп айтырарга,
демгизи: „Кым-даа чок“– деп харыылаар,
ынчан келген кижи: „Ыыттава! Дээрги-Чаяакчының адын адап болбас“– дээр ^{▼▼ Бо шүлүктүң утказы эки билдинмес. Чедип келген төрели кижи Дээрги-Чаяакчының кичээнгейин бодунче хаара тырткаш, айыыл-халапка таваржырындан сезинген бооп чадавас.}.
11 Чүге дээрге Дээрги-Чаяакчы дужаарга, улуг-даа бажыңнар буступ каар,
бичии-даа бажыңнар чуурлуп каар.

12 Хаяларга аът маңнаар бе?
Хая-дашты ^{▼▼ «Хая-дашты» деп сөстүң болгу дег өске утказы: «Далайны».} шары-биле чарып болур бе?
А силер база утка чок чүве кылып, шын шииткелди оо-хоран кылдыр,
чөптүг-шынныг чорукту ажыг өт кылдыр хуулдуруп алган-дыр силер.

13 Силер дээрге чөгенчиг чүүл дээш өөрүп:
„Бодувустуң шыдалывыс-биле күчү-күштү чедип алган эвес бис бе?“–
деп турар улус-тур силер.
14 Көөр сен, израиль чон, Мен сеңээ удур өске чонну көдүрер мен.
Ынчан олар силерни соңгу чүкте Лево-Хаматтан эгелээш,
мурнуу чүкте Арава шынаага чедир дарлап-бастыр» – деп,
Дээрги-Чаяакчы, Аг-шериглиг Бурган чугаалаан.