Dan 1 | TyvTUV | STEP | Иудеяның хааны Иоакимниң чагыргазының үшкү чылында Вавилоннуң хааны Навуходоносор Иерусалимче кээп, хоорайны бүзээлеп алган .

‏ Daniel 1

Дөрт аныяк израильчи Вавилонда

1 Иудеяның хааны Иоакимниң чагыргазының үшкү чылында Вавилоннуң хааны Навуходоносор ^a Иерусалимче кээп, хоорайны бүзээлеп алган ^b. 2 Иудеяның хааны Иоакимни база Бурганның өргээзиниң эдилелдериниң чамдыызын Дээрги-Чаяакчы Навуходоносорнуң холунче киирипкен. Навуходоносор ол эдилелдерни Сеннаарже ^{▼▼ Сеннаар – Вавилон черниң эрги ады (Э. д. 10:10 көр).} аппаргаш, бодунуң бурганының өргээзинде эртине шыгжамырынче суп каан ^d.

3 – 4 Вавилоннуң хааны израильчилерниң аразындан хаан азы ызыгууртан уктуг, четпес-дудуу эвес, арын-шырайы чараш, эртемче чүткүлдүг, угаангыр-сагынгыр, хаанның ордузунга албан-хүлээлге эрттиреринге тааржыр аныяк оолдар шилээш, оларны халдей дыл болгаш үжүк-бижикке өөредирин дүжүметтер даргазы Асфеназка дужааган. 5 Хаан оларга хүн бүрүде чиир чемни, ижер араганы бодунуң аъш-чеминден аңгылап берип турзун деп дужааган. Олар үш чыл иштинде өөренгеш, ол хуусаа төнерге, хаанга бараан болуп эгелээр ужурлуг.

6 Оларның аразында Иуданың аймаандан Даниил ^e, Анания, Мисаил болгаш Азария деп оолдар турган. 7 Дүжүметтер даргазы оларга өске аттар берип каан чүве-дир: Даниилге – Белтешацар, Ананияга – Седрах, Мисаилге – Мисах база Азарияга – Авденаго деп ат тывыскан ^f.

8 Даниил хаанның хандырганы чем-биле-даа, арага-биле-даа бодун бужартатпас деп ыяк шиитпирлеп алган ^{▼▼ Ол аъш-чем биле араганың дээжизин вавилон бурганнарга өргүп турган чадавас.}. Ынчангаш ол дүжүметтер даргазындан арыг эвес чем чивезин чөпшээрээрин дилээн ^h. 9 Бурган дүжүметтер даргазын Даниилге энерел көргүзүп, ону кээргээр кылып каан ⁱ. 10 Ол дарга Даниилге: «Мен дээрги хаанымдан коргар-дыр мен. Ол боду силерниң ижер-чиир аъш-чемиңерни айтып берген болгай. А бир эвес хаан, өске эш-өөрүңерге деңнээрге, силерниң арган-дорганыңарны эскерип каар болза канчаарыл? Ынчан мен силер дээш хаанымның мурнунга бажым-биле харыылаар апаар мен» – деп харыылаан.

11 Даниил ынчан дарганың ону болгаш ооң үш өңнүүн кадарзын дээш томуйлап кааны таңныылга ^{▼▼ Азы: «Амелцар деп кижиге».} мынча дээн: 12 «Чалчаларыңар бисти шенеп көрүңерем. Он хонук иштинде биске чүгле ногаа, тараа болгаш сугдан өске чем бербейн көрүңер ^k. 13 Ооң соонда хаанның хандырган аъш-чемин чип турар оолдар-биле бистиң арын-шырайывысты деңнеп көрүңер даан. Ооң түңнелинде чалчаларыңар бисти канчаарыңарны бодуңар билиңер».

14 Таңныыл ооң дилээ-биле чөпшээрешкеш, дөрт оолду он хонук иштинде шенеп көрген. 15 Он хонук эрткенде, олар, хаанның хандырган аъш-чемин чип турар оолдарга деңнээрге, чараш болгаш шыырак көстүр болган. 16 Ол хүнден эгелээш, таңныыл оларга үндүрүп берген чем болгаш арага орнунга чүгле ногаа, тараа берип турган. 17 Бурган ол дөрт оолга мерген угаан-сарыылды, бүгү эртемнерге чаяалганы хайырлап турган. А Даниилге янзы-бүрү дүштерни болгаш Бургандан көстүүшкүннерни тайылбырлап билир чаяанны база хайырлаан чүве-дир ^l.

18 Хаанның айтып каан үези чедип кээрге, дүжүметтерниң даргазы оолдарны Навуходоносорга эккелген. 19 Хаан олар-биле чугаалажып көөрге, бүгү оолдардан Даниилге, Ананияга, Мисаилге база Азарияга чедер улус чок болган. Ынчангаш оларны хаанга бараан болур ажылга киирип каан. 20 Хаан кандыг-даа эртем талазы-биле чугаа чорударга, олар чурттуң бүгү илби-шидичилер болгаш караң көрнүрлеринден он катап угаанныг болган ^m.

21 Даниил аңаа Кир хаанның чагыргазының бирги чылынга чедир ажылдаан чүве-дир ⁿ.