Amo 8 | TyvTUV | STEP | Дээрги-Бурган-Чаяакчы меңээ мындыг көстүүшкүн чорудуп берген. Бышкан чимистиг аргымал хааржак турар болду .

‏ Amos 8

Бышкан чимистиг көстүүшкүн

1 Дээрги-Бурган-Чаяакчы меңээ мындыг көстүүшкүн чорудуп берген. Бышкан чимистиг аргымал хааржак турар болду ^a. 2 Ол: «Чүнү көрүп тур сен, Амос?» – деп айтырарга ^b, мен: «Бышкан чимистерлиг аргымал хааржакты» – деп харыыладым. Дээрги-Чаяакчы ынчан меңээ: «Мээң израиль чонумнуң төнчүзү ^{▼▼ Еврей дылда «төнчү» деп сөс (кец) «бышкан чимис» (кайиц) деп сөс-биле дөмей дыңналыр.} келген-дир ^d: Мен аңаа катап база өршээл көргүспес мен. 3 Мээң шииткелим хүнү кээрге, ордуга ырлар өөлээн ыы-сыыже шилчий бээр» – деп медегледи.

Дээрги-Бурган-Чаяакчы аңаа немей:

«Кижи сеги дыка хөй болур,
оларны улус чер бүрүзүнге ыыт чок октапкаш баар.
4 Силер – ядыыларны бастыксап,
бо чурттуң түреңгилерин чок кылыксап турар улус –
ону дыңнаңар.
5 Силер дээрге: „Кажан-на ай чаазының байырлалы эртип ^e,
далган-тараа садар аргалыг боор бис;
кажан-на амыр-дыш хүнү төне берип ^f, аңмаарларны ажыткаш,
хемчээр саваны бичииледип, өртектерни улгаттыргаш,
шын эвес деңзи шойлары-биле улус мегелээр аргалыг боор бис? ^g
6 Ынчан баксырап калган далган-тарааны садыглаар аргалыг боор бис;
чединмес улусту – акша-мөңгүнге, ядыы улусту – эжеш идик өртээнге-ле
кул кылдыр садып алыр бис ^h“– деп турар улус-тур силер» – диди.

7 Израиль чоннуң чоргааралы Дээрги-Чаяакчы
Бодунуң бажы-биле даңгыраглап ^{▼▼ Азы: «Дээрги-Чаяакчы израиль чоннуң улуургак чоруу-биле даңгыраглап».}:
«Бо улустуң үүлгедиглериниң чаңгызын-даа кезээ мөңгеде утпас мен!
8 Ол үүлгедиглерден чер шимчей бербес бе,
ында чурттап турар кижи бүрүзү ыглай бербес бе?
Бүгү чер, Египетте Нил хем ышкаш, хөлзей бербес бе,
көдүрлүп-даа, чавырлып-даа турбас бе? ^j» – деп чугаалаан.

9 «Мээң шииткелим хүнү кээр – деп, Дээрги-Бурган-Чаяакчы медеглээн. –
Ынчан хүннү дал дүъште ажар кылып каар мен,
чырык хүндүс-ле чер кыры караңгылай бээр ^k;
10 байырлалдарыңарны – ажыг-шүжүг кылдыр,
хамык ырларыңарны – ыы-сыы кылдыр хуулдурар мен ^l,
шуптуңарга качыгдалдың самдар хевин кедирип,
шуптуңарның баштарын тазартыр таарып каар мен;
чуртка ол хүннү кижиниң эр чаңгыс оглунуң өлүмү дээш
кажыыдалы дег кылып каар мен ^m,
ол хүн төнчүзүнге чедир кажыыдал хүнү дег болур».

11 Дээрги-Бурган-Чаяакчы оон ыңай медеглээн:
«Кажан Мээң черже ашты чорударым –
улустуң аъш-чем биле суг чедишпезинден эвес,
а Дээрги-Чаяакчының сөстерин дыңнаар дээш
аштап-суксаары хүннер чоокшулап келген-дир ⁿ.
12 Кижилер бир далайдан өске далайга чедир
Дээрги-Чаяакчының сөзүн дыңнаары-биле чер кезип элеңнедир кылаштап,
соңгу чүктен чөөн чүкче улчуур, ынчалза-даа дыңнавас.

13 Ол шииткел хүнүнде аянныг чараш аныяк оолдар, кыстар
суксаанындан медерелин оскунуптар.
14 Самарияны кем-бурууже киирип турар бурганнар-биле даңгыраглаар,
„Дан хоорайның дириг бурганнары-биле ^o
база Беэр-Шева-биле даңгыраглап тур бис!“дээр улус кээп дүшкеш,
катап көдүрлүп шыдавас».