Amo 5 | TyvTUV | STEP | Израиль чон, силер дээш ыы-сыым төп кажыыдаан сөзүмнү дыңнаңар.

‏ Amos 5

Кажыыдал ыы-сыызы база Бурганче эглип кээринче кыйгырыг

1 Израиль чон, силер дээш ыы-сыым төп кажыыдаан сөзүмнү дыңнаңар. 2 Израиль-кыс кээп дүшкеш, туруп чадап тур! ^a
Ол бодунуң черинге бүгү улуска кагдырыпкан чыдырда,
көдүрер кижи тывылбас-тыр.
3 Чүге дээрге Дээрги-Бурган-Чаяакчы:
«Израильде муң кижи дайылдажып үнген хоорайга чүс-ле шериг артар,
чүс кижи дайылдажып үнген хоорайга он-на шериг артар» – дээн.
4 Дээрги-Чаяакчы израиль чонга чугаалаан:
«Менче чүткүңер ^b, ынчан амы-тынныг артар силер;
5 Вефилче чүткүвеңер, Галгалче барбаңар ^c,
Беэр-Шеваже чорук кылбаңар ^d,
чүге дээрге Галгалдың чурттакчыларын тудуп алгаш баар,
Вефил айыыл-халапка таваржыр.
6 Дээрги-Чаяакчыже чүткүңер, ынчан амы-тынныг артар силер,
оон башка Ол Иосифтиң салгалын от ышкаш
өттүр таварып эрткеш, ону чиптер,
Вефилге ол отту өжүрер кижи турбас ^e.

7 Силер дээрге шын шииткелди оо-хоран кылдыр хуулдуруп турар,
чөптүг-шынныг чорукту черже чыттыр базып турар улус-тур силер!

8 Үгер сылдыс биле Үш-Мыйгак сылдысты кым чаяаганыл ^f,
кым дүмбей караңгыны чырык эртенче хуулдуруп,
а хүндүскү үени дүн кылдыр караңгыладып,
далайның сугларын кыйгыргаш, чер кырынга тарай аксып турарыл?
Ооң ады – Дээрги-Чаяакчы! ^g
9 Ол күш-шыдалдыг улуска удур хоозуралды салыптарга,
шивээлер чылча шаптырып аар.

10 А силер шииткел черинде сойгалакчыны көөр хөңнүңер чок,
шынны чугаалап турар кижи силерге бак бооп көстүр болгай ^h.
11 Ядамыкты түрү бастырып,
ооң далган-тараазын үндүрүг кылдыр былаап ап турар силер.
Ынчангаш каас-коя бажыңнар-даа тудуп алган болзуңарза,
аңаа чурттавас силер,
шөлдерге кайгамчык эки виноград-даа тарып алган болзуңарза,
ооң арагазын ишпес силер ⁱ.
12 Чүге дээрге Мен кемниг херээңерниң кайы хире хөйүн,
бачыдыңарның кайы хире аарын билир мен:
чөптүг-шынныг кижини кызып-кыйып, хээли ап турар силер ^j,
шииткел черинге ядыы кижиниң херээн шын шиитпес силер ^k.
13 Ынчангаш угаанныг кижи ол үеде чүве чугаалавас,
чүге дээрге каржы-бак үе болган-дыр.

14 „Дээрги-Чаяакчы бис-биле кады“дээр-дир силер.
Амы-тынныг артар дээш, бузутче эвес, буянче чүткүңер,
ынчан Аг-шериглиг Бурган ылап-ла силер-биле кады боор.
15 Бузутка хөңнүңер чок, буянга ынак болуңар ^l
база шииткел черинге шын шииткелди тургузуңар;
ынчан Дээрги-Чаяакчы, Аг-шериглиг Бурган
Иосифтиң арткан салгалынче ээ көрнүр чадавас».

16 Ынчангаш Дээрги-Чаяакчы, Аг-шериглиг Бурган мынча дээн:
«Улус бүгү кудумчуларга ыглап-сыктаар,
хамык шөлчүгештерге „халак-халак!“дижир.
Олар кажыыдап ыглаар кылдыр – тараачын кижини,
ыглап-сыктаар кылдыр – ажыг-шүжүг ырлары күүседип билир кижилерни
кыйгырып алыр ^m.
17 Виноград тараан шөлдерниң шуптузунга ыы-сыы дыңналыр,
чүге дээрге Мен силерниң араңар-биле кезедип эрте бээр мен ⁿ».
Дээрги-Чаяакчының чугаалаан чүвези ол-дур.

Дээрги-Чаяакчының шииткел хүнү

18 «Дээрги-Чаяакчының шииткел хүнүн
күзелдии-биле манап турар улус ат болур!
Ол хүннү чүге манаар силер?
Ол дээрге чырык эвес, дүмбей-дир! ^o
19 Кандыг-бир кижи арзылаңдан дезе бээрге, аңаа уткуй адыг келген дег
азы кандыг-бир кижи бажыңынга чедип келгеш, холу-биле ханадан даянырга,
ону чылан шапкан ышкаш хүн-дүр.
20 Дээрги-Чаяакчының шииткел хүнү караңгы эвес, чырык чүве бе?
Ол дээрге дүмбей-дир, ында чырыш кынныр чүү-даа чок.

21 – 22 Байырлалдарыңарга хөңнүм чок, оларны хүлээп көрбес мен,
байырланчыг чыыштарыңар үезинде салган бүрүн өрттедир өргүлдериңер
Меңээ таалал бербес ^p.
Далган-тарааңар өргүлдерин Меңээ салыр болзуңарза ^q, оларны хүлээвес мен,
семис мал-маганыңардан салган эп-найырал өргүлдеринче көрүнмес мен.
23 Боттарыңарның ырларыңарның ыыт-шимээнин Менден ырадыңар,
силерниң чадаганнарыңарның ойнаанын дыңнавас-даа мен.
24 Силерден күзээр чүвем бо-дур:
шын шииткел – хем суу ышкаш,
чөптүг-шынныг чорук – кажан-даа катпас агым ышкаш хөме аксын.

25 Израиль чон, силер Меңээ ээн кургаг ховуга дөртен чыл дургузунда
янзы-бүрү эът өргүлдери, далган-тараа өргүлдери салып турган бис дээр силер бе? ^r
26 Хаан-бурганыңар Саккуттуң болгаш сылдыс-бурганыңар Кайванның дүрзүлерин –
боттарыңарга кылып алган дүрзү-бурганнарыңарны ап чораан болгай силер! ^{▼▼ Бо шүлүктүң утказы эки билдинмес. Өске бурунгу сөзүглелде «Силер Молохтуң чадырын, бурганыңар болур Ремфанның сылдызын – боттарыңарга кылып алган дүрзү-бурганнарыңарны ап алгаш чордуңар чоп» деп бижээн.}
27 Ынчангаш Мен силерни Дамаскының ындынче шөлүптер мен ^t» – деп,
Дээрги-Чаяакчы чугаалаан;
Ооң ады – Аг-шериглиг Бурган!