Dan 3 | TyvTUV | STEP | Навуходоносор хаан бедии – алдан, дооразы – алды кыры дурттуг алдын көжээ кылдыргаш, ону Вавилон девискээринде Деира оргулаажынга тургузуп каан.

‏ Daniel 3

Алдын көжээ болгаш отка шаажылал

1 Навуходоносор хаан бедии – алдан, дооразы – алды кыры дурттуг алдын көжээ кылдыргаш, ону Вавилон девискээринде Деира оргулаажынга ^a тургузуп каан. 2 Ооң соонда хаан бүгү дүжүметтерни, тус чер чагырыкчыларын, чөвүлекчилерни, акша-хөреңги кадагалакчыларын, шииткекчилерни, даргаларны, чурт баштыңнарын тургузуп алган көжээзин ыдыктаар ёзулалга кээп, чыглырынче кыйгырткан. 3 Бүгү дүжүметтер, тус чер чагырыкчылары, чөвүлекчилер, акша-хөреңги кадагалакчылары, шииткекчилер, даргалар, чурт баштыңнары хаанның көжээзиниң мурнунга чыглып келгенде, 4 медеглекчи ыыткыр мынча дээн: «Дыңнаңар, бүгү чоннар, аймактар болгаш төрел бөлүктер! 5 Труба, эдиски, лимби, чадаган, чанзы, кеңгирге – бо бүгү хөгжүм үнүн дыңнап каг сал-ла, Навуходоносор хаанның тургузуп кааны алдын көжээге черге чедир мөгейип, кээп дүжер силер. 6 Мөгейбес болгаш кээп дүшпес кижини чалын-оттуг суугуже киир октаптар!» ^b 7 Труба, эдиски, лимби, чадаган, чанзы, кеңгирге болгаш өске-даа хөгжүм үннери чаңгыланып эгелээри билек, бүгү чоннар, аймактар болгаш төрел бөлүктер Навуходоносор хаанның тургузуп кааны алдын көжээге черге чедир мөгейип, кээп дүшкеннер.

8 Ол үеде чамдык халдейлер иудейлерни хоптанып чеде берген ^c. 9 Олар Навуходоносор хаанга мынча дээн: «Хаан мөңге назылазын! ^d 10 – 11 Труба, эдиски, лимби, чадаган, чанзы, кеңгирге болгаш өске-даа хөгжүм чаңгыланып үнерге, бүгү чоннар, аймактар болгаш төрел бөлүктер алдын көжээге черге чедир мөгейип, кээп дүшсүн, а аңаа мөгейип кээп дүшпээн кижини чалын-оттуг суугуже киир октаптар деп бүгүдеге силер, хаан, чарлык үндүрген болгай силер. 12 А Вавилоннуң ажыл-агыйын башкарарын дагзып кааныңар иудейлер ^e – Седрах, Мисах болгаш Авденаго олар силерни дыңнавайн, силерниң бурганнарыңарга бараан болбайн, силерниң тургузуп каан алдын көжээңерге мөгейбейн турарлар-дыр».

13 Ону дыңнааш, Навуходоносор аажок ажынып-хорадааш ^f, Седрах, Мисах болгаш Авденагону эккээрин дужааган. Оларны хаанга эккээрге, 14 Навуходоносор айтырган: «Седрах, Мисах болгаш Авденаго! Силерни мээң бурганнарымга бараан болбайн, мээң тургузуп каан алдын көжээмге мөгейбейн турар дээр-дир, ол шын бе? 15 Мындыг-дыр: труба, эдиски, лимби, чадаган, чанзы, кеңгирге болгаш өске-даа хөгжүм үннери чаңгыланып эгелээри билек, мээң кылганым алдын көжээге черге чедир мөгейип, кээп дүжеринге белен болуңар; ынчанмас болзуңарза, доп-дораан чалын-оттуг суугуже киир октаттырар силер! Ынчан кандыг бурган силерни мээң холумдан адырып шыдаарыл?» ^g

16 – 17 Ынчалза-даа Седрах, Мисах болгаш Авденаго Навуходоносор хаанга: «О хаан! Силерге ол дугайында харыы бээривис албан эвес. Бистиң бараан болуп чоруур Бурганывыс суугунуң одундан-даа, силерниң холуңардан-даа бисти адырып шыдавас деп бе? 18 Бир эвес адырып албас-даа болза, дөмей-ле, хаан, билип алыңар: силерниң бурганнарыңарга бараан болбас бис, силерниң тургузуп каан алдын көжээңерге-даа мөгейбес бис» – деп чугаалаан.

19 Ынчан Навуходоносор Седрах, Мисах болгаш Авденагога оон-даа артык ажына бээрге, ооң арны хуула берген ^h. Ол суугуну ооң мурнунда турганындан чеди катап изиг кылдыр одаарын дужааган. 20 Бодунуң шерииниң эң шыырак дайынчыларынга Седрах, Мисах болгаш Авденаго оларны хүлүп-шарааш, чалынныг отче киир октаптарын дужааган. 21 Шериглер оларны хүлүп-шарааш, хөйлең, бөрт болгаш өске-даа идик-хеви-биле олчаан отче киир октапкан. 22 Хаанның коргунчуг чарлыын ёзугаар суугуну эмин эрттир изидир одап каанындан, Седрах, Мисах болгаш Авденагону шаажылаар яланы күүседип турган улус боттары безин чалбыыштан өрттенип өлүп калган. 23 Седрах, Мисах болгаш Авденагону үжелдирзин хүлүглүг хевээр отче октапканнар ^{▼▼ Чамдык бурунгу грек сөзүглелдерде ол үш кижиниң Бурганны алдаржыткан ыр мында кирген.}.

24 Хенертен Навуходоносор хаан кайгаанындан далаш-биле туруп келгеш, чөвүлекчилеринден айтырган: «Бис суугуже үш хүлүглүг кижи октапкан болгай бис але?»

«Ийе, шак-ла ындыг, хаан» – деп харыылааннар.

25 Ол мынча дээн: «А мен от ортузунда хостуг кылаштажып турар каң кадык дөрт кижи көрүп тур мен ^j. Дөрт дугаар кижи Бурганның бир оглунга дөмей-дир». 26 Навуходоносор чалбыышталып турар оттуг черге чоокшулап келгеш: «Седрах, Мисах болгаш Авденаго, Дээди Өрүкү Бурганның чалчалары! ^k Оон үнүп келиңерем!» – деп кыйгырган. Ынчан Седрах, Мисах болгаш Авденаго от аразындан үнүп келгеннер. 27 Даргалар, тус чер чагырыкчылары, чөвүлекчилер, хаанның дүжүметтери чыглып келгеш, көөрге, ол үш кижиге от дегбээн, бажының дүктери өрттенмээн, идик-хеви бүдүн, олардан өртеңзиг чыт безин келбес болган.

28 Навуходоносор хаан мынча дээн: «Седрах, Мисах болгаш Авденагонуң Бурганынга алдар! Ол Бодунуң төлээзин чорудупкаш, Аңаа идегээн чалчаларын камгалап алган-дыр. Олар хаанның дужаалын тооваан, боттарының амы-тынын бодаваан – бодунуң Бурганындан өске кандыг-даа бурганга бараан болбаан, мөгейбээн. 29 Бүгү чоннарга, аймактарга болгаш төрел бөлүктерге мээң үндүрген дужаалым бо-дур: кым Седрах, Мисах болгаш Авденагонуң Бурганын бак сөглээр болдур, ол кижини үзе-чаза кезип шаажылаар, ооң бажыңын узуткап каар! ^l Чүге дээрге ол Бургандан өске кандыг-даа бурган ынчаар камгалап шыдавас». 30 Ооң соонда хаан Седрах, Мисах болгаш Авденагога Вавилон девискээринге бедик эрге-дужаалдарны берип, депшиткен чүве-дир.

Хаанның кескен ыяш дугайында дүжү

31 Навуходоносор хаанның чер кырында бар бүгү чоннарга, аймактарга болгаш төрел бөлүктерге үндүрген чарлалы бо-дур:

Силерге амыр-тайбың доктаазын! ^m 32 Дээди Өрүкү Бурганның менче
чоруткан кайгамчыктыг чүүлдер болгаш онзагай демдектерин силерге
тоожуп бээрин шиитпирледим.
33 Ооң чоруткан демдектери өндүр улуг,
Ооң кылган кайгамчык чүүлдери күштүг!
Ооң хааннаашкыны – мөңге быжыг,
Ооң эрге-чагыргазы – бүгү салгалдар кырында турар! ⁿ