Col 2 | TyvTUV | STEP | Силер дээш, Лаодикияда чурттаан христианнар дээш база арын көржүп душпааным өске бүгү улус дээш, кайы хире чаныш-сыныш чок демисежип келгенимни билип аарыңарны күзеп тур мен.

‏ Colossians 2

1 Силер дээш, Лаодикияда чурттаан христианнар дээш база арын көржүп душпааным өске бүгү улус дээш, кайы хире чаныш-сыныш чок демисежип келгенимни билип аарыңарны күзеп тур мен. 2 Бүгү ол улус Бурганның чажыды – Христосту билип алгаш ^a, ол долу билиг-биле бажын ажыр байызыннар дээш, оларның чүректерин ынакшылдың чештинмес доңу-биле доңнап, сорук киирер дээш ^b демисежип келдим. 3 Чүге дээрге мерген угаан болгаш билигниң хамык эртине-байлаан Христоста шыгжаан ^c.

4 Кым-даа силерни ааска чаагай оптуг сөстер-биле дуурайлап шыдавазын дээш ^d, силерге ону чугаалап тур мен. 5 Мага-бодум араңарга турбаза-даа, сагыш-сеткилим силер-биле кады ^e. Ол ышкаш силерниң ужур-чурумуңарны ^f, Христоска бүзүрээниңерниң кайы хире быжыын көргеш, өөрүп тур мен.

Шажын-чүдүлгениң эвес, а Христостуң чалчалары болуңар

6 Бир-тээ Христос Иисусту Дээргивис деп хүлээп көрген болганыңарда, Ооң-биле харылзаалыг амыдыраңар ^g. 7 Христостан ханы дазыл тыртып, амыдыралыңарны Ооң үндезининге тудуп үндүрүңер ^h, силерге суртаалдааны дег, бүзүрелиңерден күш кириңер. Дээрги-Чаяакчыга өөрүп четтиргениңер эриин ашсын! ⁱ 8 Кичээниңер: силерни кандыг-бир кижи Христостан эвес, а улустуң чаңчылдарындан ^j, бо делегейни башкарган хоойлу-дүрүмнеринден ^k укталган меге хоозун угаашкыннар-биле дуурайлап кааптазын ^l. 9 Чүге дээрге Бурганның бүдүн-бүрүн бүдүжү Христоста боттангаш, эът-мага-боттуг бооп, амыдырай берген ^m. 10 Бүгү күштерни болгаш эрге-чагырга ээлерин башкарып турар ⁿ Христос-биле харылзаа тударыңарга, Ол силерни бүрүнү-биле бүргей апкан ^o. 11 Ооң-биле харылзаалыг апаргаш, кыртыжап демдектээшкинни база алган силер. Ынчалза-даа кижи холу-биле кылган кыртыжап демдектээшкин эвес-тир ол ^p – Христостуң кылган кыртыжап демдектээшкини бачыттыг бүдүжүңерни адыра сивирип каапканыңарда ^q. 12 Силер сугга суктуруп тура, Христос-биле кады ажааттыргаш, а оон Ону өлүглер аразындан ковайтыпкан Бурганның күчүзүнге бүзүрээниңер дамчыштыр Ооң-биле кады катап дирилген силер ^r.

13 Бир шагда кыртыжап демдектеттирбээн бачыттыглар турганыңар ужун өлүг чордуңар. Ынчалза-даа Бурган ам силерни Христос-биле кады тынгарыпкан ^s. Ол бистиң бүгү бачыттарывысты өршээген ^t. 14 Ол ыдыктыг хоойлунуң биске удур бижээн айтыгларының даңзызын – өрелеривистиң даңзызын балап каапкаш ^u, ону белдир-ыяшка чыпшыр кадап, күш чок болдурду ^v. 15 Ол күштерни болгаш эрге-чагырга ээлерин демисежир харык чок кылып, белдир-ыяшка өлүмүнүң күжү-биле оларны тиилээш ^w, ажыы-биле сойгалап, кочу-шоотка киирген ^x.

16 Ынчангаш чүнү ижип-чип турарыңарга база шажынчы байырлал хүннеринге, ай чаазынга азы амыр-дыш хүнүнге сылдаглап ^y, кымның-даа силерни буруу шаварын болдурбаңар ^z. 17 Ол бүгү дээрге чедип кээр ужурлуг чүүлдүң чүгле хөлегези-дир ^aa, а алыс утка-дөс, үндезин – Христоста! 18 Томаараан бооп баажыланганындан мага ханып, дээрниң төлээлеринге мөгейип, көрген ^{▼▼ Өске бурунгу сөзүглелдерде «көрген» эвес, а «көрбээн» деп бижээн.} ажыдыышкыннарынга ооргаланып, өрү көрдүнүп чоруур улустуң силерни буруу шава бээрин болдурбаңар. Олар чүгле кижиниң угаан-бодалын барымдаалаар болгаш, хей-ле улуургаарлар. 19 Ындыгларда мага-боттуң Бажы-биле харылзаа чок. А ол Баштың бүгү кезектери сиирлер болгаш чүстер дузазы-биле каттыжып тудушкан бүдүн мага-ботту башкарарга, мага-бот бүрүнү-биле Бурганның күзеп-бодаанын ёзугаар өзүп-мандыыр ^ac.

Христос-биле кады өлүрү болгаш амыдыраары

20 Христос-биле кады өлү бергеш ^ad, бо делегейни башкарып турар хоойлу-дүрүмден ^ae хостуг апарган силер. Чүге-ле ам, бо делегейге хамааржыр хевээр дег, мындыг айтыышкыннарга чагыртып чоруур силер: 21 «Ону тутпа!», «Мону амзава!», «Аңаа хол дегбе!» ^af 22 Ол бүгү хоруглуг чүүлдер дээрге ажыглаан соонда күш чок апаар чүүлдер-дир, оларның ажыглалы-даа ол-дур. Ындыг сагылгалар дээрге чүгле кижилер чогааткан дүрүмнер болгаш өөредиглер-дир! ^ag 23 Ол бүгү дүрүмнер, чүгле даштындан көөрге, мерген угаанныг бооп сагындырар. Оларда чүгле кижиниң чогаатканы чүдүлге, меге томаарыышкын болгаш мага-боттуң чилчиин үзер чорук бар, а бачыттыг бүдүжүнге удур туржур кандыг-даа күш чок!