Dan 12 | TyvTUV | STEP | «Ынчан улуг ноян, сээң чонуңнуң болчукчузу Михаил чедип кээр, чүге дээрге мурнуку үелерде чаңгыс-даа чоннуң көрүп көрбээни айыыл-халап үези эгелээр . Ынчан сээң чонуң камгалаттырар – Бурганның номунче киир бижиттирген бүгү улус.

‏ Daniel 12

Төнчү үе

1 «Ынчан улуг ноян, сээң чонуңнуң болчукчузу Михаил ^a чедип кээр, чүге дээрге мурнуку үелерде чаңгыс-даа чоннуң көрүп көрбээни айыыл-халап үези эгелээр ^b. Ынчан сээң чонуң камгалаттырар – Бурганның номунче ^c киир бижиттирген бүгү улус. 2 Черде хөмдүрген мөчү-сөөктерниң хөй кезии оттуп кээр ^d: чамдыызы мөңге амыдыраар дээш, өскелери – мөңгеде бужар бак, шоотка кирер дээш ^e. 3 Мерген угаанныглар ^f дээрде хаяа дег чырый бээр ^g, хөй кижилерни шын орукче киирген улус база сылдыстар дег кезээ мөңгеде чырый бээр! ^h 4 А сен, Даниил, бо сөстерни чажыт кадагалап, номну таңмалап ⁱ, шыгжап ал – хөй кижилер ону номчуп ^{▼▼ Бо домактың утказы эки билдинмес. Болгу дег өске утказы мындыг: «Хөй кижилер азып-тениир».}, билиг көвүдеп кээр үеге чедир».

5 Ынчан мен, Даниил, оон өске база ийи кижи турарын көрүп кагдым: бирээзи – ындыы эрикте, өскези – бо талазында. 6 Оларның бирээзи хем суунуң кырында турар лён хептиг кижиден ^k: «А ол кайгамчык болуушкуннар кажан төнерил?» – деп айтырды ^l.

7 Хем суунуң кырында турар лён хептиг кижиниң харыызын мен дыңнап кагдым. Ийи холун дээрлерже суна туткаш, ол мөңге дириг Бурганның ады-биле даңгыраглады: «Бир чыл, ийи чыл база чартык чыл эртерге ^{▼▼ «Чыл» деп сөстүң болгу дег өске утказы: «Хуусаа» (7:25 көр).} – ыдыктыг чоннуң күжү оон ыңай бастырбас апаарга, шупту чүве төнер».

8 Мен ону дыңнааш, чүнү-даа билбейн бардым. Ынчангаш катап айтырдым: «Мээң дээргим, ол бүгүнүң түңнели кандыг болур ирги?»

9 Ол мынча деп харыылады: «Бар че, Даниил. Ол бүгү төнчү үеге чедир таңмалап шыгжаттынган чажыт болгай. 10 Хөй-ле улус багындан адырлып, арыглаттынып-аштадыр ⁿ, а бузут-бактыг улус бузут-бакты кылырын уламчылаар ^o. Бузут-бактыг улус чүнү-даа угаап билбес, а мерген угаанныглар ^p чүвени билир боор ^q. 11 Хүннүң-не салыр өргүлдерни болдурбайн барганындан база хоозуралдың бужар чудун тургусканындан бээр 1290 хүн эртер ^r. 12 А кым 1335 хүннү манап шыдаптарыл, ол кижи амыр-чыргалдыг болур.

13 А сен төнчү хүнче уткуштур бодуң орууң-биле чорувут. Сен оожургалды тып аар сен, ооң соонда сөөлгү хүнде туруп келгеш, шаңналың алыр сен» ^s.