Col 4 | TyvTUV | STEP | Ээлер, силер база кулдарыңарны ак сеткилдиг болгаш чөптүг аажылаңар. Силерниң база дээрде Ээңер барын утпаңар.

‏ Colossians 4

1 Ээлер, силер база кулдарыңарны ак сеткилдиг болгаш чөптүг аажылаңар. Силерниң база дээрде Ээңер барын утпаңар.

Өске чагыг-сүмелер

2 Чүткүлдүг мөргүңер ^a, мөргүп тура, сергек болуңар база өөрүп четтириңер! 3 Бис дээш база Бурган медээвиске орукту ажыдып берип, Христостуң чажыдын суртаалдаар арганы биске берзин дээш, мөргүңер ^b. Ол суртаал ужун мен ам хоругдал адаанда тур мен ^c. 4 Улуска ол чажытты болур-чогууру-биле, мээ-медерелче сиңниктир медеглээрим дээш, мөргүңер. 5 Бурганга бүзүревээн улус-биле боттарыңарны сарыылдыг ап, үени шын ажыглаңар ^d. 6 Кижи бүрүзүнге херектиг харыы тудуп шыдаар кылдыр, чугааңар үргүлчү чедингир болгаш чечен-мерген болзун ^e.

Түңнел байыр чедириишкиннери

(Эф. 6:21-22)

7 Силерге мээң дугайымда бүгү чүвени ханы ынак дуңмам Тихик ^f чугаалап чедер. Ол Дээрги-Чаяакчыга шынчы бараан болуп, кады ажылдап турарым кижи-дир. 8 Ону силерже чорудуп турар сорулгам мындыг: ол бистиң канчаар амыдырап-ажылдап турарывысты силерге дыңнаткаш ^{▼▼ Өске бурунгу сөзүглелдерде «Ол бистиң канчаар амыдырап-ажылдап турарывысты силерге дыңнаткаш» деп сөстерни эвес, а «Ол силерниң канчаар амыдырап-ажылдап турарыңарны билип алзын база» деп сөстерни бижээн.}, сеткил-сагыжыңарны сорук киирзин ^h. 9 Тихикти мен бүзүрелдиг база ханы ынак дуңмам Онисим-биле ⁱ кады силерже чоруттум. Ол силерниң чаңгыс чер чурттугларыңарның бирээзи боор кижи. Мында чүү болуп турарын олар силерге бирден-бирээ чок чугаалап чедерлер.

10 Мээң хоругдал адаанда кады турар эжим Аристарх ^j биле Варнаваның төрел дуңмазы Марк ^k олар силерге байыр чедирди. (Маркка хамаарыштыр айтыышкын алган силер: ол силерге чеде бээрге, ону хүндүткел ёзузу-биле уткуңар.) 11 Иуст ^l деп адаткан Иисус база силерге байыр чедирип тур. Бурганның Чагыргазы дээш, мээң-биле кады ажылдап турар улустуң аразында чүгле олар иудейлер чүве. Олар меңээ улуг деткимче бооп келди.

12 Эпафрас ^m база силерге байыр чедирип тур. Ол силерниң бирээңер-дир база Христос Иисустуң чалчазы боор кижи-дир. Силер дээш, ол үргүлчү аажок чүткүлдүг мөргүп, Бурганның күзел-соруунга бүрүнү-биле чагырткан, четчип-бышкан болуруңар дээш, Бургандан дилеп турар-дыр. 13 Ооң силер дээш база Лаодикияда, Иерапольда чурттаан бүзүрээн улус дээш, кайы хире карак кызыл ажылдап турарын бодум херечилеп тур мен. 14 Бистиң ханы ынаавыс эмчи Лука биле Димас олар ⁿ база силерге байыр чедирип турлар. 15 Лаодикияда бүзүрээн ха-дуңмага, а ол ышкаш Нимфага ^{▼▼ Өске бурунгу сөзүглелдерде Нимфа (Нимфия) деп кыс атты эвес, а Нимфан деп эр атты бижээн.} база ооң бажыңында чыглып турар христианнарга мээң байырым чедириңер ^p. 16 Бо чагааны араңарга номчуп дооскаш, ону Лаодикияда христиан ниитилелге база номчуур кылдыр дамчыдып бериңер ^q. А силер Лаодикиядан чедип кээр чагааны база номчуңар. 17 Архиппке ^r мынча деп чугаалаңар: «Дээрги-Чаяакчыга бараан боор дээш хүлээнген ажыл-херээңни албан күүседиринге бүзүрелдиг бол».

18 Бодумнуң холум-биле бижип олур мен: Павелден байыр ^s. Хоругдал адаанда турарымны утпаңар. Бурганның авыралы шуптуңарга доктаазын! ^{▼▼ Өске бурунгу сөзүглелдерде бо шүлүк «аминь» деп сөс-биле төнген.}