Dan 7 | TyvTUV | STEP | Вавилоннуң хааны Валтасарның чагыргазының бирги чылында Даниил удуп чыткаш, дүш дүжээн. Ооң соонда ол дүжүн бижип алган. Ооң чугаазы мынчаар эгелээн.

‏ Daniel 7

Дөрт араатан дугайында көстүүшкүн

1 Вавилоннуң хааны Валтасарның чагыргазының бирги чылында ^a Даниил удуп чыткаш, дүш дүжээн. Ооң соонда ол дүжүн бижип алган. Ооң чугаазы мынчаар эгелээн. 2 Даниил мынча деп чугаалаан:

Көөрүмге, дүнеки көстүүшкүнүмде дээрниң дөрт хады ^b улуг далайның чалгыгларын хөлзедип турар болду. 3 Далайдан аңгы-аңгы дендии улуг дөрт араатан аң үнүп келди ^c. 4 Биргизи – арзылаңга дөмей, ынчалза-даа эзирнии дег чалгыннарлыг. Бир көөрүмге, ооң чалгыннарын одура тырткаш, ону черден көдүргеш, буттарының кырында кижи-даа ышкаш кылдыр тургузуп каан тур. Аңаа кижинии дег угаан-чүрек берип каан. 5 Ийи дугаары хереп туруп алган адыгга дөмей. Ооң аксында диштериниң аразында үш ээги ^{▼▼ Азы: «Үш азыг».} көстүп турар. Аңаа: «Туруп баргаш, эъттен мага хандыр чип ал!» деп айтып кааннар. 6 Ооң соонда база бир араатан көрүп кагдым. Ол ирбишке дөмей ^e, ынчалза-даа ооргазында куштуу дег дөрт чалгынныг. Ол араатан дөрт баштыг болду. Аңаа чагырга хүлээдип каан. 7 Оон дүнеки көстүүшкүнүмде дөрт дугаар араатан көрдүм. Ол дендии коргунчуг, аажок күштүг, ооң улуг диштери демирден бүткен. Ол араатан чүнү-даа сыырыптар, үрегдээр, артып калган чүвелерни буттары-биле үрей тепкилеп кааптар. Ол демги үш араатанга дөмейлешпес – он мыйыстыг болду ^f. 8 Мен ол мыйыстарны топтап көөрүмге, оларның аразында бир бичии мыйыс өзүп орар ^g, а эрги мыйыстарының үжүн аңаа чайлап берзин дээш тура тыртып каан. Ол мыйыс кижи ышкаш карактарлыг, менээргенип чугааланыр аастыг ^h.

9 Ооң соонда мен дараазында чүүлдү көрүп каан мен: каш дүжүлгелер тургузуп каарга ⁱ, үе-дүптен бээр амыдыраан Ирей бодунуң дүжүлгезинге олурупкан ^j. Ооң хеви – хар дег ак, а бажының дүгү – арыг ак хой дүгү дег ^k. Ооң дүжүлгези – өөскээн чалбыыш, дугуйлары – кыпкан отка бүргеткен ^{▼▼ Бурунгу еврейлерниң бодалы-биле, Бурганның дүжүлгези дугуйлуг чууза-тергеге дөмей (Иез. 1 эгени көр).}. 10 Ооң мурнундан эге бажын алгаш, оттуг агым хем дег чаттылган. Муң-муң кижи Аңаа бараан болган, түмен-сая кижи Ооң мурнунда турган ^m. Шииткел эгелээн, номнар ажыттына берген ⁿ. 11 Ынчан мен мону көрдүм: мыйыстың менээргенип чугаалаан сөстери дээш, дөрткү араатан аңны өлүрген база ооң мөчүзүн узуткап, өрттедипкен ^o. 12 А арткан араатаннарның эрге-чагыргазы казыттынган, ынчалза-даа оларга кезек өйде дириг артарын чөпшээрээн.

13 Оон ыңай дүнеки көстүүшкүнүмде мындыг чүве көрдүм. Кижи амытан оглу ышкаш бир-ле Кижи ^p дээрниң булуттары-биле бүргеттинип алган келген ^q. Чоокшулап кээрге, ону үе-дүптен бээр амыдыраан Ирейге чедире берген. 14 Аңаа эрге-чагырганы, алдар-хүндүнү база хааннаашкынны хүлээдип берип каан ^r. Бүгү чоннар, аймактар болгаш төрел бөлүктер аңаа чагырты берген. Ооң эрге-чагыргазы – мөңге болгаш казыттынмас, Ооң хааннаашкыны кажан-даа узуткаттырбас ^s.

Көстүүшкүннү тайылбырлааны

15 Мен, Даниил, көстүүшкүнүмде ол бүгүнү көргеш, дүвүрелге алыстым – ол көстүүшкүннерден аажок корттум ^t. 16 Мен аңаа турганнарның бирээзинге чеде бергеш, ол бүгүнүң утказын айтырдым. Ол ынчан мээң көрген дүжүмнү тайылбырлап берди: 17 «Ол дендии улуг дөрт араатан аң дээрге чер кырын чагырар дөрт хаан-дыр. 18 Ынчалза-даа ооң соонда хааннаашкын Дээди Өрүкү Бурганның ыдыктыг чонунуң холунче шилчиир. Ынчан олар чагырганы кезээ мөңгеде алыр ^u».

19 Оон мен өскелерге дөмейлешпес, аажок коргунчуг, демир диштерлиг болгаш хүлер дыргактарлыг, чүнү-даа сыырыптар, үрегдээр, артып калган чүвелерни буттары-биле үрей тепкилеп кааптар дөрткү араатанның дугайында билип алыксай берген мен. 20 Ооң бажында он мыйызы чүнү айтып турарыл; эрги мыйыстарының үжүн аңаа чайлап берзин дээш тура тыртып каан соонда, карактарлыг, менээргенип чугааланыр аастыг, өскелеринден улгадыр өскен чүү мыйызыл ол? 21 Мен ол мыйыстың ыдыктыг чон-биле канчаар дайын эгелээш, оларны тиилеп турганын көрдүм ^v. 22 Ынчан үе-дүптен бээр амыдыраан Ирей келгеш, Дээди Өрүкү Бурганның ыдыктыг чонунуң чаргы-чаалызын шиитпирлээн: оларның дүжүлгени ээлеп, хааннап эгелээр үези келди.

23 Ол кижи меңээ мынча деп харыылады: «Дөрт дугаар араатан аң дээрге чер кырынга дөрт дугаар хаанныг күрүне тыптып кээр дээни ол-дур ^w. Ол аң бүгү өске күрүнелерге дөмейлешпес, бүгү чер кырын таптап, үрегдеп, сыырыптар. 24 Он мыйыс дээрге ол күрүнени башкарар он хаан-дыр. А оларның соонда өскелеринге дөмей эвес бир мыйыс база бир хаан-дыр. Ол хаан үш хаанны базып, томаартып каар. 25 Ол Дээди Өрүкү Бурганга удур чугаалар кылып, Ооң ыдыктыг чонун кызып-кыйып, байырлалдарын болгаш дүрүмнерин өскертип каарын бодаар. Ыдыктыг чон ооң холунче кирер – бир чыл, ийи чыл база чартык чыл иштинде ^{▼▼ «Чыл» деп сөстүң болгу дег өске утказы: «Хуусаа» (12:7 көр).}. 26 Ынчалза-даа шииткел чорудулгазы эгелээрге, ол хаанның эрге-чагыргазы казыттынар: ону чок кылып, бүрүнү-биле узуткап каар. 27 А чырык черде бүгү күрүнелерниң хааннаашкыны, эрге-чагыргазы болгаш өндүр-чаагайы Дээди Өрүкү Бурганның ыдыктыг улус-чонунче шилчий бээр. Ол хааннаашкын – мөңге; бүгү күрүнелер аңаа чагыртып, бараан болур ^y».

28 Ынчалдыр чугаа төндү. Мени, Даниилди, улуг коргуушкун хөме апкан, арным агара берген. А ол чугааны сеткилимге шыгжап алган мен ^z.