Dan 8 | TyvTUV | STEP | Валтасар хаанның чагыргазының үшкү чылында мен, Даниил, баштайгы көстүүшкүннүң соонда база бир көстүүшкүн көрген мен.

‏ Daniel 8

Кошкар биле хуна дугайында көстүүшкүн

1 Валтасар хаанның ^a чагыргазының үшкү чылында мен, Даниил, баштайгы көстүүшкүннүң соонда база бир көстүүшкүн көрген мен. 2 Көстүүшкүнүмде мен Элам девискээринде найысылал хоорай Сузының ордузунга ^b чеде бергеш, Уулай хемниң кыдыында тур мен. 3 Көөрүмге, хем кыдыында кошкар тур. Ол ийи улуг мыйыстыг, а соңнай үнген мыйызы баштайгызындан узун бооп турар. 4 Ол кошкар барыын чүкте, соңгу болгаш мурнуу чүктерде дириг амытан бүрүзүн үзерге, аңаа удур туржуп шыдаар кым-даа чок. Оон камгаланыр арга чок, ол чүнү күзээрил, ону кылып турар, ынчангаш ооң күжү улгадып кел-ле чыдар.

5 Мен ол көрген чүүлүмнүң дугайында боданып тургаш, канчангаш-ла көрүптеримге, барыын чүктен бир хуна чер-делегейни одурту чоруп ор. Ол хуна чер кырынга дегбес чоруп ор, ооң хаваанда чаңгыс дыка улуг мыйыс бар болду. 6 Ол мээң хем кыдыынга көргеним ийи мыйыстыг кошкарже аажок хорадап маңнап бар чыдыр. 7 Оон көөрүмге, хуна кошкарга чоокшулап келгеш, ону дошкуну-биле үзүп-ле эгеледи ^c, ооң ийи мыйызын тура үзүп каапты. Кошкарның аңаа удур туржур харыы чок болган: хуна ону ужур үскеш, тепсеп каапкан – кошкар оон камгаланып шыдаваан.

8 Хуна дыка күштүг апарган. Кажан ооң күчү-күжү улгадып келгенде, улуг мыйызы сыйлып калган, ооң орнунга дөрт чүкче көрүнген дөрт мыйыс үнүп келген ^d. 9 Оларның бирээзинден база бир мыйыс үнүп келген ^e. Баштай ол бичии турган, оон улгадып өскеш, мурнуу болгаш чөөн чүктерже, база Каас чуртче ^{▼▼ Каас чурт – израиль чер дээни ол (Иез. 20:6, 15 көр).} көрнү берген. 10 Ол мыйыс дээрниң аг-шериинге чедир улгадып өскен, оон шериглерниң, сылдыстарның чамдыызын черже дүжүр октапкаш, оларны тепсеп турган ^g. 11 Мыйыс аг-шеригниң Баштыңчызынга чедир безин улгадып өскен: Аңаа бараалгаткан хүннүң-не салыр өргүлдерни ^h соксадып каан база Ооң ыдыктыг өргээзин хоозурадып каапкан ⁱ. 12 Хүннүң-не салыр өргүлдерни база аг-шеригни бузут-бакка суп каан ^{▼▼ Бо домактың утказы эки билдинмес. Болгу дег өске утказы мындыг: «Аг-шериг бодунуң бузут-багы дээш ооң холунче кирген».}. Мыйыс Алыс шынны черже киир таптап турган. Ол ынчаар хөделбишаан, делгереп чоруп турган.

13 Ынчан мону дыңнадым. Дээрниң бир ыдыктыг төлээзи өскезинден айтырып турган ^k: «Бо көстүүшкүннүң болуушкуннары кайы хире үргүлчүлээр ирги? Кажанга дээр хүннүң-не салыр өргүлдер турбазыл, бузут-бак чорук хоозуралга чедирерил, ыдыктыг өргээ болгаш аг-шериг таптаттырарыл?» 14 Демгизи: «2300 кежээ болгаш эртен дургузунда. Ооң соонда ыдыктыг өргээ катап тургустунар» – диди.

15 Ол көстүүшкүннү көргеш, мен, Даниил, ооң утказын билип алырын оралдажырымга, мээң мурнумга эр кижи хевирлиг бир-ле амытан чедип келди. 16 Уулай хемден кижи үнү дыңналып келди. Ол мынча диди: «Гавриил! ^l Көстүүшкүннүң утказын бо кижиге тайылбырлап бер». 17 Гавриил мээң турган черимге чедип келди. Ол чоокшулап кээрге, кортканымдан черже доңгая кээп дүштүм ^m. Ол меңээ мынча диди: «Кижи амытан ⁿ, ол көстүүшкүн төнчү үеге хамааржыр деп билип ал». 18 Гавриил мээң-биле чугаалажып турда, мен черге билинмес чыткан мен ^o. Ынчан ол мени көдүрүп тургузуп кааш, 19 чугаалады:

«Доктааткан төнчү үеде, Бурганның килеңиниң сөөлгү хүннеринде ^p чүү болурун сеңээ чугаалап берейн. 20 Сен ийи мыйыстыг кошкарны көрдүң але. Ол дээрге мидий биле перс күрүне-дир. 21 А хуна дээрге грек күрүне-дир. Ооң хаваанда улуг мыйызы – бирги хааны-дыр ^q. 22 Мыйыс буступ каарга, орнунга дөрт мыйыс үнүп кээри дээрге ол чондан дөрт хаан тыптып кээри-дир. Ынчалза-даа олар бирги хаан ышкаш күштүг эвес боор. 23 Ол хааннарның соонда, бузут-бактың аяа доларга, бардам болгаш кара сагыштыг хаан тыптып кээр. 24 Ооң күжү улгады бээр, ынчалза-даа бирги хаанга ооң күжү четпес боор ^{▼▼ Азы: «Ол күштүг боор, ынчалза-даа бодунуң күжү-биле эвес».}. Ол хаан каржы-дошкун хоозуралды болдурар, хөделбишаан, делгерээр, күчү-күштүглерни болгаш ыдыктыг чонну чылча шаап, таптаар ^s. 25 Кончуг кажар, кара сагыжын чедимчелиг ажыглааш, улуургак апаар. Дыка хөй улусту ол хенертен чылча шаап каар. Ынчангаш ол хаан тергиидекчилерниң Тергиидекчизинге удур тура халааш, адак сөөлүнде бастырып аар – а кеземчени кижиниң кандыг-даа киржилгези чокка алыр ^t. 26 Кежээки болгаш эртенги өргүлдер салып болбас үе дугайында бо көстүүшкүн ылап шын болур. Сен ону улустан чажырып, таңмалап чор. Ол талыгыр ыракта хүннерге хамааржыр ^u».

27 Мен, Даниил, чилчиим үстүп, элээн хонуктар иштинде аарып чыткан мен. Ооң соонда мен катап-ла хаанга бараан болуп чордум. Мен ол көстүүшкүнден дыка сүрээдээн болгаш, утказын билбес турдум.