Dan 10 | TyvTUV | STEP | Персияның хааны Кирниң чагыргазының үшкү чылында Даниилге (азы Белтешацарга) Бургандан ажыдыышкын болган – ол медээ ылап шынныг, дыка күштүг болган.

‏ Daniel 10

Дээрниң төлээзиниң Даниилге көстүп келгени

1 Персияның хааны Кирниң ^a чагыргазының үшкү чылында Даниилге (азы Белтешацарга) ^b Бургандан ажыдыышкын болган – ол медээ ылап шынныг, дыка күштүг болган.

2 Ол үеде мен, Даниил, үш неделя дургузунда качыгдалга турган мен: 3 амданныг аъш-чем амзавайн, арага биле эътке шуут дегбейн, олива үзү-биле чагдынмайн турдум. 4 Бирги айның чээрби дөртте мен улуг Хиддекел хемниң эриинге чордум ^c. 5 Көөрүмге, ында лён хептиг, белинде арыг алдын курлуг бир-ле кижи тур ^d. 6 Ооң мага-боду – эртине даш дег, арны – чырыш дээн кызаңнаашкын дег ^e, карактары – оттуг кезектер дег ^f, холдары болгаш буттары – кылаңнааш хүлер дег ^g, а үнү – мөөң чоннуң шимээни дег. 7 Чүгле мен, Даниил, ол көстүүшкүннү көрүп турган мен. А мээң-биле кады чораан улус ону көрбейн турган ^h. Ынчалза-даа аажок улуг коргуушкун хөме ала бээрге, олар тарадыр маңнажып, чаштына бергеннер.

8 Мен чааскаан арткаш, ол кайгамчык көстүүшкүннү көрүп турдум. Күжүм суларап, арным агарып, шаг-шинээм төнүп калган. 9 Мен ооң үнүн дыңнап кааш, ооң ыыдындан билинместеп, черже доңгая барып дүшкен мен ⁱ. 10 Ынчан мени бир хол көдүрүп эккелди ^j – ам холдарым-биле черде даянып алган, дискээм кырында олур мен. 11 Ол кижи меңээ: «Даниил, Бурганның эргим кижизи! ^k Мээң сеңээ чугаалаан чүвемни чедип ал. Туруп кел, чүге дээрге мени сенче чорудупкан-дыр» – диди. Ол ынча дээрге, мен үпчү бодум сириңейнип туруп келдим.

12 Ол меңээ мынча диди: «Кортпа, Даниил! Бурганың мурнунга бодуңну томаартып, билигже чүткүп эгелээн бирги хүнүңден эгелээш-ле, сээң сөстериңни Бурган дыңнап каан ^l. Сээң мөргүлүң ёзугаар мен сеңээ чедип келдим. 13 Персияның ээзи меңээ чээрби бир хүн иштинде удурланып келди. Аңаа мен чааскаан арткаш, Персияның хааннары-биле ачыр-дачыр көрүштүм. Чүгле Михаил ^m, үстүкү нояннарның бирээзи, меңээ дуза чедирди. 14 Сээң чонуң-биле келир үеде чүү болурун сеңээ чугаалаар дээш келдим ⁿ. Чүге дээрге бо көстүүшкүн ол үеге хамааржыр чүве-дир ^o».

15 Ол меңээ ынча дээрге, мен черже көрүп алган ыыт чок турдум. 16 Ынчан кижи хевирлиг бир-ле амытан мээң эриннеримге дээптерге ^p, чугаам үнүп келди. Мурнумда турар кижиге мынча дидим: «Дээргим! Көстүүшкүннер хараазы-биле мен далып-тыртып турдум, шаг-шинээм төнүп, күжүм чидириптим. 17 Силерниң чалчаңар мен дээргим силер-биле чугаалажып шыдаар деп мен бе? Мээң шуут күжүм чок-тур, тыныжым база чедишпейн тур».

18 Кижи хевирлиг амытан база катап меңээ дээптерге, күжүм немежип келген. 19 Ол мынча диди: «Кортпа, Бурганның эргим кижизи! ^q Быжыглан, шупту чүве эки-чаагай болур, быжыглан!»

Ол сөстерден меңээ катап күш тыптып келген. Мен: «Дээргим ам чугаалазын! Мээң күжүм эгидип бердиңер» – дидим.

20 – 21 А ол меңээ: «Сеңээ чүге чедип келгенимни билир сен бе? Мен сеңээ Алыс Шынның Номунда ^r чүнү бижип каанын чугаалап бээр мен. Мен ам дедир Персияның ээзи-биле тутчур дээш чоруптар мен. Чоруй баарымга, Грецияның ээзи чедип кээр. Ол күштерге удур тулчуушкунга мени, чүгле силерниң нояныңар Михаилден өске, кым-даа деткивес-тир.