Dan 9 | TyvTUV | STEP | Мидий уктуг Ахашвероштуң оглу Дарий халдейлерниң хааны апарганының бирги чылында ,

‏ Daniel 9

Даниилдиң чон дээш мөргүлү

1 Мидий уктуг Ахашвероштуң оглу Дарий халдейлерниң хааны апарганының бирги чылында ^a, 2 мен, Даниил, ыдыктыг Бижилгелерде Дээрги-Чаяакчының Иеремия медээчиге сөзүн номчааш, Иерусалим чеден чыл иштинде хоозурап кээр ужурлуг дээрзин билип каапкан мен ^b. 3 Мен ынчан Дээрги-Бурганга мөргүп, чаннып, качыгдал хевин кедип, хүл чаштынып алгаш, шээрленип эгеледим ^c. 4 Мен Бурганым Дээрги-Чаяакчыга чаннып, ажыы-биле чонумнуң бачыттарын миннип ^d, чугааладым: «Дээрги, өндүр улуг болгаш сүртенчиг Бурганым! ^e Сеңээ ынак болгаш Сээң айтыышкыннарың сагып чоруур улус-биле Сен Бодуңнуң керээңни сагып чоруур болгай сен ^f. 5 А бис бачыт кылдывыс, кемниг, шынчы эвес чоруктар үүлгедип, үймээн үндүрүп, Сээң айтыышкыннарыңдан ойталап, Сээң дүрүмнериңни үреп, буруудадывыс ^g. 6 Сээң чалча-медээчилериң Сээң адыңдан бистиң хааннарывыска, чагырыкчыларывыска, бистиң өгбелеривиске – бистиң чуртувустуң бүгү чонунга чүве чугаалаарга ^h, дыңнавайн турдувус. 7 Чөптүг чорук Сээң талаңда, Дээрги, а бис, Иудеяның болгаш Иерусалимниң чурттакчылары – бүгү Израильдиң улузу ам бужар бак атка кирдивис: Сеңээ өскерилгенивис дээш, үндүр ойладыпканың ырак-чоокта, бүгү чурттарда чурттап чоруур улус шуптузу. 8 О, Дээрги-Чаяакчы! Бис, бистиң хааннарывыс-даа, чагырыкчыларывыс-даа, өгбелеривис-даа, бужар бак атка кирдивис: Сеңээ удур бачыт кылган-дыр бис.

9 Бистиң Дээрги-Бурганывыс биске энерел көргүзүп, өршээзин – бис Аңаа удурланып турган болгай бис ⁱ, 10 Бурганывыс Дээрги-Чаяакчыны тооп дыңнавайн, Ооң чалча-медээчилерин дамчыштыр берген хоойлуларын күүсетпейн турган бис.

11 Бүгү израиль чон Сээң хоойлуңну үрээн – Сени дыңнаарын күзевейн, Сенден хая көрнү берген. Ынчангаш биске Бодуңнуң чалчаң Моисейниң хоойлузунда бижээни каргыш болгаш шииткел онаашкан ^j, чүге дээрге бис Бурганның мурнунга бачыт кылган-дыр бис. 12 Бурганның биске болгаш бистиң баштыңчыларывыска чугаалаан сөстери бүткен-дир: Ол бисче коргунчуг айыыл-халапты чорудупкан – Иерусалимге болган дег халап чырык чер кырынга кажан-даа болуп көрбээн ^k. 13 Моисейниң хоойлузунда бижээни бүгү айыыл-халап бисти хөме алган-дыр ^l. Ынчалза-даа бис Бурганывыс Дээрги-Чаяакчыдан ол-ла хевээр өршээл дилевээн бис, боттарывыстың кем-буруувустан адырлып, Ооң алыс шынын ханы билип албаан-дыр бис. 14 Дээрги-Чаяакчы бисче айыыл-халап ыдарын саадатпаан, бисче ону чорудупкан. Бурганывыс Дээрги-Чаяакчы Бодунуң бүгү херектеринге чөптүг, а бис Ону дыңнаваан-дыр бис ^m.

15 О, Дээрги-Бурганывыс, Сен күштүг холуң-биле Бодуңнуң чонуңну Египеттен үндүрүп алдың ⁿ, ынчангаш Сээң адың амдыгаа дээр алдарлыг, а бис бачыт үүлгеткеш, буруудадывыс. 16 Дээргим! Сээң кезээде чөптүүң ёзугаар ^o, Бодуңнуң кыптыккан килеңиңни ыдыктыг дааңда турар Иерусалим хоорайыңдан чавырып ап көр. Бистиң бачыдывыс хараазындан база бистиң өгбелеривистиң буруузу-биле Иерусалим болгаш Сээң чонуң чоок-кавының чоннарынга куду көрдүрткен ^p. 17 О, бистиң Бурганывыс! Бодуңнуң чалчаңның чалынган мөргүлүн дыңнап көр, хоозураан өргээңни Бодуңнуң ээ көрүүшкүнүң-биле Бодуң алдарың дээш чырыдып көр! ^q 18 Дилээмче кичээнгейден салып көр, мээң Бурганым! Көрүжүңнү бисче угландырып ^r, Сээң ат-алдарыңга тураскааткан хоорай канчаар хоозураанын көр! Бис бодувустуң шынныывыска идегээш эвес, а Сээң өндүр улуг кээргелиңге идегээш, Сенден чаннып дилеп тур бис. 19 Дээрги, дыңнап көр! Дээрги, өршээ! ^s Дээрги, дыңнап кааш, саадатпайн хөделип көрем! Бурганым, бистиң дилевисти Бодуң алдарың дээш хандырып бер ^t, чүге дээрге хоорайың-даа, чонуң-даа Сээң ат-алдарыңга тураскааттынган-дыр!»

20 Мен бодумнуң болгаш израиль чонумнуң хай-бачыдын миннип ^u, Бурганым Дээрги-Чаяакчыга ынчалдыр чаннып турдум, Бурганымның ыдыктыг даа дээш дилеп турдум. 21 Мен ынчалдыр мөргүп турумда ^v, баштайгы көстүүшкүнде көргеним Гавриил деп кижи ^w меңээ дүрген ужуп чедип келди. (Ол бүгү кежээки өргүл кылыр үеде болган.) ^x 22 Мени сургап тура, ол мынча диди: «Даниил, мен сээң билииң немеп бээр дээш чедип келдим. 23 Сен мөргүп эгелээриңге-ле, Бургандан харыы келген. Ынчангаш мен Ооң эргим кижизи сеңээ ^y ол харыыны чугаалаар дээш келдим. Ооң ажыдып каан харыызын ам билип ал:

24 Сээң чонуңга болгаш ыдыктыг хоорайыңга ^z чеден катап чеди чыл доктааттынган. Ол хуусаа иштинде бужар-бак чорук доостур, бачыттың төнчүзү кээр, чонну кем-буруузундан арыглап каар, мөңге чөптүг-шынныг чорук тыптыр, өттүр билген медеглелдер болгаш көстүүшкүннер бүдер база Эң ыдыктыг черни үс-биле чаап, чаартып каар. 25 Мону база угаап билип ал: Иерусалимни катап тургузарының дугайында дужаал үнгенинден бээр, шилиттинген, чагдырткан Чагырыкчының кээринге чедир чеди катап чеди чыл эртер, а ооң соонда алдан ийи катап чеди чыл эртер – ол хуусаа иштинде хоорайның төп шөлү болгаш камгалалдары катап тургустунар, ынчалза-даа ол чылдар берге болур. 26 Кажан алдан ийи катап чеди чыл эртерге, чагдырткан Чагырыкчыны чок кылыр, ооң чүзү-даа артпас ^{▼▼ Бо домактың утказы эки билдинмес. Өске бурунгу сөзүглелде «Ол чок апаар» деп бижээн.}. Хоорай-даа, ыдыктыг өргээ-даа чедип кээр өске чагырыкчының чонунга үптеттирер. Ооң төнчүзү үерге алысканы-биле дөмей; төнчүге чедир дайын болгаш баш бурунгаар доктааттынган хоозураашкыннар болур ^ab. 27 Ол чагырыкчы дыка хөй улус-биле чеди чылдың керээзин чарып аар. Ол үениң чартыындан өргүлдерни соксадып каар, а ооң орнунга ^{▼▼ Азы: «Өргээге».} хоозуралдың бужар чудун тургузар ^ad – хоозурадыкчыны баш бурунгаар доктааттынган яла таварааже, ындыг болур».